¹ Alap mo golak de syal tan zi mo teipsinni dekam zep takensiblika, “In san eiwa denaka ki etonnan?”
² Stepanus ki zep ding gulku, “Aya-wal oso-wal hen biankam dena, emki asa sane tan. Neno mae mo auyanna Abraham kim nama Mesopotamia mo langnak gweꞌankake, zen kim Haran san dep al gwe srem gweꞌanka, dekam Teipsin Zini Alap man Zenaka zertreblaka.
³ Ki zep ze gubluka, ‘Em ere mo langna hen ere korena hli yuluda. Langna men desae ep goltreblaꞌak, desan dep al gwe.’
⁴ “Abraham dekam zep langna Kasdim kon Haran san dep al gweka. Bi zem kim tilki, Alap dekam zep etan langna awe dep zer sone zaka.
⁵ Dekam Alap hom mae kama maena Abraham de desa bi gwibin hip golblaka, hwena sapꞌnen gu-guk gweblaka, ‘Langna an eno auyan-aza sa bi neibir.’ Hwena Abraham dekam hom walas gweꞌanka.
⁶ Zen man hen hamal hap gubluka, ‘Eno auyan-azana sa zi mo lang san eal tal. Zewe de zini sa desa tahunna empat-ratus enkam jap nul sonenda gwer hen karek da gwibir.
⁷ Hwena hyanak, Ëe asa zewe de zisi karek tabir. Dekam sa eno auyan-azana langna in kon wet so gwer. Dekam sa hwena langna awe Asa betek ne gweblal, hen otweransa sa abe hap tru dasik gweblal.’
⁸ Dekam kim Alap Abraham hap ol gu-gublun yala insa golblaka, dekam zep Abraham han ola zeraha-en gulku, ‘Em de ola an san ang gwen hap, em ere mo auyan-tane walya ban to mipna ziblom tasik gwibir.’ Ki zep hwena Abraham Isaksa we taka. Mingguna kim aha-en tamank, dekam zep to mipna blaonsubluka. Etan Isak Yakobsa we taka, hen Yakob dua-blas enkam wei-wik gulku– neno mae mo zi ausu mo auyansa.
⁹ “Hwena Yakob mo walasna in oso zem Yusupsu man husus neblak. Desa zep zi mo tana iltikinnik de babu gwe-gwen hap Mesir hip te-alakam neirzimk. Hwena Alap man ze kara ta gweka.
¹⁰ Zen zep jalom ek tihi nakon zeser sone gweka, hen enlala blalsa zer gweblaka, hen Mesirk de teipsin zi mo nwenak dikim dawem gwen hap dena zep golblaka. Hendep teipsin zini in dekam zep zeno alp nakon de hen teipsin hip gubluka.
¹¹ “Hwena dekam zep usak yala tingare Mesir mo langnak hen Kanaank awe hatak. Dekam zep karekkam etahalha gwek. Neno mae mo auyanna dekam hen usak naban lowehe gwek.
¹² Yakob kim salka, ‘Mesirk gandumnu ki,’ dekam zep walas zemka lup gul soneka– dekam de zewe te-alakam lop tan hap.
¹³ Etan kim tap gweka, dekam zep etan lup gul soneka. Hwena dekam zep Yusup gubiridaka, ‘Ëe an zen– Yusupye.’ Mesirk de teipsin zini in dekam zep tawa gwibiridaka, ‘Hare an Yusup mo iye sake.’
¹⁴ Yusup dekam zep bi zemka gu soneblaka– we wal walas naban de kitak zere osan dep al tazan hap. Dekam beyana 75 enkam zep al tak.
¹⁵ Yakob Mesirk zep tilki. Hen neno mae mo orep de auyan-azana zao zep juwe gwek– hen sap Yusup zena.
