¹ Saulus man tannak kara tabiꞌinka, hen tan hap de ola man mas gulku. Stepanussu in kim dak, dekon zep ki hendep kon gwesik hanak– Yesussu de taibliblan zisi de karek ta gwibinkim. Dekam zep Yerusalem kon tingare zewe de lang san dep heya-hya gwek, hen ahakon Samaria san heya-hya gwek. Diki dua-blaskam de zini in, zen zewe en ki lowehek.
² Alap hon de etal gwesin wenya ki zep Stepanussu ner dwanuk, hen gona dawemkam dablak.
³ Hwena Saulus man Yesussu de taibliblan zisi de timbwas tabin hip golealp gwe-gweꞌanka. Zen gol-gol san tahyondan hap golehakal gweka, dekon zep bwinak dikim yal gulnen hap ziil tibirhal gweka– sap zi, sap we.
⁴ Men desan ki heya-hya gwe song gwek, Yesus hup de ol dawemna desan zep ki tawa dabir song gwek.
⁵ Pilipus Bak dekam zep Samaria mo aha e san tineka. Zao zep ol dawemkam anakan tawa ta gwibirki, “Yesus Zen Zen– nesa de ngaya tabin hip de Zini, mensa Alap gu-guk gweblakaye.”
⁶ Zewe de zi trana in kim sane da gwek, hen zeno owas-owas syal gwibinni kara nul gweblak, dekam zep tangan zeno tawa tabin sin aha-ere enlalakam ang tak.
⁷ Sap dowal-dowal mo bi gwibiridan zini zao beyana. Hwena Pilipus kim zebon mae onakon golealsa sone gweka, herhen naban zep kon wet so gwe-gwek. Hen zi lekna hen sap taha-tana teisya inen srem zi sang-sangna dekam beyakam Yesus mo bosekam dawem ta gwibirki.
⁸ Ëna iwe de zi mo isrip-srina dekam tangan zep mam gwizimk.
⁹ Ëna iwe hen ki zini bosena Simon. Zen meiyer golzauk gwen zi, hen tingare zini zeno syala man denggwan gwibik. Zena hen man zenaka anakan gu gweblaka, “Ano sosonna mam tanganna.”
¹⁰ Hen tingare zini, sap mamna hen sap betekna, desa man nasal gweblak. Zen man nen gweblak, “Alap mes zebe hap soson yawala golblaka.”
¹¹ Pilipus de hatan sremnak, zen desa en ang ne gweblak, sap zen man zeno owas syal gwibinni denggwan gwibik.
¹² Hwena Pilipus kim tonbirida gweka– Kristus Yesussu de taibliblankam de Alap mo irik ginnik biti gwen hap de ol dawemna insa, zen dekam zep Yesussu daibliblak. Dekam zep hendep baptis ta gwibirki– sap zi, sap we.
¹³ Simon zena hen dekam zep Yesussu taibliblaka. Desa hen dekam zep baptis taka. Zen dekam zep Pilipussu ang gwebla nasen gweꞌanka, sap zen man tangan Pilipus mo owas-owas syal gwibinni tenggwan gwibirki.
¹⁴ Yerusalem kon kim Yesus mo dam tasibin wenya anakan esak, “Samariak de zini mes Alap onakore ol dawemna daiblibik, hwena Alap mo Enhona hom ing gwe hebiridaꞌara,” dekam zep Petrus ne Yohanis neka etan desan dep deisya sonek. 15Zen kim aptaka, dekam zep zebe mae hap Alapsa en soneblaka– zere mo Enho dikim hen ing gwe hebiridan hap. 16Sap Pilipus kim Yesus mo bosekam baptis ta gwibirki, Alap mo Enhona hom dekam ing gwe hebiridaꞌanka.
¹⁵ (8:14)
¹⁶ (8:14)
¹⁷ Hwena Petrus ne Yohanis ne kim tahana lehabirida ineka, dekam zep Alap mo Enhona ing gwe hebiridaka.
¹⁸ Meiyer hlaul gwen zini Simon in kim hlauludaka, “Zeno nik mo taha tehabirida inenkam Alap mo Enhona ing gwe hebiridanda,” dekam zep abe soka, “Ëe asa ep te-alasa golzim.
¹⁹ Abe hap sosonsa olbla– ano taha tehabirida inenkam deka hen Alap mo Enho ing gwe hebirida gweka.”
²⁰ Petrus ki zep hwena ding gulbluka, “Ere mo te-ala naban esa syauk sun dep zersong gwera, sap em ema tim guꞌura, ‘Alap mo sosonna te-alakam asa gol.’
