¹ Eiknik kime yaing gwek, dekam zep zewe de zi asa nenbiridak, “Lang tek bosena an Malta.”
² Lang tekna iwe de zini in man tangan asa kwasang neibiridak. Zen syauksu ap i dazim nirak, hen dawem enkam asa lup nulink, sap ona man il tiꞌanka hen langna in bot-bot tanganna.
³ Paulus hwena tesya tagam taꞌanka, hwena wanya jal-jala ban kap ta inehal zaka. Desa kim syauknuk kang ta seꞌanka, wanyana in dekam zep syauk sal-sal airin hip tahanak hit tik.
⁴ Zewe de zini kim hla dak, “Paulus mo tahanak wanya te soneꞌan,” dekam zep zenaka nenbiridak, “Zini an zi-ta gwen zisi mes yap. Zen sap mes hinak de karek nakon ngaya gwera, hwena neno mae mo yang tasin dowala ahana, zi mo karek-kareksa de hlaulblun hap de zini, hom ki zen de ngaya gwen hap gublula.”
⁵ Hwena Paulus ki zep wanyana insa syauknuk dep myak gulsuku. Hwena sang-sangna hom mae engka en mae eisbirki.
⁶ Zewe de zini man tim diꞌak, “Zen sa hanala. Ki sa mumuk ennak tokna zara.” Hwena kim sap ze holokam anakan kara daꞌak, “Banakan mae hom gweꞌara,” dekam zep enlalana anakan wet dyasik, “O zini an hen aha alapsa mes yap.”
⁷ Lang tekna iwe de gubernora, bosena Publius. Zeno lang bi gwibinni dekon golek. Dawem enkam zep kon asa kwang guluda halka. Zen zere mo golak dan-ahare yaklakam dawem enkam asa golelowe heka.
⁸ Bi zem dekam u sya nabare ewen naban tumnak taꞌanka. Paulus ki zep ze duwebla zaka, ki zep Alapsa zebe hap abe taka. Tahana kim tehabla ineka, dekam zep hendep dawem gweka.
⁹ Kirekam kim hla dak, dekam zep lang tekna iwe de zi sang-sangna Paulus osan dep kap nulhal gwezak, zao zep kitak dawem ta gwibirki.
¹⁰ Dekam dawem enkam zep asa blikip neisibirida gwek. Dekon kime etan sek gweꞌak, zen man ano mae mo tahalhana ap hla nulzimk.
¹¹ Dan-ahare benkam kime ze lowehek, ki zebe kon hwena Aleksandria kore buluk ang tak. Bul golsong gwe-gwe zini in Malta kon bot-bot tamle hap de dan-ahare ben de tamarannak dep neissibik. Bulu in zeno mase-nolak zere mae mo yang tabin dowal dare mo nwe-masesa ze yang nososuk. Dowala in ahana, Kastor Bak mo nwe-masekam, ahana Poluks mo nwe-masekam.
¹² Italia mo lang tekna Silisik de ena Sirakusak kime yaing gwek, zewe dan-ahare yaklakam zebe lowehek.
¹³ Dekon kime sek gwek, dekam zebe ena Regiumk yaing gwek. Kaꞌankam dekam zep asesena selatan nakon taiꞌinka. Zeno kaꞌankam zebe nabakam Putiolik yaing gwek.
¹⁴ Zewe zebe Yesussu de taibliblan zini ban oletowek. Zen zep asa aha-ere minggukam de zewe lowehen hap nenbiridak. Dekon hwena tanakam zebe e yala Roma san dep sek gwek.
¹⁵ Romak de Yesussu taibliblan wenya kim asa nasalbiridak, dekam zep oranak de e betek dare nakon asa kara neibiridaꞌak. Ëna in ahana bosena Pasar Apius, ahana bosena Dan-ahare Ni Truwe Gun Gol. Paulus kim ze hlauluda kinzika, ki zep Alap hap dawemna golblaka, hen enlalana dekam zep tatete gweblaka.
¹⁶ Romak kime yaing gwek, Paulussu ki zep nenblak, “Sap esa e-en aha golak gwe gwera. Jana nabare zini aha-en aha-enkam sa emsa kara da gwer.”
