¹ Agripa ki zep Paulussu gubluka, “Ëe ama ebe hap golblaꞌan– em dikim ere mo tim golsriwen hap denaka toran hap.” Paulus ki zep tahakam akabiridaka– dekam de kon gwisibir hanan hap. Ki zep gu ineka,
² “Teipsin zini Agripa, ee ama tangan sam gwesinin– ere mo tim golsriwen olsa de namen emsa tonblan hap, mensa Yahudi zini ap ola blo-blo nul gweblakke.
³ Ëe ama tangan sam gwesinin, sap em mese tangan Yahudi zi mo kirekam de lowe henna tawa gwibiridaka– hen zeno mae mo Alap hap de ol gulsuk halasen gwenna. In zebe emsa dawemkam de asa sane tan hap abe taꞌan.
⁴ “Tingare Yahudi zini ano gwenna tawana– walasnak kime ere mo langnak gwek, hendep Yerusalemk awe kime gwe gwek.
⁵ Zen mes holokam asa kara da gwek. Zep zen de edwam gweꞌanam, zen maka emsa anakan nenblaꞌan, ‘Zen Farisi mo tawa tabin sin ang gweka.’ Tingare Yahudi nere mae mo hlik-hlik nakon, Farisikam de zini, zen in zen tingare Yahudi mo titi tabin sin tatetekam ang ta gwenan.
⁶ Zep ee mae habe angkam awe zauꞌun– zao de asa taken-taken gweblan hap: Sap ee ama Yahudi nere mae mo auyan-aza hap de Alap mo ol gu-guk gwensa taiblibik.
⁷ Ol gu-guk gwenna iwe de zaun hup dena insa, Israel mo dua-blas enkam de zi ausuna man tangan kara nei gwibiꞌin. Zen in zep Alapsa betek ne gweblanan– yaklam denaban kam denabanye. Hwena teipsin zini Agripa Bak, ol gu-guk gwenna insae taiblibik, in zepꞌnen ki hwena Yahudi zini ol blo-blona ap mam nulblik.
⁸ Hwena zini ba hap anakan ekil gil gweꞌan? – ‘Alap bejen zini tin nikon ngaya tan.’
⁹ “Aena hen orep anakane kil giꞌik, ‘Dawemna, nen Nazaret walya Yesussu de taibliblan wenya esa karek la gwibir.’
¹⁰ Ëe zebe kirekam Yerusalemk gweibirida gwek. Alap mo golak de mam-mam wenyik mo bosekam, ee ama Yesussu de taibliblan wenya bwinak sesek gulin gwek, hen tameran hap kim nenbirida gwek, ee ama hen ola anakan mas gul gwek, ‘Amki lak.’
¹¹ Ëe mese beya guk– but srem gol-gol san de zisi karek tabin hip hakalbirida gwenna. Hen dekam ama akasibirida gwek, ‘Zen wehe tik-tik tabinkim Yesussu lamang daꞌak?’ Ëe ama serkam u sal-sal gwibirida gwek, zebe hendep aha lang san teibirida gwek.
¹² “Zep ano teipsinni Agripa Bak, ee kime kire enlala naban Damsik sin song gwek, Alap mo golak de mam-mam wenyik mo bosekam de surat naban, yakla bolak denaban dekam zep ngatanna ngli nakon ati gwezak, zao zep asa wale tabirzik. Yakla nwe mo ngatanna man lwala heꞌara. In serkam de ngatan tanganna.
¹³ (26:12)
¹⁴ Ëe tingan kamanake altik, ki zebe hwena ola salsek– Ibrani olkam de anakan asa takenblanna, ‘Saulus, Saulus, em ba habe asa karek ta gwenda? Zen hwena enakae kim karek ta gweꞌara.’
¹⁵ “Ki zebe takensiblik, ‘Bian, Em nara?’ “Ki zep asa ding gulbluka, ‘Ëe an Yesus– em insa karek ta gweꞌarake.
¹⁶ Em luwen. Ëe mese ebe hap Ënaka zertreblanan– em dikim abe hap de syalsa gol gwen hap, hen dekam de abe hap denaka gol halada gwen hap, in desa hlauluda, hen men desae ebe hap goltre gweblaꞌakye.
