¹ Aya-wal oso-wal, ere mae mo Kristen bosesa de banakare karek mae wewe heblanna, men zen ebon mae onakon Alap mo Enhosa de ang gwe-gweblan wenya lowe heꞌan, zen zen de zini insa dam dasik sonek. Hwena enlala sae-saekam em dam tasik sonen, hen anakare enlala tatete naban, “Abon mana hen zeno karekna in hliminnink.”
² Emki kirekam ere mae mo Kristen bose wal mo nihinni tensik gwizimdin. Nenaka de kirekam kwasang gwibirida gwenkam, dekam kwasang hap de Kristus mo titi tabin ola in sane ang ta gweꞌan.
³ Hwena zi de anakan enlala gwenkam, “Ëe ere mo gwen dawem nakon asa ere mo Kristen bose walya kwei-kwik gul, hen ee dekam asa Alap mo nwenak mam gwer,” kirekam de bolte-boltekam enlala gwenkam, zen mes zenaka boton tanda.
⁴ Diki aha zisi de enlala gwibiridan sremkam emki ena en naka karatda ta gwibin. Kirekam esa esam gwesil.
⁵ Sap Alap molya anakan nesa karatda tabirki, “Zini an san ha man aha zisi kwei-kwik gulku?” Zep diki ena en naka em karatda ta gwibin.
⁶ Men zen emsa Alap mo olkam tawa da gwibirin, emki te-alakam hen aha kire-kire maekam mas gwibirida gwen.
⁷ Emki eenlala gwen: Ena men kirekame okamanak awe eiyas laꞌak, zen kire enkam esa hen lamkam zeno eini hla kul. Zep anakan bahem ekil gil gwen, “Ëe de ere mo tim nikore hole-hle san syal gwe-gwenkam, zeno eini lamkam aha nwe-masekam asa gulin.” Kirekam bahem enaka boton ta gwibin. Sap Alapsa molye boton lak! Hole-hle san de syala in mo eini hwena syauk blanak de gwe gwensa esa hla kul. Hwena em de Alap mo Enho mo dwam gwibin sin syal ta gwenkam, zeno eini lamkam hendep de engaya gwen hap denaka esa ulin.
⁸ (6:7)
⁹ Zen in zep, aha zi hip de dawem gol gwizimdinni, bap nen eblalen gwe-gwen. Sap zen lamkam dep de obwaga eiyas gin makan. Nen de eblalen gwen sremkam, ki lamkam esa zeno eini ulin.
¹⁰ Zen zep, nen nama de awe lowehe gwennak, nen dawemsa tingare zi hip gol gwizimdin– nonol tanganna nere mae mo Kristen bose wal hap.
¹¹ Aumwa hap de alena ansa emki hlaun: Ale mam-mamkam dena an, zen ere mo ale gunnu.
¹² Yahudi kore Kristen zini men zen emsa bolte enlala naban men-man da gwibirin bahem salbirida gwen. Anakare ola bahem salbirida gwen, “ËKristen gwenkam nonol Yahudi hon em biti gwen– Musa mo titi tabin ol san de to mipsa blom tasik gwibinkim.” Hwena zen anakare enlala aning tan naban emsa kirekam titi da gwibirin, “Nene kitak Yesus hup de te-lidak soblan ennak eyaing gwe kiniꞌak, dekam Yahudi zini sa Kristen zini nesa husus neibirida gwer.”
¹³ Hwena Yahudi Kristen zini in, zeno mae mo to mipna sap orep mes blom dasibir-zimk, hwena zena hen hom tingare Musa mo titi tabin ola insa sul nul sone gwenan. Hwena zen em de hen zeno mae mo kim egwe gwen hap edwam gwe-gweꞌan– dekam de eKristen gwen srem Yahudi zi hip emsa anakan goletrei gwizimdin hip, “Zini an mes nebon mae biti gwer.” Zen mae en hap ki emsa kirekam neibirida gwenan– dekam de Yahudi bose zik zeno mae mo bosesa boltere gulzimdin hip.
¹⁴ Ëe hwena home ere mo bosesa de boltere gun hup dwam gwe-gweꞌan. Ëe hwena Bian Yesus hup de te-lidak soblan ensa de boltere gulblun habe dwam gwe-gweꞌan. Sap ee ere mo gwenna anakane enlala gwe-gwibiꞌin, “Asa mes Yesus hun te-lidak sonnak makan nosoink. Zep ano auhu-kama tim niban hole-hle naban mes Yesus zitilki.” Zen in zep hwena auhu-kama enlala zini asa hom dwam ne gweblanan, sap ee home auhu-kama mo enlala san ang gwe-gwenan.
¹⁵ Alap hom zisi anakan karatda ta gwibirida, “Zen to mip blaonsublunna,” ahaksa, “Zen to mip blaonsublun sremna.” Diki Zen anakan karatda ta gwibirida, “Zini an san ha ere mo Tane naban de zeraha-en gwenkam mes ese yang tasibin makan eliweher?”
¹⁶ Men zen kirekam eliwehe gwenan, dikire aha-ere enlalakam de lowehe gwen hap dena hen kwasang-kwasangna zebon mae onak lwa gwek. Tingan men zen kirekam Kristus en hon eyaing gwe kini gwenan, zen zen– Alap mo hlil irin tangan wenyaye.
¹⁷ Hwena hyanak bap zen etan zini asa anakan blos tablan, “Em home dawemkam Kristussu ang gweblaꞌara.” An ha ki, ano timnik wei-weina beyakam elwaꞌan– men zewe Yesus hup de jal hap asa lek-lek da gwekye! Zen zep dam gwesiꞌin, “Ëe eiwa ama tana wei san zertroꞌan.”
¹⁸ Aya-wal oso-wal, dikire Bian Kristus Yesus mo kwasang-kwasangna ebon mae onak lwa gwek. Amin.