¹⁷ Yaklana kim dan-ahan damank, Paulus ki zep Yahudi mo nol-nola, men zen Romak lowehe gwek, desa tagal gulsun hup gu sonebiridaka. Zao zep gubiridaka, “Aya-wal oso-wal, ee home mae karekna nere korena kip golzimk, hen nere mae mo auyan-aza mo kirekam de lowe henna home mae gulmunk. Sap kirekam, hwena asa Yerusalemk balk dak, ki zep Roma hap asa tapbla dazimk.
¹⁸ Yahudi mo langnak men zen Roma mo bose hap teipsin-teipsinkim teinikink, zen kim asa taken-taken ne gweblak, dekam zep sap zeser sonen hap asa enlala ne gweblak. Sap zen hom tan hap de karekna ap hla nul gweblak.
¹⁹ Hwena Yahudi zini kim asa de zeser sonen hap jalse neibiridak, dekam zebe ein anakan abe gwek, ‘Asa Roma mo teipsin tangan san dep er sonek– zen deka ap tap gulbluka.’ Hwena ee anakare enlala naban home kirekam abe gwek, ‘Teipsin tangan zini in dekakim ano kore naka karek tabirki.’
²⁰ Zen in zebe emsa tagal gulsun hup gubiridak– eban mae de goletoran hap. Asa an mae hap besikam de dokotkam dahalek: Sap ee ama Israel mo auyan-aza hap de Alap mo gu-gubiridan ola taiblibik.”
²¹ Ki zep ding nulblik, “Ëe home mae nere mae mo lang nakore suratna ebe hap dena ulink. Hen ner hom mae zini hom mae dekon ebe hap dena etonzak.
²² Hwena ee ama emsa de sane tan hap edwam gweꞌan, sap tingare langnak zini man egu gwenan, ‘Kristen zi mo tawa tabinni karekna.’”
²³ Dekam zep ola anakan aha-en nuk, “Yaklana dekam esa Paulussu sane lal.” Dekam beya tangankam zep Paulus mo gol gwe gwennak yaing gwezak. Kaknak zep aisil gwibiridankam kon gwesik hanaka, hendep zao golekam-en gwek. Zen Yesus de Alap mo irik ginsi golhatazan hap denaka tonbiridaka, hen Musa mo titi tabin ola kore naka, hen Alap mo ol ayang gul gwen zi mo ale gun nukore naka klis gulzimki– zen dikim hen Yesussu anakan taibliblan hap, “Zen eiwa Alap mo zer sonenna– Israelsa de ngaya tabin hip Dena.”
²⁴ Ahakon man Paulus mo ola daiblibik. Ahakon man hwa nulsuk.
²⁵ Paulus ki zep aumwa hap gubiridaka, “Eiwa, Yesaya Bak hon Alap mo Enhona ebe mae hap de olsa hamal hap ing gul soneblaka, in zep Yesayasa anakan gubluka, 26 ‘Ola ansa emki nol drak-drak zi ausuna in hap anakan ayang gulzimdin, “Em sap esa esane gwe tine gwer, hwena molye tame ul gwek. Em sap esa nwekam karatda ul tine gwer, hwena molye dam ulsuk gwek.” 27 Sap zi ausuna an mo enlalana mes etop-top gwek, ini hen mes emat-mat gwek, hen nwena mes edimin gwek. Kire sremkam, ki maka nwekam hla nul gweꞌan, hen ikim maka esal gweꞌan, hen enhona maka ehleng gwe-gweꞌan. Ki maka Abon osan dep etan lwanda haꞌanzal, hen Ëe dekam amaka dawem tabiꞌin.’” 28 Paulus ki zep waulsuzimki, “Zen in zebe emsa gubiridaꞌan: Sap em kire tangankame enol drak-drak gwek, Alap mes Kristen zini asa gubiridaka– engaya gwen hap de ol dawemna insa de Yahudi srem zi hip golzim halada gwen hapye. Hen zen sa desa nulin gwer!” 25a Men zen esane gweꞌak, zao zep zenaka keisa-keisa dabiꞌik, hendep ki zep kon sekwak gwek.
²⁶ (28:25)
²⁷ (28:25)
²⁸ (28:25)
²⁹ (28:25)
³⁰ Paulus Romak dare tahunkam gweka– te-alakam de bohe tan golak. Zini men zen du ne gweblak, zen man kon lup gulin gweka.
³¹ Zewe udobe naban hen tru-tru gulblun sremkam Bian Kristus Yesussu de taibliblankam de Alap mo irik ginnik biti gwen hap denaka tonbirida gweka.