¹⁶ Zeno mae mo tok-tokna man etan Sikem san dep nolelwandahal gwezak– zewe de lo tasik gwibin hip, men zao hen Abraham zenaka lo dasikke, zena men desa ngana Sikemk walya Hemor Bak mo auyan-tane walyak te-alakam zerkake.
¹⁷ “Abrahamsa mensa Alap gu-guk gweblaka– zao de zaun hup kim golek de gweꞌak, dekam neno mae mo auyan-azana mes tangan Mesirk ebeya gwek.
¹⁸ Dekam hwena Mesirk aha zi teipsinkim irik gilki– Yusupsu de tame tan srem nik.
¹⁹ Zen neno mae mo auyan-azasa yane-ne ta gwibirki hen jap gul sonenda gweka, hendep wal baizilsi de honak yal gulne gwen hap tik-tik ta gwibirki.
²⁰ “Musasa dekam zep hen jaha gwek. Hwena an-bi zem man tame lak, ‘An totore walassa hom.’ Zen zep golak dan-ahare ben enkam tol ergwek.
²¹ Embwan naban kim hendep honak tak laink, hwena teipsin zini in mo wenam zep zer inek. Zen zep zere mo walas makan hanan tak.
²² Mesir zere mae mo enlala blalkam zep tawa dak. Zeno syala hen ol toranna dekam zep soson gweblak.
²³ “Musa mo tahunna kim empat-pulukam altilsiblik, dekam zep enlala gweka, ‘Ëe anik ere kore naka hlauludak.’
²⁴ Zen kim hlauludaꞌanka, dekam zep hwena Mesir walya Yahudi walsya de tangolennak hla taꞌanka. Dekam zep hwena Yahudi bose zem insa de sap zerzaunnuk Mesir walya insa mos ta guku.
²⁵ Musa dekam man tim guꞌunka, ‘Are korena sa asa anakan tame dal, “Alap an desa dam tasiꞌira– nesa dikim gwis gwe sonen hapye.”’ Hwena zen hom kirekam tame dak.
²⁶ Kaꞌankam, ki zep etan Yahudi bose zemka akeꞌanka. Man tobe eꞌanka. Ki zep sap anakare ola ban kles soꞌanka, ‘Em an Yahudi bose omkake! Em ba habe enaka karek osoꞌara?’
²⁷ “Hwena men zen wal bose zem insa lek-lek taꞌanka, zen zep Musasa anakare ola ban ata taka, ‘Emsa nara teipsin hip gubluka– dekam de darak gwen zisi klis gul gwen hapye?
²⁸ Em san asa de tan habe hen dwam gweblaꞌara– men kirekame Mesir walya ir takake?’
²⁹ Musa kim kirekam salblaka, dekam zep enlala gweka, ‘O ano zi tanna in mes-am tingan etawa gwendal,’ dekam zep langna Midian san dep heya gweka. Zao zep zi mo langnak gwe gweka. Walasna zao zep dan we soka.
³⁰ “Zao kim tahunna empat-pulukam tamanblak, Alap mo dam taha nakore zini ki zep zi srem langnak Musa hap zenaka zertreblaka– kwatapna Sinai golek denak. Man ze nwe-mase gweka– syauk nubare te tyum-tyumnu kiye.
³¹ Kim syauknu insa hlaul seka, ki zep tenggwanbiꞌinka. Dekam zep golek kon de hlaun hup song gweꞌanka. Hwena dekam zep Bian mo ola anakan salka,
³² ‘Ëe an eno auyan wal mo Alap– Abraham, Isak, hen Yakob mo Alap.’ Musa dekam zep airin hip yal-yal gweꞌanka, hen desan de kara gwen hap man airiꞌanka.
³³ “Dekam zep Bian etan gubluka, ‘Sepatuna alsik, sap kamana an zaoe zauꞌura ere en hap dena.
