¹ Apolos kim nama Korintusk gweꞌanka, Paulus dekam zep Prigia mo langna tamun song gweka, ki zep hendep Efesusk hataka. Zao zep Apolos mo kim de Yohanis Swe mo olsa taiblibin zini goletoweka.
² Ki zep ze takensibiridaka, “Em kime eei gwek, emsa wehe Alap mo Enhona ing gwe hebiridaka?” Ki zep ding nulblik, “Hom. Ëe home anakan esak, ‘Alap mo Enhona ki.’”
³ Ki zep etan takensibiridaka, “Em banakare baptis sine ang tak?” Ki zep ding nulblik, “Ëe Yohanis mo baptis tabin sine ang tak.”
⁴ Dekam zep gubiridaka, “Baptis ta gwibin zini Yohanis, zen mae hap baptis ta gwibirki: Zi dikim Alap hap zenaka anakan goletre gweblan hap, ‘Ëe ama angkam haleꞌan.’ Zen dekam man hen gubirida gweka, ‘In Zen asa zertroꞌan zala, em Desa taibliblan.’ Desa de zertrozan Zini mes hata zaka. Zeno bosena Yesus.”
⁵ Kirekam kim nasalblak, dekam zep Bian Yesus mo bosekam de etan baptis tabin hip abe dak.
⁶ Paulus kim baptis tabin hyanak tahana tehabirida ineka, dekam zep Alap mo Enhona ing gwe hebiridaka, dekam zep hen owas hap zere mae mo tame gun srem ola donbiꞌik, hen Alap mo Enho nakore hamal hap de ola donbiꞌik.
⁷ Zini in tingan san ha dua-blas enkam mes yap.
⁸ Paulus zao dan-ahare benkam gweka, dekam Yahudi mo but srem golak til gweka. Zao zep udobe naban Alap mo epba ola kore naka klis gul gwizimki– anakan dikim titi tabin hip, “Em de Yesussu taibliblankam, zen dekam esa Alap mo irik ginnik biti gwer.”
⁹ Hwena ahakon man enol drak-drak gwek, hen Yesussu de taibliblan hap man baes tak. Hen Yesus hup de ol dawemna insa man damnak lamang nul gwek. Paulus dekam zep, men zen Yesussu daibliblak, desa en hlilin halka. Balai desa makare gola, bosena Tiranus, zao zep hwena mwin-mwan enkam golebiti gwe-gweka. Zao zep apdekam ola ziklis gul gweka.
¹⁰ Kirekam de golelowehe gwennak hendep tahunna dan-dan damank, hendep propinsi Asiak dena ol dawemna insa kitak man esaladak– sap Yahudi zi, hen sap Yunani zi.
¹¹ Alap serkam de owas-owassa Paulus mo taha san de aren zankam gol gwizimki.
¹² Da so gwen kaenna ahaksa kaen hak maena, Paulus kim desa sapꞌnen towanblanda gweka, desa kim zi sang-sangnak de lonebla inen hap kap dahal gwek, dekam zep edawem gwe-gwek. Hen dowal mo tilblin maena, dekam zep dowala in wet so gwe-gwek.
¹³ Hwena Yesussu de taibliblan srem Yahudi zini dekam zep sap hen dowal-dowalsa de Bian Yesus mo bosekam golealsa sone gwen hap ealp gwe-gwek. Zen man dowal-dowala insa anakan nenbirida gwek, “Paulus men zeno bosekam tonbirida gweꞌarake, Yesus, zeno bosekame emsa enblaꞌan: Em zini an kon wet son.”
¹⁴ Men zen kirekam egwe gweꞌak, zen Yahudi zi mo aha mam nik mo walas tuju enkam. Mam zini in mo bosena Skewa Bak. Zen hen Yerusalemk de Alap mo golak de syal ta gwen zi mo aha mamna.
¹⁵ Hwena dowal de tilblin zisi zep ahanaka etan nakasibliꞌak, hwena zebon de dowala in man ding gulzimki, “Ëe Yesus ne Paulus neka kie tame osoꞌan. Hwena em an enda korena?”
