¹ Ëe kime Paulus mae han eire tangan naka enaka lapblal-birinhak, ee dekam zebe bulkum dam-dam enkam lang tekna Kos san dep sek gwek. Kaꞌankam zebe hwena lang tekna Rodosk yaing gwek, dekon zebe etan bulu inkam ena Patara san dep sek gwek.
² Zao zebe hwena langna Penisia san dep de bulu oltowek. Ëe zao zebe hwena sesek gwesek. Dekon kime sek gwek,
³ dekam zebe irgwa taha san dekam lang tekna Sipruꞌu hla la-in guk kinik. Ëe dekam zebe Siria san dep taman gwek. Hwena ena Tiruske atiti gwek, sap bulu in zaoe ang tak, zewe dep de kire-kirena hen man– desa de ze teiswesik gik kinin hap.
⁴ Ëna zewe de Yesussu taibliblan zi niban kime olegaing gwek, dekam zebe deban mae aha-ere minggukam zewe lowehek. Zen dekam zep Alap mo Enho mo sosonkam hamal hap de ola Paulus hup ayang nulblik, “Yerusalem san bahem song gwen.”
⁵ Hwena dekon de etan sek gwen hap denak kim hatak, ki zebe kon hendep sek gwek. Tingare zao de Yesussu taibliblan wenya hendep we wal walas zeban bul sun dep asa ap nul sonendak. Dekam zebe hi alpnak aumwa hap boklena kom lak, dekon zebe Biansa en soneblak.
⁶ Aumwa hap kime ze enaka babang labik, ee ki zebe hendep buluk sesek gwesek. Zen hen dekam zep gol san dep lwan dahak.
⁷ Ëe kime dekon sek gwek, dekam zebe ena Tolemais yaing gwek. Zao kime Yesussu de taibliblan wenya ban enaka tame labik, ki zep asa gol san dep kwang nulidahak. Orapna aha-en zebe ze truwek.
⁸ Kaꞌankam kime kon sek gwek, dekam zebe Kaesareak yaing gwek. Zao Pilipus mo golak zebe lowehek. Pilipus in, zen Yesus hup de ol dawemsa de tawa ta gwibin zi. Zen ahana– Yerusalemk mensa tuju enkam Kristen zi mo tahasa de tri so gwizimdin hip dam dasibikke.
⁹ Wenam sei-siwir zem dan-ner dan-nerkam. Hwena Alap mo Enhona mes zebe mae hap sosonna golzimki– hamal hap de olsa dikim ayang gul gwizimdin hip denaye.
¹⁰ Zao kime lowe heꞌak, ki zep Yerusalem mo lang nakon zini hata zaka, bosena Agabus. Zebe hap hen Alap mo Enhona mes sosonna golblaka– hamal hap de olsa dikim ayang gul gwizimdin hip dena.
¹¹ Zen ki zep Paulus hun asa golek de so zaka, ki zep Paulus mo takna golka, dekam zep zere mo taha-tanana tahalebirki. Ki zep asa gubiridaka, “Alap mo Enhona man gunda, ‘Tak bina ansa kirekam sa Yerusalemk de Yahudi zini dahaler, ki sa Yahudi srem zi hip tapbla dazim.’”
¹² Kirekam kime asalblak, ee ki zebe zewe de zi niban Paulussu en gweblaꞌak, “Bahem Yerusalem san song gwen.”
¹³ Hwena zen man asa ding gulzimki, “Em ba habe nwe go-hokam ano enlalana ap dowe hanan lablaꞌan? Ëe tahalen en hap home hohle gweꞌan, hwena Bian Yesus mo bose hap de Yerusalemk tin hibe hen hohle gweꞌan.”
¹⁴ Ëe kime anakan tame uk, “Nen molye zeno enlalana wet yasiblik,” dekam zebe eguk, “Dikire Bian Alap mo dwam gwibin sin lwak.”
¹⁵ Ki zebe eototo gwek, hendep ki zebe Yerusalem san sek gwek.
¹⁶ Kaesarea kore Kristen zini hen man asa ang neibiridak, hendep Manason mo golak yaing gwek– men zebon de lowehen hap ekalang gwekke. Manason in Siprus wal. Zen men zen nonol tanganna Yesussu daibliblakke, zeno mae mo ahana.
¹⁷ Yerusalemk kime yaing gwek, zewe Yesussu de taibliblan zini dawemkam asa lup nulink.
¹⁸ Kaꞌankam ki zep Paulus asa Yakobus osan dep golesek gweka. Zewe dekam mes hen Kristen zi mo nol-nola tagal gwesik.
¹⁹ Zewe kim Paulus dawemkam golegaing gweka, dekam zep kitak aisil gwibiridaka– mensa Yahudi srem zi mo lang san de ten dannak Alap zeno syala soson gul gweblakaye.
²⁰ Kim esane gweꞌak, dekam zep Alap mo bosena teip nulsuk gweblaꞌak. Ki zep Paulussu nenblak, “Aya Bak, ena mese tame gulku: Yahudi zini hen mes ribu-ribukam Yesussu daibliblak, hen zen nama Musa mo titi tabin ol san enlala zon tasinkim ang ta gweꞌan.
²¹ Hwena angkam zen mes boton ola anakan esak, ‘Paulus zen Yahudi zini, men zen Yahudi srem zi mo lang san lowe henda gweꞌan, desa anakan tawa ta gwibiꞌira, “Musa mo titi tabin olsa emki tapbla gun.”’ Hen anakan mes eno tawa tabinni esak, ‘Walas tane-ne mo to mipna bahem blom tasik gwibin, hen Yahudi mo epba lowe hensa emki baes gwibin.’
