¹ Nonol ol ziaha-en gunnu in, zeno syala, desa kitak Musa Bak Swe ale gulzimki– kire enkam de Alapsa blikip gwesik gweblan hap denaye. Zen zi mo tahakam de Alap hap de syal gwibir-blin tenda golak kirekam syal nei gwibik.
² Alap hap de tenda gola in teksonna dan-dan. Ngein sin de teksonna, desa man nen gwibik, “Alap hap dena.” Zao zep Alap hap de pelitana nonne gwek– zeno ngatan hap de hli-hlina tuju enkam. Zao hen mejana ki nola gwek– men zao Alap hap de rotina non nebla ine gwekke.
³ Dekon tahan san de teksonna, zeno lilikinni deyol glaing-gling yawalsa ze il nil sone gwek. Teksonna desa man nen gwibik, “Alap zere en tangan hap dena.”
⁴ Zewe emaskam de kalsna hen ki– men zewe irase dawem nabare te kili tru dasik gwek. Alap mo zi niban de ol ziaha-en gun petina hen zewe nonne gwek. Zen tekam de syal gwibinni, hwena emaskam ze ma-makan dabik– hendep kitak. Petina in mo olk, zewe emaskam de botola ki– men zewe orep de tembanena mannana biti dakke, tembanena mensa Alap Israel hap Mesir kon de sek gwe zannak owaskam gol gwizimkike. Harun Bak mo dutena hen zewe– men zen owaskam mas gwekke. Kaso hlang darena, men zewe Alap Musa Bak hap dare taha-tapkam de titi tabin ola insa ale gulbluka, zen hen zewe nola gwek.
⁵ Petina insa dikim mat gulsun hup dena, zen emas enkam syal neibik. Hen zewe emaskam de syal gwizimdin Alap mo dam taha nakore zi makare daresa zaun noso inek– si ala er sosuzimdin nika. Zeno nik mo si alana petina insa kim tahan nakon il-il soneka, sap zen man peti mat gulsunnu insa enlala nei gwibik, “Sapi-kambing kal de zewe lwankam, zen dekam Alap neno mae mo karek-karekna tap gulsuk gwizimnira, hen Alap nesa dekon golelowehe gweꞌara.” Hwena desa de tingan srip gulsun hup, ki sa tangan blal gwer.
⁶ Alap hap de tenda gola insa kim syal gwibinkim su nul sonek, dekam zep Alap hap de kire-kirena insa kang dazak. Zen dekam zep hen nonol teksonna iwe Alap mo golak de syal tan zini, sap bose bete-tek wenya, biti gwe-gwezak– Musa mo titi tabin ola insa dikim syal gwe-gwibin hipye.
⁷ Hwena tahan san de teksonnak, zewe Alap mo golak de teipsin tangan en nik til gweka. Aha-ere tahunkam aha-rokꞌnen ze til gweka. Hwena zen hen sapi-kambing kal sremkam bejen zao tin. Kala in desa Alap hap goltre gweblaka, nonol zere mo kareksa dikim ngan gulsublun hap denaka goltre gweblaka, zao hwena tingare Israel zi mo karek-kareksa dikim ngan gulsuzimdin hip denaka– tame gun sremkam mensa syal nei gwibikke.
⁸ Zen in zep dekam Alap mo Enhona anakan goltreizimki, “Tenda gola in de nama lwa gweꞌak, ki totore zini molya Alap zere hon yaing gwe-gwek.”
⁹ Zen zep angkam de wenya nebe mae hap olk san de enlalana anakan lwazimꞌin: Kire-kiresa hen sapi-kambing maesa de Alap hap kap ta gweblanna, zen waba hap. Sap zen bejen zini in mo enhona ngan tasin.
