¹ Seblas enkam de Petrus mo wal bose walya hen Yerusalem mo langnak de Yesussu taibliblan wenya ki zep anakan esak, “Yahudi srem zini mes hen Alap onakore ol dawemna nulink.”
² Zep Petrus kim Yerusalemk zaheka, dekam zep zao de Yesussu taibliblan wenya anakan jakal neblak,
³ “Em ba habe Yahudi srem zi mo gol san song gweka hen goletembane taka?”
⁴ Petrus dekam zep nonola kon hendep dawem enkam anakan srip gulsuzimki,
⁵ “Ëe ena Yope kon Alapsa gu soneblaꞌak, dekam zep ze hwena nwena ap lirisin neblak. Deyol yawal makare nakae hlauk, ngli nakon sring nil soneꞌanzak, hendep abon onak zep zausuzuk.
⁶ Kime ze olk san karatda guꞌuk, zao zebe hlauludak– kirekam-kirekam golsriwen otweranna, eik nik dena, bik dankam de il gwehal gwenkam dena, hen mawa maena.
⁷ Ki zebe ola salsek, ‘Petrus, em luwen. Emki tameran, desa twenblanda.’
⁸ “Hwena ee ama ding guk, ‘Ëe bejene, Bian! Ëe home mae golsriwen kire-kire kun nabarena twinbik.’
⁹ “Ki zep ngli nakore ola in asa etan ding gulbluka, ‘Mensa Bian ngan tasibirki, desa bahem gubin, “Kun naban.”’
¹⁰ Hendep ama dan-ahan sok– kirekam de hlaul gwen naye. Ki zep etan bai nil inehak.
¹¹ “Hendep dekam zep Kaesarea kore lup gul sonen zi dan-aharena abon yaing gwezak.
¹² Alap mo Enhona dekam zep asa gubluka, ‘Bahem ang gwibiridan hap enlalana beya gwen.’ Zini an zen hen enamkam teinikinꞌin, zen hen man asa ang neblak, hen gola iwe man hen biti gwek.
¹³ Dekam zep Yahudi srem zini in asa gubiridaka, ‘Alap mo dam taha nakore zini gola awe jowe zaka, ki zep asa gubluka, “Emki Yope san dep zisi lup gul sonen– zi bosena Simonsa de kwang tan hap. Zeno aha bosena hen Petrus.
¹⁴ Zen zen sa ebe mae hap ola ayang gulzimdi– ena hen tingare ere mo golak de wenya kipye. Desa kime laiblibiꞌik, zen dekam esa golengaya gwera.”’
¹⁵ Zen kirekam asa gubiridaka. Dekam kime ol dawemkam de tonbiridankam kon gwesibirida hanaꞌak, Alap mo Enhona ki zep hendep ing gwe hebirida zaka– men kirekam nonolak nenaka hen ing gwe hebiridakake.
¹⁶ Dekam zebe enlala gwek– Bian Yesus men desa anakan gu-gubirida gwekaye, ‘Yohanis zen hokam baptis ta gwibirki, hwena Alap zere mo Enhokam sa emsa baptis ta gwibiri.’
¹⁷ Zep Alap man dekam zere mo Enhosa hle ta sonezimki– men kirekam hen nebe mae hap hle ta sonezimkike, nen in kim nonol Bian Yesussu laibliblakke. Zep ee banakan de Alapsa anakan jalse gweblan hap, ‘Zebe mae hap bahem hle ta sonezimdin!’”
¹⁸ Kirekam kim sane daꞌak, dekam zep jakal gweblanna in tap gwizimk. Dekam zep hwena Alap mo bosena anakan teip nulsubluꞌak, “Hare eiwake! Sap Yahudi srem zi, Em hen zebe mae hap mese golzimki– dekam de ehalen hap hen engaya gwen hap denaye.”
¹⁹ In kim Yesussu de taibliblan wenya Stepanuꞌu de tan hyanak karek da gwibik, dekam zep heya-hya gwendak– ahakon langna Penisia san, ahakon lang tekna Siprus sun, hen ahakon ena Antiokia san. Zen ol dawemsa kim hendep nol haladak– hwena Yahudi zi en hap.
²⁰ Hwena ahakon hen Siprus hen Kirene kore zi. Zen kim Antiokiak yaing gwek, dekam zep Yahudi srem zini hen Bian Yesus hup de ol dawemna insa donbiridaꞌak.
²¹ Dekam Alap mo sosonna zebon mae lwa gweꞌak, zep zeno mae mo tawa tabin nikon zini beya tangankam zere mae mo boton alap-alapsa hli nulidak– dekam de hwena Bian Yesussu taibliblan hap.
²² Yesussu de taibliblan wenya kim Yerusalem kon kirekam esak, dekam zep Barnabaꞌa Antiokia san dep ner sonek.
²³ Zen kim ze hataka, anakan zep hlauluda zaka, “Eiwa, Alap mo kwasang-kwasangna zebon mae onak dawemkam lwaꞌan.” Dekam man tangan isrip-sri gwibiridaka, zep hen ol zim-zimni anakan golzimki, “Em tingare enho naban Bian Yesus onak tatem ezauk gwen.”
²⁴ Barnabas zen zini dawem tanganna. Alap mo Enhona mes desa serkam bi gweblaka, hen zen Bian Yesussu mes tangan taibliblaka. In zep, zen kim titi ta gwibirki, beyakam etan Yesussu daibli gweblak.
²⁵ Dekon ki zep etan Tarsus sun song gweka– Saulussu de ze teblan hap.
²⁶ Zao kim gaing eka, dekam zep Antiokia san dep kwang tahal zaka. Zewe aha-ere tahunkam zep Alap mo olkam de tawa la gwibin hip oletagal gwenda gweka. Dekam zep Kristussu de taibliblankam serkam ebeya gwek. Hendep dekam zep Antiokiak de taibliblan srem wenya taibliblan wenya insa “Kristen zi”kim bose dabik. Menkam hom kirekam nenbirida gwek.
²⁷ Zao kim lwa seꞌak, dekam zep Alap mo Enho nakore ol ayang gul gwen hap de zini Yerusalem kon Antiokiak yaing gwezak.
²⁸ Ahana bosena Agabus Bak. Zebon dekam zep Alap mo Enhona ngein sin dep de ola ing gul soneblaka. Dekam zep luweka, desa zep anakan ayang gulzimki, “Tingare Roma mo irik ginnik sa usak yawala hatal.” Hendep kirekam zep ki lwak– in kim Klaudius Bak Romasa irik gilkiye.
²⁹ Hwena Antiokiak de Kristen zini in kim kirekam nasalblak, dekam zep ola aha-en nuk– Yerusalem mo langnak de Kristen bose zikhip de te-alasa tagal ta gwizimdin hipye. Anakan aha-en nuk, “Men nara te-alasa beyakam gulin gwenna, zen beyakam ing ul gwek. Betekkam de gulin gwenna, zen betekkam ing ul gwek.”
³⁰ Hendep kim sowe heka, dekam zep Barnabas ne Saulus nebon onak neir sonezimk. Zen zep hwena Yerusalem mo langnak de Kristen zi mo nol-nol hap eirzimki.