¹ Zen in zep, aya-wal oso-wal, sap nesa mes Alap hlil inki– zere onak de enho lalak enkam lowehe gwen hapye, zep nen dawem enkam Yesussu tame tan. Sap nen ema zebe hap dena damnak anakan egu gweꞌan, “Zen Alap zer soneka, hen nebe mae hap Zen mes nwe-mase gweka– Alap mo golak de syal tan zi mo Teipsin Tanganna.”
² Sap Zen Alap zere mo taibliblan tanganna, zen zep Alap syala in hap dam tasiki– men kirekam hen orep Musa Baksa taibliblakake, zen de Alap zere mo nga yala Israelsa syal gwe-gweblan hap.
³ Zep teipsinni nonol sap Alap Zen, zao Yesus, zao Musa. 4Hwena men zen tangan kitak bi gwibiꞌira, Zen Alap Zen. Zen Zen nga yala insa bi gweblaꞌara, hen kama bi tanganna Zen. 5Musa Bak zen hwena Bi Tangan Zini in hon de syal gwe-gwen zi. Zen hen taibliblan tanganna, zep dawemkam Alap zere mo dwam gwibin sin zere mo ngana insa syal gweblaka. Hen zere mo syala kon ngein sin dep dena anakan goltrei gwizimki, “Abon onakore teipsin zini sa hata zala.” 3bZep Yesus, Zen Musa onakon teipsin tangaranna, 3a, 6asap Zen bi tangan Zini in mo Walas tangan, hen Alap mes Desa Zen de hendep denaban ngana insa kara ta gwen hap taibliblaka. 6bZep nen an eiwa Kristus mo nga– nen de airin sremkam Zebon en anakarekam eblol gwe-gwenkamye, “Zen sa kitak nebe mae hap syal gwe-gwibir-zimdi.”
⁴ (3:3)
⁵ (3:3)
⁶ (3:3)
⁷ Zen zep Alap mo Enhona nesa gubiridaꞌara, “Namen de yaklanak Alap zere mo olsa em i-san i-san gwe-gwibin.
⁸ Bahem ere mae mo auyan-aza mo kim enol drak-drak gwe-gwen– zen men kirekam sasa lang nakon Abon onakon de te so gwen hap easas gwe-gwekke. Zen dekam zep anakarekam Asa nakasik gweblak, ‘Alap wehe nesa karek tabiꞌinka?’
⁹ Eno mae mo auyan-azana sap mes hla nul gwek– owas-owasna mensae empat-pulu tahunkam syal gwe-gwibir-zimkye. Hwena zen nama dekam Asa kareksa de gulin halasen gwenkam nakasik gweblak.
¹⁰ Zen in zebe tangan hendep blalen gwibiridak, zebe anakan gubiridak, ‘Zen molya etan Abon osan dep lwanda halzak, sap Asa de i-san i-san gweblanna mes tangan baes tak.’
¹¹ Zen in zebe desa jala ban anakan gu-gubiridak, ‘Mensa langna zao de goleteinikirin hip gu-gubirida guk, zen hwena toton molya ze yaing gwek.’”
¹² Zen in zep, aya-wal oso-wal, dawem! Bap nen Israel mo kim egwen. Em ema ahakore nik Ngaya Zini Alapsa hli lanank– dekam de ere mae mo enho karek lam tan san ang tan hap. Ki hwena dekam esa Zenaka de taibliblan nakon ebutehal gwer.
¹³ Zep emsa de ahanaka karek ora san dep yasik tan srem hap, emki enaka yakla jamkam titi ta gwibin. Sap Alap mo olak men anakan lwak: “Namen de yaklanak Alap zere mo olsa em i-san i-san gwe-gwibin.” “Namen de yakla”kam mensa guku, zeno enlalana, nen de yakla jamkam nenaka titi ta gwibin hip. Sap kire sremkam, ki nere mae mo karekna in zen sa nep derek gwe-gwizim, hendep zen sa nesa al tasibir. Zep esa hendep enol drak-drak gwer, hendep dekam esa Alapsa langa lasil.
¹⁴ Hwena nene Alapsa de taibliblannak tatem ezauk gweꞌak, men kire enkam nonol lone sennak laibliblakke, nen dekam esa aumwa hap de yaklanak, mensa Kristus nebe mae hap hamal gulzimki, desa kitak ulin.
¹⁵ Zep nen bap nen Alap mo ola insa eititi gwe-gwibin– men zen anakan lwakye, “Namen de yaklanak Alap zere mo olsa em i-san i-san gwe-gwibin. Bahem ere mae mo auyan-aza mo kim enol drak-drak gwe-gwen– zen men kirekam Abon onakon de te so gwen hap easas gwe-gwekye.”
¹⁶ Zen kirekam banakare zi? Zen sap dwan zere mae mo ikim am Alap mo ola esane gwe-gwek! Zen hwena ba hap etan zere onakon de wet so gwen hap easas gwe-gwek? Zen men sap Musa Bak Mesir kon gwiswe soneka!
¹⁷ Hen zen banakare zisi Alap empat-pulu tahun enkam jal gwibirida gweka? Zen sap Israel mo auyan-azana– men zen karekna nulin halasen gwekke. Hendep zep zere mae mo tok-tokna hli nulida song gwek– sasa lang san kim sek gwe song gweꞌan zakye.
¹⁸ Hen zen banakare zisi Alap anakan gu-gubiridaka? – “Mensa langna zao de goleteinikirin hip gu-gubirida guk, zen hwena toton molya ze yaing gwek.” Zen men zen Alapsa de taibliblan hap baes takke.
¹⁹ Zep angkam mes tangan dam gwesinin: Zen mae hap Alap mo goleteinikirin langnak yaing gwe srem gwek: Sap zen hom Zenaka daibliblak.