¹⁰ Sap kirekam de syala in, zen tim en hap dena. Enhonak hom hata gwek. Sap syala in dekam anakan nol gwek: kire enkam de tembane tan hap dena, kire enkam de otdebin hip dena, hen kire enkam de timsi ngan gulsun hup dena. Hwena desa Alap etan de zi niban olsa ziaha-en gun srem ennak dep ki golzimki.
¹¹ Zen zep Kristus hata zaka– Alap mo zi niban de ol ziaha-en gun esena insa dikim nebe mae hap syal gwibir-zimdin hip. Hen Zen zere mo syala in kon zep gweꞌara– nebe mae hap de Alap mo golak de teipsinni. Zen kim tin nikon etan ngaya gweka, dekam zep ngatan zi mo langnak de Alap zere hap de tenda golak til halka. Zewe de Alap mo gola in, zen eiwa tangaran wenya zen. Zen zi mo syal gwibin nika hom.
¹² Kristus Zen aha-rokꞌnen tangan tilki– Alap zere en tangan hap de teksonna iweye. In kim tilki, Zen sapi-kambing kalsa hom gol halka. Zen hwena zere mo kal en naban goltilki. Zen dekam zep nesa kitak hendep denaban dowal mo kigi mo irik gin nikon gwiswe soneka– Alap mo hlil irin zinik dikim nesa golebiti gwen hapye. Dekam etan hyanak molya ba maena kire hap goltilki.
¹³ Men zen titi tabin ola insa ngip nul gwenan, desa man enlala neibirida gwenan, “Zen Alap mo nwenak kun naban.” Zep nonol ol ziaha-en gun hup de syala in san kim ang ta gwenan, dekam sapi-kambing kalkam blis dibirida gwenan, ahaksa sapi tru ta seblan sonsa ho naban siri nul gwenan– dekam de blis tibirida gwen hapye. Hwena kirekam kim tim ennak blis dibirida gwenan, dekam zep enlala neibirida gwenan, “Angkam mese Alap mo nwenak ngan lasibirin.”
¹⁴ Hwena angkam karek gol gwen srem Zini Kristus Zen mes Alap mo Enho mo sosonkam Zenaka domba makan zerguku. Zep nen an Kristus zere mo kalkam de blis tibiridan wenya zen. Zep nen an zen tangan– dawemkam de ngan tasibin wenyaye! Sap nesa tim en nakon hom ngan tasibirki. Hwena enho naban hendep nesa ngan tasibirki. Zen in zep nen angkam Ngaya Zini Alapsa esa enho aha-erekam ang e gweblal, sap Zen mes nesa alal gulku– waba hap de syala konye.
¹⁵ Zen in zep Kristus angkam nesa Alap osan dep zon guluda gweꞌara, sap Zen Zen Alap mo zi niban de ol ziaha-en gunnu insa nebe mae hap syal gwibir-zimki. Zep Zen mae hap angkam syal gwe-gweꞌara: Alap mensa kwang guludaka, zen dikim hendep de lowehe gwen hap denaka gul irin hip– mensa Alap Zena gu-gubiridakake. Zen kitak mae hap ki lwaꞌan: Sap Kristus kim tilki, Zen dekam nesa kitak nere mae mo ngip gul gwen nakon gwiswe soneka– nen kim sap nonol ol ziaha-en gun syala insa alp ei gwibikye.
¹⁶ Sap insa Kristus tinkim nebe mae hap syal gwibir-zimki, zen san de zi de tinkim walas zikhip kire-kiresa hli tan dazimdin makan. Zini kim kire hap walas zeban ola niaha-en gul gwenan, zen de nama tin sremnak walas zem in na-en bejen kire-kirena insa lop tan– bi zik de nama gwennakye.
¹⁷ Sap ol ziaha-en gunnu in, zen zen de tinnik de kirekam syal gwibin. Zen de nama gwennak bejen.
