¹ Gubernor Pestus mo hata zannak kim yaklana dan-ahan damank, dekam zep Kaesarea kon Yerusalemsa amjanbirki.
² Zao zep Pestus mo nwenak Alap mo golak de mam-mam wenya hen Yahudi mo nol-nola Paulus mo karekna botonkam noltreblak. Zen man Pestussu anakan aberbe da gweꞌak,
³ “Ëe de emsa sam gwesiblin hap, emki gubiridan– Paulussu de etan an san dep zer sonen hap.” Sap zen mes aningkim de ora nakon til giblin hap ehohle gwek.
⁴ Hwena man ding gulzimki, “Paulussu zen Kaesareak am kara daꞌan, hen ee desan asa etan nabakam lwahal.
⁵ Zen de eiwa karek gwenkam, ki dikire eno mae mo nol-nol ahakore nik asa ang neblak– zao deka zeno kareksa abe hap noltreblak.”
⁶ Yerusalemk yaklana san ha dare taha-tapkam mes yap ze gweka, ki zep kon etan Kaesarea san dep lwa halka. Kaꞌankam zep klis gul gwen hap de teksonnak Paulussu dikim ze taken-taken gweblan hap tagal gulsuku. Ki zep Paulussu de zerhatazan hap gubiridaka.
⁷ Paulussu kim nerhatazak, Yahudi zini in zen Yerusalem kon yaing gwezak, dekam zep dot dasizik. Zao zep olkam men-kon an-konkam neblaꞌak. Boton ol blo-blona insa kim dohon-hon nulbliꞌak, hwena anakan de egunnu hom, “Ëe ere mo nwekame kirekam de kareksa gonnak hla lak.”
⁸ Paulus dekam zep zere mo tim golsriwen hap de ola anakan guku, “Ëe home Yahudi zi mo titi tabin olsa gulmunk, hen Alap mo gola home kun guk. Roma mo teipsin zi mo jalse gwenna home hen gulmunk.”
⁹ Hwena Pestus man Yahudi zi de zenaka sam gwesiblin hap dwam gweꞌanka, zep Paulussu takensiblika, “Em wehe dwam gweꞌara? – ee de etan Yerusalemk emsa taken-taken gweblan hapye, eno karekna insa ap noltreblananke.”
¹⁰ Ki zep ding gulbluka, “Ëe an Roma mo teipsin zi mo dam taha nakore zini eno nwenake zauꞌun. Zep diki em de awe asa taken-taken gweblan hap man dakastiꞌin. Ena dwan mes-eme tawa gwera: Ëe home Yahudi zi hip karekna golzimk.
¹¹ Tan hap de kareksa de ap hlaulblunkam, ee home asa de tan hap jalse gweꞌan. Hwena Yahudi zi mo boton ol blo-blo enna in hap de asa tapbla tazimdin hip hom dakastiꞌin. Ëe ama abe gweꞌan– Romak de teipsin tangan zi de ap tap gulblun hap!”
¹² Zeno ola insa kim Pestus Bak zere mo irgwa taha nakore zi niban ziklis gulku, dekam zep gubluka, “En mese ki gulu. Emsa desan sa nerhal!”
¹³ Hom holo gweꞌak, ki zep teipsin zini Herodes Swe mo tanena Agripa somol zeban Kaesareak Pestussu zini lazak. Agripa, zen hen teipsinni. Somol zem in bosena Bernike.
¹⁴ Zao kim ergwe gweꞌak, Pestus dekam zep Paulus hup dena Agripa Baksa anakan tonblaꞌanka, “Zini awe man bwinak Peliks Bak hli taka.
¹⁵ Ëe kime ner hom Yerusalemsa amjanbik, Alap mo golak de mam-mam wenya hen Yahudi mo nol-nola zeno kareksa ap noltreblak. Zen man sap tan hap asa aberbe da gweꞌak.
¹⁶ Hwena ee anakane ding gulzimk, ‘Roma ano mae mo jalse gwen olak man lwak, “Zisi bejen totoresa jal zi hip tapbla tazimdin. Diki nonol jal zi mo nwenak de taken-taken gweblankam– zao de zen hen zere mo tim golsriwen hap de olsa tonbiridan hap.”’
¹⁷ Zep zen kim abon yaing gwezak, ee home eissik. Kaꞌankam zebe hendep tagam gulsuk. Dekam zebe zini insa de zer halzan hap gubiridak.
¹⁸ Zeno jal zini in kim ap zeno karekna noltreblak, hwena tan hap de karekna zen hom ap noltreblak– men kirekame tim guꞌukye.
¹⁹ Zen hwena Yahudi mo tawa tabin nikon ki neblak, hen mae en nakon ki zini insa husus neblak: Anakan mo gu gwendake, ‘Zi bosena Yesus, zen man tin nikon etan ngaya gweka.’
²⁰ Ëe mese ze anakan topse gwibiridak, ‘Ëe banakarekam de kire hap dena takensibirida gwen hap?’ In zebe sap zini insa takensiblik, ‘Em wehe dwam gweꞌara– ee de etan Yerusalemk emsa taken-taken gweblan hapye? – eno karekna insa ap noltreblananke.’
²¹ Hwena zen Romak de teipsin tangan zi de tap gulblun hap abe gweka. Dekam zebe jana zisi gubiridak, ‘Ki amki awe kara lak. Roma san dep de bulu kim de song gweꞌak, dekam neik desan dep er sonek.’”
²² Agripa ki zep ding gulbluka, “Ëe hen ama dwam gweꞌan– zini in mo aisilsi de sane gwen hap.” Pestus ki zep ding gulbluka, “Kaꞌan neik.”
²³ Kaꞌankam zep Agripa Bak somol zem Bernike neka teipsin zi hip de terya ban dawem enkam nitilzik– ol ton gwibin hip de teksonnak iwe dep. Jana nabare nik mo mam-mamna hen ena iwe de bose nabare wenya mes ze hen yaing gwezak. Pestus dekam zep jana nabare wenya Paulussu de zerhalzan hap gubiridaka.
²⁴ Kim nerhatazak, Pestus ki zep guku, “Teipsin zini Agripa Bak, hen tingan an zene tagal gwenanke, zini an ena mese hla lanan. Tingare Yerusalemk de Yahudi zini hen Kaesareak awe dena, zen mes asa aberbe da gwek– ol nop-nopkam de anakan egu gwenkamye, ‘Zini an hom dakastiꞌira– zen de okamanak gwen hapye.’
²⁵ Hwena ee home tan hap de karekna hlaulbluk. Hwena zen kim abe gweka, Romak de teipsin tangan zi de tap gulblun hap, ee dekam zebe desan de zer sonen hap klis guk.
²⁶ Hwena ee neno mae mo mamna insa ba olsa de suratkam anakan tawa tan hap? – ‘Zeno karekna an de kirekam moye,’ deban de zer sonen hapye. In zebe eno mae mo nwenak de zer halzan hap gubiridanan– nonol tanganna teipsin zini Agripa Bak ere onak, dekam eka apdenak dawemkam anakan dam ulsuk, ‘A kirekam neik nere mae mo teipsin tanganna kip suratna ale ulblik.’
²⁷ Sap ano enlalakam, zeno kareksa de dam gulsublun sremkam, nen bejen nen Roma mo teipsin tangan zi sin dep zer sonen.”