¹ Didok Raja Agrippa ma tu si Paulus, "Saonnari nipatola ma ho mandok hata laho mambela dirimu," ning ia. Dung i diangkat si Paulus ma tangannia laho pajojorkon hata mambela dirina. Songon on ma didok ia,
² "Na niparsangapan Rajai Baginda Agrippa! Maruntung sajo do au hulala di na tola au pajojorkon hatangku tarlobi di jolo ni raja i laho mambela diringku maradopkon sude adu-aduan na nidok ni halak Jahudi tu au;
³ lumobi dibaen tangkas sajo do diboto raja i adat na somal, bope angka pangalaho ni halak Jahudi. Jadi hara ni i, nipangido ma dohot sangap anso laing sobar ma jolo raja i umbege na hupajojor on.
⁴ Sude do halak Jahudi tangkas umboto taringot tu ngolungku mamungka sian haposoonku. Diboto halahi do mamungka sian hamenehanku laing na tinggal di tonga-tonga ni bangsongki sandiri do au di Jerusalem.
⁵ Madung honok ditanda halahi au. Sugari ra halahi, tarsaksihon halahi do paboa na halak Parise do au sian mulana jana huihutkon do sude aturan na umborat di ugamonami.
⁶ Hape saonnari jongjong ma au dison anso niadilan hum hara ni na huhaporsayai parjanjian na nibaen ni Debata tu angka ompungnami.
⁷ Laing parjanjian i do na nipainte-inte ni halak Israel na dua bolas marga i umbaen na marsitutu halahi marsomba tu Debata arian dohot borngin. Hape hara ni na huhaporsayai janji i, gabe dipasala halak Jahudi ma au.
⁸ Biasi nada tarhaporsayai angka dongan Jahudi, na nipangolu ni Debata halak na mate i?
⁹ Anggo nabaruon au sandiri pe marpandapot, angkon niputusan do gogoniba laho mangalo Jesus halak Nasaret i.
¹⁰ Jana hubaen do songon i di Jerusalem. Dung hujagit surat kuaso sian sintua ni malim bahat do hupahurungkon halak na badia. I noma jop ni rohangku muda jabat mate niuhum halahi.
¹¹ Jotjot do huparkanciti halahi di angka bagas paribadatan, jana hupaksa halahi mansoadahon na nihaporsayaan ni halahi. Hara ni goyak ni rohangku paida-ida halahi, hukojar-kojar do halahi lopus tu kota na asing."
¹² "Jana i do maksudku di na huoban surat kuaso sian angka sintua ni malim i tu Damaskus.
¹³ Jadi di tonga dalan i hira-hira kotu ma hatiha i, ale rajanami, huida ma sada sinondang sian langit, tumorang dope sian sinondang ni mataniari humaliang au dohot humaliang dongan-donganki na mardalan rap dohot au.
¹⁴ Gabe martungkapan ma hami sude tu tano i. Dung i hubege ma sada sora di hata Ibrani na mandok tu au,