¹ Ëe ansa emsa tawa tabiꞌin, bol-zaun tanganna an zen: Yesus Zen Zen tangan nebe mae hap syal gweꞌara– Alap mo golak de teipsin tangankamye. Zen in zep ngatan zi mo langnak Alap zere mo dam taha nakon nikinꞌira.
² Men zao angkam Zen nebe mae hap syal gwe-gweꞌara, zen Alap zere en hap de tekson tangannak– mensa Alap Zena syal gwibirkike. Zen Israel zi mo Alap hap de gol syal gwibir-blinnak hom syal gweꞌara.
³ Tingare Alap mo golak de syal tan zi mo teipsin-teipsinni, zen kitak kire-kiresa Alap hap nol gweblanan, hen sapi-kambingsi zebe hap tru dasik gweblanan. Zep neno mae mo Alap mo golak de Teipsin Zini Yesus, zeno syala zen hen kirekam nwe-mase gwek.
⁴ Okamanak awe de Zen nama gweꞌanam, Desa hwena molya Alap mo golak de syal gwe-gwen hap dam dasiꞌinam. Sap Lewi Bak mo ausu nakore zini in, men kire enkam Musa mo titi tabin olak lwak, zen nama desa Alap hap nol gweblanan.
⁵ Hwena zen insa syala okamanak nol gwenan, zen au-au makarena. Hwena Kristus insa ngatan zi mo lang nakon syal gwe-gweꞌara, zen eiwa de tanganna zen. Zen in zep, orep kwatapna Sinaik kim Alap Musa hap zere mo ngatan zi mo langnak de gol tanganna zertreblaka, kirekam de hen okamanak syal gwibir-blin hap, Zen anakare ol tan-tanna golblaka, “An kire enkame kwatapnak awe ebe hap goltreblanan, zen kire enkam em hendep sul sonen.”
⁶ Zep mensa au-au makarena Musa mo tan-tan san syal nei gwibirin, hwena angkam eiwa de tangan wenya in desa Yesus ngatan zi mo langnak nebe mae hap syal gwe-gwibir-zimꞌira. Zep Zen insa kirekam syal gwe-gweꞌara, zen man tangan kwei yuludaꞌara– men zen Alap mo okamanak de golak syal ta gwenanye. Sap syala men desa Alap mo nonol ol ziaha-en gun nukon okamanak nol gwenan, zen soson naka hom– zen de zisi Alap osan dep zon guluda gwen hapye. Hwena angkam ansa Alap neban mae ola ziaha-en guꞌura, zen soson tangan wenya zen. Zen in zep Yesus nesa angkam Alap osan dep zon guluda gweꞌara, sap Zen Zen ol ziaha-en gun esena insa nebe mae hap syal gwibir-zimki– men kirekam Alap nesa gu-gubiridakaye.
⁷ Sap Alap mo Musa han de ol aha-en unni in de soson gwenanam, ki molya etan zi niban de ol ziaha-en gun hup dwam gwenanam. Ki nonol ziaha-en gun enna in maka sowehek.
⁸ Hwena Alap Zen nonol ziaha-en gunnu insa anakan dam gulsuku, “An soson naka hom”– Zen kim anakan hamal hap gubiridakaye, “Ëe, Bian, ama emsa gubiridaꞌan: Ansa enlala ei gwibik. Israel ne Yehuda nik mo zi ausu nakore zi niban de etan olsa ziaha-en gun hup de yaklanak sa hatal.
⁹ Eban mae de ol ziaha-en gun esena an, zen men kirekame auyan-aza oban orep ziaha-en guk, kirekam hom– Ëe kime desa ere mo sosonsa de goltrei gwizimdinkim Mesir kon gwiswe sonekye. Hwena zen ano ol ziaha-en gunnu in san hom ang tak. Zen in zebe hendep tahanna gweisibiridak.
¹⁰ Hwena insa ngein sin etan ziaha-en guꞌuk, Ëe asa zeno mae mo enhonak titi tabin ol esesa ale gulzim, zen zep sa desan en aha-ere enlalakam ang ta gwer. Zen dekam tangan sa anakan enwe-mase gwe-gwer, ‘Ëe an zeno mae mo Alap, hen zen eiwa ano hlil irin wenya.’
¹¹ Zen dekam molya zenaka anakan titi da gwibik, ‘Emki Biansa tame tan.’ Sap zen dekam zen sa kitak Asa tame dal– sap bose nabare wenya, sap bose srem wenya.
¹² Sap Ëe asa zeno mae mo karek-karekna tap gulsuzim. Dekam molye etan zeno mae mo karekna enlala gwe-gwibik.”
¹³ Zen in zep, Alap kim kirekam hamal hap gubiridaka, etan de zi niban olsa ziaha-en gun hup, zeno dam gulsunnu, Zen hen dekam nonol ziaha-en gunnu insa tahan san gwei gubir kinika. Kirekam de lwankam, ki nonol ziaha-en gunnu in mes epba gwer, hendep angkam zen zalta dep dena.