¹ Zao kim lwa seꞌak, dekam zep teipsin zini Herodes zere mo jana nabare zini Kristen zisi de tahyon hap gubiridaka– zao de karek tabin hip.
² Zao zep hen Yohanis mo ayana Yakobus mo nolsa de nebokkam blaonsublun hap gubiridaka.
³ Zen kim anakan hlauludaka, “Yahudi zini man tangan esam gwesil– desa de tankamye,” dekam zep etan Petrussu de balk tan hap gubiridaka. Zen yakla yawala Paska golek denak balk dak.
⁴ Bwinak zep tak daink. Hen Herodes man jana nabare zini enam-blas enkam zen de kara ta gwen hap gubiridaka. Sap zen man kalang gweblaꞌanka, “Paska hyanak asa zi tra mo nwenak taken-taken gweblal.”
⁵ Hwena Petrus in kim bwinak gweꞌanka, hwena Kristen zini dekam zep enlala zon tasiblin naban Alapsa zebe hap abe da gweꞌak.
⁶ Yaklana in dekam de taken-taken gweblan hap Herodes dwam gweblaꞌanka, zeno kam Petrus man jana zi dare mo ngirinnik nisi taꞌanka– besi dokotkam de da tablandan nik. Eihya topna aha jana nabare zinik bu nulsuk, aha topna aha jana nabare zinik. Lilikinni ahakore nik kara nosoꞌak.
⁷ Mumuk ennak zep bwina iwe Alap mo dam taha nakore zini jowe zaka, hen ngatanna dekam zep ze zilsik. Ki zep Petrussu li tan hap zaba nakon towanbla ine zaka. Ki zep ze gubluka, “Nabakam luwe!” Dekam zep hendep Petrus mo taha nakon besikam de dokotna in som nebla hanak.
⁸ Etan ki zep gubluka, “Bajuna dekam ala so, hen sepatuna.” Ki zep ala soka. Ki zep etan gubluka, “Tahan bajuna dekam hen ala so. Dekam asa ang gwebla.”
⁹ Ki zep kon zerwet soka. Petrus hwena man tim gulku, “Eisirsie ki tanan. Eiwakam home wet sonan.”
¹⁰ Nonol lilikin kara son wenya kim ulmun nuraka, etan zao de wenya ulmun nuraka, ki zep besikam de aumwa lilikin yawalak aptaka. Hwena zen zen totoresa kitak kles neisik. Desan zep wet osoka. Bwina in kon kim engka en langa eisiki, zao zep Alap mo dam taha nakore zini in aya gweka.
¹¹ Petrus dekam zep tame gulku, “Hare ee eiwakam am-am wet sonan. Hare Bian eiwa am zere mo dam taha nakore zisi zer sonera– asa de Herodes mo jana ngi ben-ben nakon hen Yahudi zi mo jala kon zeser sonen hapye.”
¹² Kirekam kim tame gulku, ki zep Yohanis mo anena Maria mo gol san dep song gweka. Yohanis in zeno aha bosena Markus. Zao zini mes beyakam Alapsa dekon abe tan hap etagal gwek.
¹³ Ë nakore lilikinsi zep gaꞌga soꞌan zaka. Zewe de babu gwe-gwen wenya bosena Rode, zen zep te sozak.
¹⁴ Hwena zao kim Petrus mo ola tame gulzuk, dekam zep isrip-sri hap lilikin talusun sremkam lwahak– dekam de gubiridan hap, “Petrus lilikinnik zauꞌun ora!”
¹⁵ Hwena man ding nulbik, “Em san ema mamak gweꞌara?” Hwena ol drakkam kim gubirida gweꞌak, dekam zep ding nulbik, “In desa de kara ta gwen hap de Alap mo dam taha nakore zisi mes yap.”
¹⁶ Hwena Petrus nama ki gaꞌga so tineka. Hendep kim talusublunkam hla dak, zao zep serkam denggwanblaꞌak.
¹⁷ Petrus dekam zep tahakam anakare hap akabiridaka, “Em balk tasin.” Ki zep ze aisil gwibiridaꞌanka– men kirekam Bian zerwet sokake. Ki zep hen gubiridaka, “Ola an Yakobuꞌu enblak, hen nere mae mo Kristen aya-wal oso-walya enbiridak.” Zena ki zep kon aha e san dep song gweka.
¹⁸ Kaknak zep Petrus hup de jal hap bwinak de jana nabare zini in zenaka nol kiniꞌak.
¹⁹ Herodes dekam zep aha jana nabare zini gubiridaka, “Dawem enkam leblak.” Hwena hom hla dak. Dekam zep jana nabare zini in zen kara daꞌak, desa taken-taken gwibiridaka, “Zen banakan de wet son hap? An ene eser soner.” Dekam zep aha jana nabare zisi gubiridaka– Petrussu de kara tan wenya insa de tameran hap. Herodes zena ki zep Yerusalem mo lang nakon Kaesarea san dep song gweka– zao de hwena gwe inendan hap.
²⁰ Dekam ena Tirusk de zi niban hen Sidonk de zi niban Herodes man golegil-gil gwe-gweꞌanka. Dekam zep zini in Herodes han dikim etan zersesek gwen hap ola aha-en nuk. Sap zebe mae hap de tembanena Herodes mo irik gin lang nakon wet so gwizimki. Zen dekam hen Kaesarea san sek gwek, zewe zep Herodes mo taha tri soblan zini Blastus Bak hap te-alasa nerblak. Zen zep gubiridaka, “Ëe asa emsa mas gwibiridal.” Dekam zep ze Herodes han dikim etan zergolek de gwen hap eabe gwek.
²¹ Yaklana dekam de zergolek de gwen hap denak kim hatak, Herodes dekam zep teipsin zi hip de bajusa ala soka, hen teipsin zi hip de komal tumnak nikinki. Dekon zep zi trana insa aisil gwibiridaka.
²² Dekam zep Herodes mo bosesa de teip gulsublun hap etaken gweꞌak, “An zi mo olsa home esane gweꞌan! An aha alap mo ol!”
²³ Hwena mumuk ennak zep ze Herodeꞌa Alap mo dam taha nakore zi ta zaka, sap zen hom Alapsa blikip gwesiblika. Diki anakan maka sane tabinkim gubiridaka, “Ëe an ahana alapsa hom.” In zep ungala nakon auhuna dwenblak, zep hendep tilki.
²⁴ Alap onakore engaya gwen hap de ol dawemna dekam zep esek nul kini song gweꞌak.
²⁵ Barnabas ne Saulus ne kim Antiokia kore te-ala zer sonenna insa Yerusalemk eirzimki, zena ki zep etan ola halka. Yohanis, zeno aha bosena Markus, dekon zep ang gwizimki.