¹ Zen in zep, sap Alap molya zere mo ol gu-gunnu insa eititi gwibirki, zere mo olsa de i-san i-san gwe-gwibin wenya, zen zen en sa zere mo goleteinikirin langnak yaing gwer. In zep nen ki engalap gwe-gwen– anakare hap, “Nebon mae onakon bap zen aha maena zewe hata srem gwen.”
² Sap Alap onakore ol dawemna nebon mae onak mes hatak– men kirekam hen orep Israel hon hatakke. Hwena zebon mae waba tangan hap lwak, sap zen hom daiblibik.
³ Hwena nen an zen angkam laiblibiꞌin, nen mese Bian mo hamal gun langna iwe de yaing gwen hap dena ulink. Hwena men zen daiblibir srem gwek, desa man Alap gubiridaka, “Ëe mese nol drak-drak wenya insa jala ban gu-gubiridak, ‘Mensa langna zao de goleteinikirin hip gu-gubirida guk, zen hwena toton molya ze yaing gwek.’” Hwena Alap Zen de zi niban goleteinikirin hip dena insa mes sap auhu-kamana an mo nonol lonesen nakon nebe mae hap hamal gul guzimki.
⁴ Nen ema anakan dam ulsuꞌun, “Langna insa nebe mae hap mes hamal gul guzimki,” sap Alap mo olak man lwak, “Yaklana tujuna, Alap dekam syala golzausuku, sap Zen mes dekam kitak sul soneka.”
⁵ Zep langna in angkam sul sonen nik lwaꞌan, sap hyanak Alap dekam zep Israel mo auyan-azana insa gubiridaka– men kirekame gulk kon ale gulye, “Zen toton molya ze yaing gwek.” Sap sul sone nik de lwan sremkam, ki molya Alap kirekam gubiridananam.
⁶ Zep angkam de zini nebe mae hap Alap Zen de goleteinikirin langnak de yaing gwen hap dena nama lwazimꞌin. Hwena men zen sap nonol ol dawemna insa esane gwe-gwek, zen mae hap ze yaing gwe srem gwek: Sap zen man Alapsa de taibliblan hap baes tak.
⁷ Zen in zep tahunna kim beya tangankam altilsik song gwek, dekam zep Alap aha yaklana dam tasiki– dekam de Zen de zi niban goleteinikirin langnak yaing gwen hap denaye. Yaklana insa man ayatna inkam “namen de yakla”kam gubluka. Zen ayatna mensa Daud Bak anakan ale gulkuke, “Namen de yaklanak Alap zere mo olsa em i-san i-san gwe-gwibin. Bahem auyan-aza uk mo kim enol drak-drak gwe-gwen.”
⁸ Zi niban de goleteinikirin langna insa Alap enlala gwibiꞌira, zen Yosua Bak men desan dep Israel mo auyan-azana golesek gwekake, desa hom enlala gwibirki. Daud Bak kim Alap mo ola insa ale gulku, dekam Israelk de zini orep mes langna zewe yaing gwezak. Sap zao de eiwa goleteinikirinkim, ki molya Alap etan aha yaklanak de aha langnak goleteinikirin hip gubiridananam.
⁹ Zep Alap zere mo hlil irin zini nesa nama Zen de goleteinikirin hip gu-gubirida gweꞌara– nen dikim nere mae mo syalsa golzausun hupye, men kirekam hen Alap Zena yaklana tujunak syala golzausukuke.
¹⁰ Sap mensa Alap goleteinikinꞌira, zen zere mae mo syala golzausunkum– men kirekam Zena hen golzausukuye.
¹¹ Zen in zep, nen dawemkam ealp gwe-gwen– ekakim Alap han apdekam ernikink. Mana nebon mae onakon aha mae nik zewe hata srem gwenanka– men kirekam orep Israel mo auyan-azana egwe gwekke. Sap zen man Alapsa de taibliblan hap baes tak.
¹² Zep nen bap nen Alap mo ola insa tim gun, “Zen asyas.” Sap Alap mo ola, zen neno mae mo enhonak man tangan soson gwe-gwenan. Zen zep nwe-mase gwe-gwenan– san de ngayana. Hen Alap mo ola san de nebok eihya-ngi eihya-ngi ben-benna kiye. Zen zep nebon mae olk en san tisik gwenan, hendep dan gaing nennak hata gwenan. Dekam zep neno mae mo enlalana hen hole-hlena enhonak anakan kles so gwenan, “An zen Alap mo dwam gwibinni. An Alap mo dwam gwibin sremna.”
¹³ Zep man tangan dam gwesinin: Alap mo nwenak zere mo yang tabin wenya nen toton banakan molye eani-ning gwek. Sap zebe hap tingan talusun nik erlwaꞌan. Zep lamkam nen kire Alap hap esa nere mae mo lowe henna kitak oltreblal.
¹⁴ Zep Alap mo Tanena Yesus Zen mes nesa ngatan zi mo lang san dep ngeir gubiridaka– Alap zere osan dep. Men kirekam orep Alap mo golak de syal tan zini Israelsa Alap hon dep zon nulida gwek, Yesus hen kirekam angkam nesa zon guluda gweꞌara. Zen Zen tangan angkam– Alap mo golak de neno mae mo Teipsin niye. Zen in zep nen Desa en de taibliblan ennak tatem ezauk gwen. Bap nen zabe gweblan.
¹⁵ Sap Zen man neno mae mo lowe henna kitak anakan hlaul gwizimnira, “Zen an dekon sin gwe hanaꞌara. Zen wakin dekon sin gwe hanaꞌara.” Zen zep nesa dawemkam kwasang gwibirida gwenda, sap zere hon hen ki sap kareksa de gon hap de enlalana hata gweblaka– men kiye hen nen. Hwena Zen hom mae karekna golka.
¹⁶ Hwena nen mese angkam Deban erdokot gwer! Zep nen kime Alapsa abe la gwenan, nen dekame damkam nere mae mo abena Alap hap yaing il gweblanan– Yesus in zewe angkam nebe mae hap syal gwe-gweꞌaraye. Zep nen sap esa airin sremkam Alap hon yaing gwe-gwer– nen de ba maesa tahalha gwibinkimye. Dekam sa Alap nebe mae hap zere mo kwasang-kwasangna nabakam goltrei gwizimdi.