¹⁶ Zini men desa tilblika hetyak gwesik kinzinkam zep tahyo zaka, zao zep tangolebirki, hendep man irkare tabirki. Dekam zep gola in kon irkan wei-wei naban heya-hya gwek.
¹⁷ Efesusk de lowehe gwen wenya kim esak, sap Yahudi zi, sap hen Yunani zi, dekam tangan zep dawemkam eairik. Dekam Bian Yesus mo bosena man tangan blikip neisibik.
¹⁸ Men zen Yesussu daibliblak, dekam zep tame nuk, “O ee namae ol karekna lam gul gweꞌan. Ëe anik kira-kla gwek.” Dekam zep zi beya mo nwenak zere mae mo karek-karekna ekira-kla gwek.
¹⁹ Hen beyana men zen ol kareksa syal nei gwibik, dekam zep ol karek nabare ol tatakna kap da halzak. Zao zep tingare zi mo nwenak tru dasik. Ol tatakna insa kap da halzak, te-alakam de lirak tabinkim, dua meliarak maka hatak.
²⁰ Kirekam zep ki hendep Bian hap de ol dawemna insa esek nul haladak, hen sosonna Alap mam gul gwizimki.
²¹ Hyanak kim Paulus Yerusalem san de song gwen hap kalang gweka, zen man enlala gweka, “Makedonia hen Akaya mo lang san asa amjanbir.” Man gu gweka, “Yerusalem kon asa Roma san dep song gwer.”
²² Ki zep zere mo taha tri soblan zi darena, Timotius ne Erastus neka guzimki, “Ëe an kim Asiak awe nama gweꞌan, em Makedonia san em song en– zewe de Kristen zisi de mas eibirida gwen hap.” Ki zep hendep song eka.
²³ In kim lwa seꞌak, dekam zep zini men zen Yesus hup de ol dawem san de ang tan hap baes tak Efesusk eilman gwek.
²⁴ Sap zewe de zini yang gulsun we dowal bosena Artimiꞌi betek nei gwibirin. Efesusk zebe hap de gol yala hen ki. Zao de zini Artimis mo nwe-masekam dowal bete-teksa yang da gwibirin, hen gol bete-teksa syal neblanda gwenan– zao de dowal betekna insa zaun ta gwibin hip. Men zen desa syal neblanda gwenan, te-alana mamkam nulin gwenan. Perak nakon de yang ta gwibin syala iwe de aha mamna, bosena Demitrius.
²⁵ Zen dekam zep men zen kire-kirena dowala in hap syal neblanda gwenan, desa tagam gulsuku. Zao zep gubiridaka, “Wal bose wal, Artimis Bak hap de syala an nen dwan dekon am te-alana mamkam ulin gwenan.
²⁶ Hwena angkam, ena hen mese asalblak hen hla lak– zi bosena Paulussu. Zen man tawa ta gwibiꞌira, ‘Zi mo yang tabin alapna, zen eiwa de alapsa hom.’ Hendep kirekam de tawa ta gwibinkim, nebon mae onakon mes mamkam hlilin halka. Awe de en naka hom kirekam hlil inꞌira, hwena tingare Asia mo langnak denaka.
²⁷ Zen de kirekam kitak sul soneꞌanka, neno mae mo syala an dekam sa gutu gwer. Dekam hen Artimis Bak mo gol yawala ansa anakan sa enlala neblal, ‘An boton alap mo gol.’ Hwena angkam sap teipsin alapna Artimissi man betek nei gwibiꞌin– tingare Asia mo langnak de zini hen tingare okamanak de zi niye. Hwena zini in mo tawa tabin nikon, zeno bose dawemsa kim karek guꞌura.”
²⁸ Kirekam de torannak kim sane daꞌak, dekam zep serkam ejal gwek. Dekam zep ol mamkam etaken gweꞌak, “Neno mae mo alapna Artimis zen teipsin tanganna!”