²¹ Emsa hom Alap gubluka– syala ansa de gon hapye. Sap eno enhona nama hom Alap mo nwenak dakastiꞌira.
²² Karekna insa emki hli yun. Dekam Biansa abe ta gwe– Zen dekakim eno enlala jal-jala insa tap gulsubluka.
²³ Sap ee ama emsa tame taꞌan: Eno enhona, serkam de kil-kil tanganna, man emsa karek san dep da tablahal gwenda.”
²⁴ Simon ki zep ding gulbluka, “Asa Biansa de abe tankam mas gwebla– karek goltowen hap dena mensa asa gublula, zen deka abon lwa srem gwek.”
²⁵ Petrus ne Yohanis ne kim ol dawemna insa ena iwe lonsubiridaka, ki zep Yerusalem san dep etan ola halka, hen Samaria mo ora san de e-e san man lonbirida song gweka.
²⁶ Hwena Alap mo dam taha nakore zini ki zep Pilipussu gubluka, “Selatan san dekam em song gwen– sasa lang san de orana in san, Yerusalem kon langna Gaza san dep de ora san.”
²⁷ Ki zep hendep song gweka. Hwena orana in san teipsin zini lun kon hen man keretakam song gweꞌan zaka– langna Etiopia mo irik ginnik de te-ala ait gweblan zi. Langna Etiopiasa dekam wenya bosena Kandake teipsinkim irik gik. Hwena zini in zeno alp nakon mam gweka. Hwena zen mes Alapsa taibliblaka, zep Yahudi mo yakla yalak de ang gwen hap Yerusalem san song gweka.
²⁸ Hwena zen man Yerusalem kon Etiopia san dep etan lwa haꞌanka. Zen zere mo keretanak nikin haꞌanka, dekon Alap mo ol ayang gul gwen zini Yesaya mo ol tataksa baca gul song gweꞌanka. Keretana in zere hon de babu gwe-gwen zi golsong gweꞌanka.
²⁹ Alap mo Enhona ki zep Pilipussu gubluka, “Emki keretana in mo alp san ang gwe sehan.”
³⁰ Dekam zep hluwenkam ang gwese halka, dekam zep zini insa sane taꞌan zaka– Yesaya mo ol ale gunsu de baca gul hannak. Ki zep takensiblika, “Insa baca guꞌura, ena wehe dam gulsuꞌura?”
³¹ Dekam zep ding gulbluka, “Ëe banakan de dam gulsun hup? – zi de abe hap srip gulsublun sremkamye.” Dekam zep Pilipussu gubluka, “Haen, em sewe sezan. Nen apdekam song en.”
³² Pilipus in kim sane taꞌanka, dekam anakan baca guꞌunka, “Men kirekam Alap hap de tru tasiblin hap dombana kap nulhal gwenan, zini insa hen kirekam sa nerhal. Dombana men kirekam ala blom tasinnik eol srem gwe-gwenan, zen hen kirekam sa karek tannak ol srem gwera.
³³ Zen sap karek gon sremna, hwena dawemkam de takensiblin sremnak sa totoresa dal. Zen walas gwen sremnak sa tili, sap zeno gwenna nabakam sa nablonsukin.”
³⁴ Ki zep teipsin zini in Pilipussu gubluka, “Asa emki gublun: San ha Yesaya zere hap ki ale gulku? San ha aha zi hip?”
³⁵ Dekam zep Yesaya mo ol ale gunnu in kon Yesus hup denaka de srip gulsublunkam kon gwesibir hanaka.
³⁶ Oranak kim weya tanena hla kulki, ki zep teipsin zini in gubluka, “Weyana de wake! Angkam ba en lwa kiniꞌan? – asa dikim baptis tan hapye.”
³⁷ (8:36)
³⁸ Ki zep kereta golsong gwen zini insa golzausun hup gubluka. Dekam zep ho san dep ati eka. Zao zep Pilipus baptis taka.
³⁹ Ho nakon kim apta seꞌan zaka, Alap mo Enhona dekam zep ze Pilipussu zer ine halka. Teipsin zini in hom etan dekon hla taka, hwena isrip-sri naban zep kon song gweka.
⁴⁰ Pilipus hwena dekam zep ena Asdod owaskam hataka. Dekon zep hwena hi alp san de e-e san engaya gwen hap de ol dawemkam tonbirida song gweka, hendep Kaesareak hataka.