²² Zep nen banakan esa ebe hap dena syal eibir? Sap zen sa anakan esal, ‘Paulus angkam mes hata zala.’
²³ Ano mae mo ol san emki ang gwen– zeno mae mo enlalasa dikim se ta sonezimdin hipye. Abon mae onakon zini dan-ner dan-nerkam. Zen mes ki Alapsa anakan nen gubluk, ‘Ëe kirekam de syalsae eno bose hap oꞌan.’ Syala desa zen hen mes su nul sonek.
²⁴ Emki deban mae Alap mo gol san golesek gwen. Ere mo te-alakam emki desa hen mas gwibiridan. Zao Alap mo golak emki te-alana insa ing ta sonen– Alap hap de syal sul sonen hap de te-alana insaye, ere hap hen zebe mae hap. Kire hwena emsa hokam hle dabiridak, ki nola zitalansibir. Zen dekam sa tingare zini anakan emsa tame dal, ‘In man ki ahap neblak. Paulus an nama Musa mo titi tabin ol san ang gwe-gwenda.’
²⁵ Hwena ena tawana: Nen mese Yahudi srem Kristen zi hip suratna ale ulzimk– dekam de yang tabin dowal hap de otweran blom tabir-zimdinsi baes tan hap denaye, hen otweran kal otdebinsi, hen hole naka de blwap-blwap tan tweran ninsi de twin gwibinsi, hen kahalo-kahalosa.”
²⁶ Kaꞌankam ki zep Paulus Alap mo gol san golesek gweka, dekam zep Alap mo golak de syal gwe-gwen zi ahanik hokam hle tabiridaka. Ki zep zao ahakore zewe de syal tan zisi gubiridaka, “Ano mae mo Alapsa de golek de tan hap de mingguna yaklana dekam sa tap gwer. Dekam asa otweranna zilup gul halzal– em de Alap hap desa tru ta seblan hapye.”
²⁷ Mingguna in mo yaklana kim tap gwen hap golek de gweꞌak, dekam zep Asia kore Yahudi zi Paulussu Alap mo golak hla daꞌak. Zen zep ze hendep irik dasizik, hen tingare zi trana in mo enlalasa anakare olkam ben dyasizimk,
²⁸ “Israelk de zi, zini ansa nen karek tan! Zini an zen tingare lang san anakan yasik tabirida gwenda, ‘Musa mo titi tabin ol san bahem ang tan. Yahudi zi mo lowe henna zen karekna, hen Yerusalemk de Alap mo gola in waba hap.’ Zen hen mes Alap mo gol dawemna ansa kun gulku– Yahudi srem Yunani kore zini kim golebiti gwe zakake.”
²⁹ Zen kun gun hup dena in mae hap ki eguk: Sap zen mes zen hla dak– Efesus walya Trofimus Bak han de ena iwe le naserannak. Zep kil dik, “Zen mes Alap mo golak awe zertil zika.” Hwena sap hom.
³⁰ Dekam zep hendep Yerusalemk de zini kitak eilman gwe song gwek. Zini dekam zep beyakam ehlu-hluk gwezak. Dekam zep hendep Paulussu Alap mo gola in kon il dihak. Lilikinni ki zep nasohlasik.
³¹ Tan hap kim sap nemeꞌak, ki zep hwena ola nabakam Roma mo jana nabare zi mo mamnak anakan nol hatak, “Tingare ena awe de zini man eilman gweꞌan!”
³² Dekam zep nabakam zere mo irgwa taha nakore naban golehlu-hluk gwe zaka– ahakon bose nabarena, hen sap kire srem wenya ban. Zi trana in kim hla nulida guk, dekam zep Paulussu tangolenna nerzausuk.
³³ Jana nabare nik mo mamna in dekam zep zere mo jana nabare zini insa gubiridaka– Paulussu de besi dokotkam eihya-taha eihya-tahakam darak tablan hap. Ki zep hwena zini insa takensibiridaka, “Zini an nara? Banakan karek gwera?”
³⁴ Zi trana in hwena ahakon sren jal olkam ding nulblik. Ahakon hen sren ding nulblik. Sap kirekam de eilman gwennak bejen eiwa dena dam gulsun, in zep jana nabare zini in mo mamna Paulussu de zere mae mo gol san zerhan hap gubiridaka.
³⁵ Tembokkam de blaberak kim nerhatak, zao zep men zen tan hap soson neblaꞌak deban mae engiltitik gweꞌak, hendep zao zep tan hap alp dasiꞌik. Hwena jana nabare zini in zep gulk kon nabakam neir inehak.
³⁶ Zi trana in zen sap tan hap dera nebla haꞌanzak, dekam zep enop-nop gwe seꞌak, “In em tan! Bahem ze lam tan!”
³⁷ Gol mwanak de zertin hip kim nergolek de gweꞌak, Paulus ki zep mam zini insa Yunani olkam gubluka, “Ëe wehe eban ola lonꞌak?” Ki zep ding gulbluka, “Em hare Yunani ola tawa nakake!
³⁸ Em san ki Mesir walya insa hom yap? – men zen ner hom goleilman gwenkam empat ribukam de zini sasa lang san dep goleheya-hya gwekake.”
³⁹ Ki zep ding gulbluka, “Ëe sap Yahudi wal. Hwena ano auyan-azana e yala Tarsus sun al tak. Zep ee hen Roma mo propinsina Kilikia wal. Ëe wehe ere kore naka tonbiridaꞌak?”
⁴⁰ Ki zep ding gulbluka, “Sap esa.” Paulus ki zep tembokkam de blabera in kon dekam de balk tasin hip tahakam akabiridaka, ki zep hwena Ibrani olkam tonbiridaka,