²⁹ Dekam zep hendep ena iwe de zini kitak eilman gwek. Gayus ne Aristarkus neka dekam zep balk nosok– men zen Makedonia kon Paulussu ang ebla zakaye. Ki zep hendep ena iwe de tagal gwe-gwen gol yawal san dep apdekam hlu-hluk gwenkam il nosohak.
³⁰ Paulus zi tra mo nwenak de tonbiridan hap sap dwam gweꞌanka, hwena Yesussu de taibliblan wenyik jalse ne gweblaꞌak, “Bahem! Emsa sa ze dal.”
³¹ Langna iwe de teipsin-teipsin zini, ahakon mes Paulus hun nerdokot gwek. In zep hen nen soneblak, “Ëe ama emsa en soneblaꞌan: Em bahem etagal gwe-gwen gola iwe hatan.”
³² Ahakon tame gun sremkam ol ekwahen san enkam hlu-hluk gwe-gweꞌanzak. Ahakon aha jal hil gin hip enop-nop gweꞌak, hen eihya nakon aha jal hil gin hip enop-nop gweꞌak. Hendep zi beyana in zao hom zenaka tame nuk, “Ëe an kire habe tagam gwer.”
³³ Yahudi zini man ze hen edurum gwe hezak. Zen dekam zep zeno mae mo mamna Aleksander Baksa ngein sin neblak. Dekam zep zi tra ngirin nikon ahakore nik daken gweblaꞌak. San ha anakan mes yap daken gweblaꞌak, “Emki anakan gubiridan, ‘Bahem Yahudi zini asa jal gwibiridan. Diki Paulussu em karek tan– hendep zebon de ang ta gwen wenya ban!’” Dekam zep sap tahakam dekam de balk tasin hip akabiridaka.
³⁴ Hwena zen hom ola gubiridaka, sap zewe de zini mes anakan tame daꞌak, “An Artimiꞌi de betek gwibin zisi hom. An Yahudi wal!” Dekam zep apde ennak ol mamkam etaken gweꞌak, “Neno mae mo alapna Artimis, zen teipsin tanganna! Neno mae mo alapna Artimis zen teipsin tanganna!” Kirekam de etaken gwennak hendep yakla nwena dan-dan damank.
³⁵ Ëna iwe de teipsinni ahana dekam zep luweka, ki zep tahakam dekam de balk tasin hip akabiridaka. Ki zep ze gubiridaka, “Efesusk de zi, em ba habe kirekam eena tal? Sap tingare okamanak de zini mes anakan tame nuk, ‘Efesusk de zini, zen teipsin alapna Artimiꞌi zao gol yawalak kara nul gwenan– Artimis mo nwe-mase nabare kasona men zao ngli nakon zan zakye.’
³⁶ Kirekam dena zini bejen anakan gulsun, ‘In boton.’ Zep kirekam de lwanna, em ba habe eilman gwe song gwer? Zep bahem banakare maena jala ban syal gwibin.
³⁷ Zini an em waba tol habe balk oso halzal. Zen hom neno mae mo alap mo golak banakare maena sowekam olka, hen hom mae lamang ulki.
³⁸ Demitrius Bak de syal bose zeban zisi jal gwibiridanna, zen kiresa de tap gun hup de zini kike– mensa Romak de teipsinni nebe mae hap dam tasibir-zimki, zeno mae mo nwenak de taken-taken gwibirida gwen hapye. Zen zao emaka olsong gweꞌan.
³⁹ Aha jal mae de nama lwazimdinni, zen diki neno mae mo nolik de nesa tagam gunkum bap– zao de tap gulsun hupye.
⁴⁰ Sap an zen ki namen jower, jana nabare zini maka nesa anakare hap karek dabiꞌin, ‘Em ba habe kirekam eilman gwer?’ Hwena zen de nesa takensibiridankam, molye anakan ding ulinam, ‘Ëe kire habe eilman gwer.’”
⁴¹ Kirekam kim tonbiridaka, ki zep sekwak gwen hap gubiridaka. Dekam zep hendep sekwak gwek.