¹⁷ Ëe asa emsa Yahudi kore jal zi mo taha nakon al ta gwer– hen Yahudi srem jal zi mo taha nakonye. Sap ee ama emsa Yahudi srem zi sin dep zer soneꞌan–
¹⁸ kawesinnik de ebute gwen zisi ekakim ngatannak dep golewet so gwe-gwe, hen dowal mo kigi mo tahalebin zisi ekakim hil ti sone gwibir. Zen kim de Asa daibli gweblaꞌak, zen dekam asa zeno mae mo karek-karekna tap gulsuk gwizim. Zen dekam sa hen Alap mo hlil irin lalak wenyak biti gwer.’
¹⁹ “Zen in zep, teipsin zini Agripa Bak, Alap insa nwena ap lirisin soblaka, ee zebe desan ang gwek.
²⁰ In zebe tonbirida gwek– nonol tanganna Damsik, Yerusalemk, tingare Yahudi mo langnak, hendep Yahudi srem zi mo lang-lang san. Ëe anakane tonbirida gwek, ‘Em ehalen, ki Alap osan dep lwan dahak. Aha zi hip em dawemsa goltrei gwizimdin– dekam de emsa anakan tame tan hapye, “Zen mes halera.”’
²¹ Kirekam insa gol halada gwek, in zep Yahudi zini Alap mo golak asa balk dak, hendep tan hap asa alp dasik.
²² Hwena Alap man asa il gwehe gweblaꞌara. In zebe hendep angkam an nama zauꞌun hen emsa tonbiridaꞌan– sap mam-mam wenya hen bete-tek wenya. Ëe ansa emsa gubiridaꞌan, zen hom Musa mo ola kon sren gweꞌan– hen Alap mo ol ayang gul gwen zi mo ola konye.
²³ Sap zen anakan hamal hap egu-guk gwek, ‘Israelsa de ngaya tabin hip de Zini, Zen sa kareksa goltowera. Hen Zen Zen sa tin nikon de ngaya gwenkam nonol gwera– dekam de engaya gwen hap de ngatannak dep golewet so gwen hapye, sap Yahudi zi, sap hen Yahudi srem zi.’”
²⁴ Kirekam kim guku, dekam zep Pestus zeno ola insa ol drakkam blaonsublu kinika, “Paulus, em in ema mamak gweka! Em insa kirekam mamkam tawa gwibirki, in zebe hendep mamak gweka.”
²⁵ Paulus ki zep hwena ding gulbluka, “Teipsin zini Pestus Bak, ee home mamak gwek. Ëe in eiwa de tangannake tonnan, hen enlala dawemkame tonnan.
²⁶ Teipsin zini Agripa, zen hal-halaka hom. Hen ee tawana: Zen mes orep anakan tawa gweka, ‘Yesus kirekam gweka, hen Yahudi kirekam neblak.’ Sap in kim ki jowek, zen damnak ki lwak. Zep zeno nwenak ee sap asa beyakam kire hap dena ton.
²⁷ Teipsin zini Agripa, em san ema anakan taiblibiꞌira? – ‘Mensa Alap mo ol ayang gul gwen zini ale nuk, zen eiwana.’ Ëe ama emsa tame taꞌan: Em mese desa taiblibirki.”
²⁸ Agripa ki zep hen zeno ola blaonsublu kinika, “Em san ema asa tim tiꞌara? – ‘Nabakam asa desa halen tal, hendep zen sa angkam Kristen gwera.’”
²⁹ Paulus ki zep ding gulbluka, “Ëe ama Alapsa ebe hap abe ta gweꞌan– sap angkam dep, ahaksa lamkam dep. Hwena ebe en hap hom. Ëe anakane abe ta gwenan, ‘Bian, an zen asa sane da gwenan, zen dikire tingan ere makan eliwehek.’ Hwena ee emsa de hen besi dokotkam de tahalebin hip home abe ta gweꞌan– aena an kire nike zauꞌunke.”
³⁰ Teipsin zini Agripa, dekam zep somol zeban, hen gubernor Pestus mae han ezauk.
³¹ Ki zep wet so gwek. Zao kim apdekam zenaka donbiridaꞌak, zao zep etonꞌak, “Zini an hom karekna golka– dekam de tan hap dena, ahaksa bwinak de se tya irin hip denaye.”
³² Agripa ki zep Pestussu gubluka, “Zini an menkam emaka zeser soneka. Hwena zen mes abe gweka– Roma mo teipsin tangannak de tap gulblun hap.”