³⁴ Ano zi bi gwibiridanna, mensa Mesir karekkam jap nul sonenda gweꞌan, mese hlauludak. Hen zeno mae mo esol-sol gwe-gwenna mese sane gwek. An zebe dekam de hil ti sonebin hip ati gwenanzal. Zep angkam Ëe ama etan Mesir sin dep emsa zer soneꞌan.’
³⁵ Musa in men desa nonol anakare ola ban baes neblakke, ‘Emsa nara teipsin hip gubluka– dekam de darak gwen zisi klis gul gwen hapye?’ Hwena Alap Zen desa zer soneka– zen de teipsin hip, hen zen de zere mo bi gwibiridan zini insa hil ti sonebin hipye. Hen Alap mo dam taha nakore zini men zen syauk nubare te makan zenaka zertreblaka, zen hen man mas gwe-gweblaka.
³⁶ Musa dekam zep Mesir kon gwiswe soneka. Dekam de taibliblan hap owas-owassa syal gwe-gwibir-zimki– nonol Mesirk, hi bosena Kal-kalak, hen sasa langnak kim empat-pulu tahunkam golelowehe gwekake.
³⁷ Zen Israel Bak mo ausu nakore zini insa hamal hap anakan gu-gubiridaka, ‘Alap sa ahanaka ere mae mo ausu nakon dam tasizimdi– men kirekam hen asa dam tasikike, zere mo olsa de ayang gul gwizimdin hip.’
³⁸ Zen in kim sasa langnak golelowehe gweka, dekam Alap mo dam taha nakore zi niban kwatapna Sinaik aisil e gweka, hen zen dekam zep engaya gwen hap de ola hamal hap salka. Zen desa zep nebe mae hap hli yulzimki.
³⁹ “Hwena neno mae mo auyan-azana man desa de betek gweblan hap baes ta gwek. Zen dekam ek enkam Musasa ang ne gweblaꞌak, hwena enhonak Mesir sin de etan lwan dahan hap de enlala en lwa gwizimki.
⁴⁰ Dekam zep Harunsu nenblak, ‘Abe mae hap em yang tabin dowal-dowalsa yang tabir-zimdin– zen deka nesa etan Mesir sin dep nolelwan dahak. Musa Bak in zen nesa sil tibirhal zaka, ee home angkam anakan tame laꞌan, “Zao gweꞌara.”’
⁴¹ Dekam zep yang tasin dowala zisyal gweblaka– sapi tane nwe-mase makare naka. Ki zep otweranna dowala in hap tru da seblak, hen tembane yala zeno bose hap syal neibik. Hwena dowala in sap zere mae mo tahakam de syal gweblanna.
⁴² Alap Zen dekam zep tahanna gweisibiridaka, ‘Amki dowal-dowalsa betek eibirida gwek– hen nglinak de keis maesa.’ Zep Alap mo ol ayang gul gwen zini mensa anakan ale nul gwek man hen dakastiꞌin, ‘Israelk de zi, em kime sasa langnak empat-pulu tahunkam lowehe gwek, em abe en hap home otweranna hen aha kire-kire maena ol gweblak. Em ema yang tabin dowal-dowal hap hen ol gwizimk.
⁴³ Sap em dekam Molok Bak ne keis nibare zini Refan Bak nekae boklena kom oso gwizimk– ena mensae yang ososukke. Ëe in zep asa emsa e yala Babel mo men eihya san dep yal gul.’
⁴⁴ “Hwena angkam Alap mo gol hap denakae emsa tonbiridaꞌan: Musa kim sasa langnak golegweka Alap man gubluka, ‘Abe hap em deyolkam de golsa syal gwibir-blin– men kirekame ebe hap goltreblakke.’ Dekam zep gola insa zisyal gwibir-blika, hen gola insa man zere mae mo lowehe naseran san zial gulusen gweka. Sap Alap man dwam gwibiridaka– gola insa de hlaunkum de anakan dam gulsuk gwen hap, ‘Alap man nesa golelowe heꞌara.’
