¹ Zen in zep, Yesus onakore ola insa ner hom dokwak uk, nen dawem enkam nen i-san i-san gwe-gwibin. Kire sremkam ki sap de ora san esa egwahal.
² Sap orep Musa Bak hap Alap onakore titi tabin ola zere mo dam taha nakore zi ayang nul gweblak, zen zep hwena ahakorena kip ayang gul gwizimki. Zen Alap zere onakon hom mwin-mwankam gulin gweka. Zere mo dam taha nakore zi nikon gulin gweka. Sap kirekam, hwena zen hen eiwa de tangaranna. Hen men zen desan ang ta srem gwe-gwek hen nol drak-drak nei gwibik, desa ki Alap karek ta gwibirki.
³ Hwena Yesus, Zen Alap mo dam taha nakore zi nikon teipsinni. Zen in zep, angkam de wenya nesa dawemkam tangan sa karek tabiri– nen de engaya gwen hap de zere mo ol esena ansa asyas makan gweibinkimye. Sap Bian Yesus Zen nonol gol haladaka, hen men zen nonol esane gwe-gwek, zen mes nebe mae hap eiwa nul gwizimk.
⁴ Alap Zena hen mes zeno mae mo ola insa eiwa de gulzimki– Zen kim kirekam-kirekam owasna gol gwizimki, hen zere mo Enho nakore sosonna kim zere mo dwam gwibin sin zi hip ing ta sone gwizimkiye.
⁵ Hen Alap hom zere mo dam taha nakore zini dam tasibirki– zen de okama esena insa irik gin hipye, in zep denaka angkam lonbiꞌinye. Hwena Zen diki Tane zik sa okama esena insa irik gili.
⁶ Hen zini nebe mae hap dena Alap mo olak man lwak, aha zini kim anakan Alapsa gublukaye, “Bian, Em ba habe zi tanganna asa nwekam goleake gwenda? Hen Adam Bak mo auyan-aza tane walya asa ba habe kwasang gwibirida gwenda? Sap ee an otde tangannak denakake, hwena Em mese ano mae mo bosena esek gul sezimki.
⁷ Sap angkam an kime okamanak awe lowe heꞌan, ano mae mo bosem-sena betekna– ere mo dam taha nakore zi nikonye. Hwena Em mese abe mae hap teipsinkim de lowehen hap de bosena hamal gulzimki. Dekam hwena ee asa ere mo dam taha kore wenya insa leipsibiridal,
⁸ hen tingare kirekam-kirekamna ee asa bi eibir.” Alap mo ola insa anakan lwak, “tingare kirekam-kirekam”sa de zini nen bi gwibin hip, enlalana aha-en mae molya lwa kinik. Zep zere mo dam taha nakore zini zao hen biti gweꞌan– nen de lamkam bi gwibiridannak. Hwena neno mae mo kirekam de irik gin hip denak hom am angkam zauꞌun.
⁹ Diki Yesus en angkam kirekam bi gwibiridaꞌara. Zen kim menkam okamanak gweka, dekam zeno bosena hen “betekna Alap mo dam taha nakore zi nikon”– nen an kiye. Hwena Zen mes nebe mae hap karekkam tilki. Zen in zep Alap zebe hap bose dawemna golblaka, hendep angkam zep Zen kitak teipsibiridaꞌara. Alap eiwa man nesa serkam kwasang gwibiridaka, zep Tane zemka zer soneka– Zen de nebe mae hap okamanak awe tin hipye.
¹⁰ Alap Zen kitak bi gwibiꞌira, hen zere mo sosonkam kitak jowek. Zen in zep Alap hap man tangan dakastilbliꞌan– Zen de walas beya gwen hap, hen walasna insa de Zen zere mo ngatannak golelowehe gwen hapye. Hwena Yesus Zen Zen– walasna insa de zon guludan hap de Zi niye. Zen zep Yesus hup dakastilblik– Zen de walasna in hap kareksa goltowen hap denaye. Zen zep Alap zere mo Yesus hup de dwam gwibir-blinna sul soneblaka– kim karek yala insa de goltowennak nwe enkam kara takaye.
¹¹ Zen in zep angkam nwe-mase gweꞌan, Tane zem Yesus Zena, hen Zen men desa karek-karek nakon aha-rokꞌnen ngan tasibirki, zeno mae mo Bianna aha-en. Zen in zep Yesus hom nesa saher gwibiridaꞌara– anakan de gubiridan hapye, “Zen ano oso wal.”
¹² Sap Alap mo olak Yesus “oso wal”kam nesa gubiridaka– kim Alapsa hamal hap anakan gublukaye, “Bian, ere mo oso walya ban de goleyaing gwe zannak Ëe asa eno bose dawemna zeno mae mo inik teip gulsuk gwer. Ëe asa dekam Emsa terya ban apdenak ziisrip-sri gwe-gweblal.”
¹³ Yesus hen man Alap mo epba olak hamal hap guku, “Ëe asa Bian ensa blol gweblal.” Zewe hen man nebe mae hap dena Alapsa hamal hap gubluka, “Ëe ama angkam, walasna mensa Ena abe hap kap gulbluka, deban mae goleyaing gweꞌan.”
¹⁴ Mensa “walas”kam gubiridaka, zen kala bare tim nibare wenya nesa ki gubiridaka. Zep Yesus zere hap hen man tangan dakastik– kala bare tim niban de hen hata zankamye. Zen in zep tin hip de tim niban golhata zaka– dekam de dowal mo kigi mo sosonsa juwe gwen hap denaka timbwas gulblun hap.
¹⁵ Hen Zen mae hap kirekam syal gwibirki: Dekam de gwiswe sonen hap, tingan men zen tin hip eairi gwenanye. Sap zini nen menkam nere mae mo gwen holona men kiye dekam tinsi ema airi gwibik. Hwena angkam Zen mes nesa tin hip de airinni in kon gwiswe soneka.
¹⁶ Zep man tangan dam gwesinin: Yesus kim tilki, Zen Alap mo dam taha nakore zisi hom mas gwibiridaka. Zen hwena Abraham mo auyan-tane walya nesa mas gwibiridaka.
¹⁷ Zen zep tangan zebe hap dakastilblik– zi timkim de hatazan hap denaye, an kire tim niban oso wal zem nen lowe heꞌanye. Zen zep nebe mae hap nwe-mase gweꞌara– san de Alap mo golak de syal ta gwen zi mo teipsinni, Zen de nesa Alap osan dep mas gwibirida gwen hap. Hwena Zen orep de Alap mo golak de syal tan zi mo kim hom sapi kalkam neno mae mo karek-karekna ngan gulsuku. Zen hwena zere mo kalkam ngan gulsuku. In zep Yesus zi timkim hata zaka, hen nen zebe anakan tame lak, “Zen eiwa taibliblan tanganna hen kwasang-kwasangna.”
¹⁸ Sap Zena hen neno mae mo kim karekna goltowe gweka, hen man sap kareksa de gon hap de enlalana hata gweblaka. Zen in zep soson srem zini neno mae mo lowe hensa tame gul gweꞌara– nen kime sap kareksa de gon hap ealp gwesik gwenan. Zep nen kime abe la gwenan, Zen dekam zep enlala tatetena nebe mae hap zer gwizimnira.