¹⁸ Alap mo zi niban de ol ziaha-en gun darena in zep hen kirekam lwaꞌan, zen diki tinkim de kal wet sonnak de syal gwibin. Nonol ol ziaha-en gunnu, zen otweran blom tabir-blin mo kalsa. Hwena angkam de wenya, zen Kristus mo kalkam dena.
¹⁹ Alap mo nonol zi niban de ol ziaha-en gun syala insa kim kon neisibir hanak, zen zep hen kirekam lwak. Dekam Musa Bak man Israelsa tagal gulsuku, zao zep titi tabin ola insa kitak tonbiridaka. Ki zep sapi-kambing kalkam Alap mo titi tabin ola bare bukuna insa blis tibirki, hen Israelsa blis tibiridaka. Zen ho naban kala ban siri gulku– dekam de blis tibiridan hapye, Alap men kirekam gublukake. Daingkling ala makare naka domba ala kal-kalkam huleka, desa zep os gul ine gweka– dekam de blis tibiridan hapye.
²⁰ Zen anakare ola ban blis tibirida gweꞌanka, “Kala an zen Alap mo neban mae de ol ziaha-en gunnu insa eiwa guꞌun– nen dikim desan en ang ta gwen hap.”
²¹ Ki zep hen kala inkam Alap hap de tenda gola insa blis tibirki, hen zewe de kirekam-kirekamna men dekam Alap hap de syala nol gwek, desa kitak blis tiblan daka.
²² Sap epba titi tabin ola insa kim syal nei gwibik, dekam Alap mo golak de syal hap de kolho maena man hen blis diblanda gwek– dekam de Alap mo nwenak engan gwehen hap. Sap kal de wet son sremkam, zi mo karek-karekna bejen ngan gulsuzimdin.
²³ Zep Musa kitak de Alap hap de syal hap de kirekam-kirekamna insa kire hap blis tiblan daka, hwena kire-kirena in sap okama ennak dep dena. Hwena ngatan zi mo langnak de Alap mo golak de kire-kirena, desa bejen sapi-kambing kalkam blis tiblandan. Desa diki Alap zere mo Domba Tane mo kalkam de blis tiblandan. Zep Kristus Zen zi mo Alap hap de gol syal gwibir-blinnak hom tilki– au-au makan men zen lwa gwekke. Zen hwena ngatan zi mo langnak eiwa de tangan wenyak tilki. Zen nama zao gwe gweꞌara– dekon de nesa Bian osan dep mas gwibirida gwen hap.
²⁴ (9:23)
²⁵ Hwena okamanak de Alap mo golak de teipsin zini, zen tahun jamkam aha-rokꞌnen til gwenda– teksonna mensa nen gwibirin, “Alap zere en tangan hap dena.” Zen zere mo kalsa hom goltil gwenda. Zen otweran kalsa. Hwena Kristus hup hom dakastilbliꞌan– etan-etankam de zere mo timsi golgu gwen hapye, dekam de etan-etankam zere mo kalsa Alap mo golak goltil gwen hap.
²⁶ Kirekam de lwananam, ki nonol lonesen nakon maka Kristussu tahun jamkam te-lidak sonnak makan dain gwek. Zen hwena aha-rokꞌnen hata zaka– okamana an mo aumwa hap de yaklana men zen angkam lwa zaheꞌanke, dekam de domba makan de tan hap Zenaka zergun hup, tingare neno mae mo karek-kareksa dikim ngan gulsuzimdin hip.
²⁷ Sap Alap mes tingare zini nesa anakan gubiridaka, “Zen aha-rokꞌnen sa juwe gwer, ki asa hwena klis gul.”
²⁸ Kristus in zep aha-rokꞌnen tilki– dekam de zi trana neno mae mo karek-kareksa wei yun hup. Hwena Zen sa etan lwahal zala. Zen dekam zi mo karek-kareksa de wei yun hup molya hata zaka. Hwena men zen nes gweblaꞌanke, desa dikim hendep de lowehe gwen hap de lang san kwang guludahan hap sa hata zala.