⁴⁵ Ki zep hendep langna an san dep nolsong gwezak– Yosua Bak kim goleeija song gwe zakaye. Alap hen dekam man Zenaka de tame tan srem zini insa golealsa sone gwibirki. Gola in deban ki ze hendep nolgwe gwek. Hendep Daud kim teipsiki, gola insa man nama hlaul zuka.
⁴⁶ Daud man tangan Alap mo nwenak sam gwesiki, ki zep auyan Yakob mo Alapna insa abe taka, ‘Ëe wehe ebe hap gol dawemna taubluꞌak?’
⁴⁷ Hwena zen hom taubluka. Hwena tane zik taubluka– teipsin zini Salomo Bak.
⁴⁸ “Hwena Teipsin Zini Alap, Zen hom zi mo taublunnak gwe gwenda– men kirekam Alap mo ol ayang gul gwen zini anakan gublukake,
⁴⁹ ‘Nglina zen dekone teipsinkim irik giꞌin. Okamana zen zewee tanana ik so sone gwenan. Zep em bejen em abe hap gola taublun– Ëe dekon emsa golelowehe gwen hapye.
⁵⁰ Ki san Ëe home ere mo tahakam kitak yang tabik?’
⁵¹ “Zep eiwa em in zi ausuna dawemkam de nol drak-drak tanganna! Em in, eiwa, nere mae mo auyan-aza naban apdenak– san de i sremna! Eno mae mo enhona apdenak– Alapsa de tame tan srem zi nibanye. Em in Alap mo Enhosae ereija tine gwenan!
⁵² Emki eenlala gwen: San ha ki? – Alap mo ol ayang gul gwen zini, eno mae mo auyan-aza de karek tan srem naye. Sap zen kitak karek tabin enna! Hendep men zen hamal hap nenbirida gwek, ‘Emsa de ngaya tabin hip de Zi lalakna sa hata zala’– desa man hen damera gwek. Zen hendep enlalana in em debane nama ergweꞌan. In zebe ner hom lalak Zini insa tan hap erguk, hendep lak.
⁵³ Em sap tawana– titi tabin ola mensa Alap mo dam taha nakore zini Musa hap ayang nul gweblakye. Hwena em toton banakan dep? – desan de ang tan naye!”
⁵⁴ Desa de tonbiridannak kim sane daꞌak, dekam tangan zep serkam u sal-sal neblaꞌak.
⁵⁵ Hwena Alap mo Enhona dekam zep nwena lirisin soblaka, dekam zep ngli san kara gwe seka. Man dalusuhuk. Zao zep Teipsin Zini Alapsa hla ta seka. Tane Zem Yesus dam taha san dekam zauꞌunka.
⁵⁶ Ki zep hwena gubiridaka, “Emki hlaun. Ëe ngatan zi mo lang san kara gwe senan. Man dalusununhal. Ngatan zi mo lang nakore Zi Tanganna Alap mo dam taha nakon zauꞌura.”
⁵⁷ Kirekam kim nasalblak, dekam zep ini mat dasibik, hen dekam zep anakare ola ban ena taꞌak, “Zini an nen tan!” Ki zep ze hendep nabakam dot dasik.
⁵⁸ Dekam zep hendep ena in kon il dihak, zao zep kasokam niriblak. Men zen botonkam klak dak, dekam de zen nonol itiblan hap, zere mae mo tahan bajuna wal seiwiri Saulus mo tana alpnak kang dazak– zen de kara tabir-zimdin hip.
⁵⁹ Kim niriblaꞌak, dekam zep Biansa gu soneblaka, “Bian Yesus, ano angsa emki zer irin.”
⁶⁰ Dekam zep boklena kom soka, ki zep ol mamkam takenka, “Bian, ansa karekna syal neibiꞌin, emki tap gulsuzimdin.” Kirekam kim guku, ki zep hendep tilsiki.