¹ Zep aya-wal oso-wal, aumwa hap ee ama emsa gubiridaꞌan: Dawem enkam Bian Yesussu isrip-sri e gweblak. Ëe sap mese isrip-sri hap dena suratnak awe ale gulzim, hwena etan kire habe emsa titi tabiꞌin. Sap zen dekam tangan esa etatete gwer.
² Hwena terya-tyakam lowehe gwek. Lwa makare zi mana emsa karek san dep lup nulin halank! Zen zen yasik da gwibirin– dekam de to mip blom tasibinkim timsi karek gun hupye. Sap zen man tim nul gwenan, “Yahudi mo epba titi tabin ola in san de ang tankam dekam esa Alap mo nwenak edakastil.”
³ Hwena em bahem desan ang ta gwen. Sap nen mese Alap mo nwenak edakastil. Zen hom. Sap nen an Alap zere mo Enho ensa de blol gwe-gweblankame Alapsa betek e gweblanan. Nen Yesus ensae anakan boltere la gwenan, “Zen diki Zen sa asa ngaya tala.” Nen home anakan tim ul gwenan, “Ëe de kiresa tahakam syal gwibinkim dekam asa Alap mo nwenak dakastil.”
⁴ Hwena orep ee amaka Yahudi Kristen zini in mo kirekam de tawa tabin sin dan syal-syala ban ang gweꞌan. Sap ee ama serkam tangan Yahudi mo titi tabin ol san ang gwe-gwek. Zebon mae onakon nara molya asa kwe taꞌanam– aha-en mae de ngip gun sremkamye.
⁵ Musa mo titi tabin ol san de ang tan hap, asa de jaha gwen nakon kim mingguna aha-en tamank, dekam zep asa to mipna nablonsubluk. Ëe an Israel wal tangan, Benyamin Bak mo ausu nakorena. Ano auyan-azana tingan Ibrani mo ausu nakore zi. Hen ee serkam tangane Musa mo titi tabin ol san ang gwe-gwek, hendep zebe Farisi hon tik.
⁶ Ëe zeno mae mo tawa tabin sin enlala syal-syala bane ang gwe-gwek. In zebe hendep Kristen zini karek ta gwibik. Hendep zini ba nakon dep? – asa gublunna, “Zen mes Musa mo titi tabin ola gulmunku.”
⁷ Hwena mensae serkam orep kyang-kyang gulsuk gwek, ee mese desa kitak Kristus ensa dikim hwena ang gwe-gweblan hap tapbla guk. Zen diki zen tangan– dawem wenyaye. Nonol in desane ang gweꞌak, zen waba hap.
⁸ Yahudi mo epba ol ensa home kirekam enlala gwe-gwibirin, hwena tingare zi mo kirekam-kirekam syal gwibinsi, zen kitak waba hap. Diki dawemna aha-en: Ano Bian Yesussu de tame tanna, zen diki zen– dawem tangan wenyaye. Desa de ang gweblan hap, zen zebe hendep tingan anakare enlala naban tapbla guk, “Zen san de ble nabare tembanena kiye– hiri gun en hap dena.” Diki ee ama tangan Kristus en hon de gwe gwen hap dwam gwe-gweꞌan– dekam tangan de serkam Kristussu tame tan hap,
⁹ hendep Deban en tangan de zeraha-en gwen hap. Zep ee ere en mo sosonkam home etan alp gwe-gweꞌan– titi tabin ol san de ang gwe-gwenkam de Alap mo nwenak dakastin hipye. Hwena Alap Zena mes ee dikim dakastin hip dena abe hap syal gwibir-blika– ee kime Kristussu taibliblakke.
¹⁰ Zep ee ama tangan Kristussu de anakan tame tan hap dwam gwe-gweꞌan, “Diki zeno sosonna, men dekam tin nikon ngaya gweka, abon zen hen lwa gwen. Hen ano enlalana diki zeno kim zen hen lwa gwen– Zen in kim sap karekna goltowe gwekaye. Diki ee hen ere mo angna sosok tan– men kirekam Zena zere mo angna tin hip sosok takake.
¹¹ Hendep ee hen wehe Yesussu tana wei san zertro song gweꞌak? – tin nikon de etan ngaya gwenkamye.”
¹² Hwena ee home enaka anakan boltere taꞌan, “Ëe mese tangan Yesussu hli-hli tasik,” ahaksa, “Ano enhona mes tangan lalak gwera.” Hwena ee namae kirekam dikim gwen hap Yesussu dan syal-syala ban zertro song gweꞌan. Sap zewe de hendep hatan hap mes ki asa Kristus kwang taka.
¹³ Aya-wal oso-wal, sap eiwa, ee nama home tangan tal gwesiꞌin, hwena ee anakare enlala en nabane zertron daꞌan, Ëe Kristus en osan anik dam gwesikhak. Ëe babe lure san de banakare maesa enlala gwibin niban zertron– enaka de boltere tan hap de enlala, ahaksa enlala dowe hanan nabanye. Sap ee ngein en san debe
¹⁴ dam-dam enkam hluweꞌan– dekam de nabakam hatan hap, men zewe dep Kristus mo kwasang-kwasang nakon Alap asa kwang takake.
¹⁵ Zep dikire hen tingan men zen Kristussu de zeraha-en gwennak ezise gweꞌan kirekam de enlala naban lowehe gwek. Hwena men zen de lure san lwan dahal gweꞌak, Alap sa desa etan oto tasik gwibiri.
¹⁶ Zep orana men zewe Kristussu de zertronkam wet so gweꞌak, dekon en bahem lwan dahan. Hwena emki dekon zertronkam ayang gun.
¹⁷ Zen zep, aya-wal oso-wal, ano mae mo kim lowehe gwek– men kirekame Timotius mae han enaka ebe mae hap erak la gwibir-zimkke. Zini men zen hen ano mae mo kim lowehe gwenan, emki hen desa salbirida gwen.
¹⁸ Sap ee mese emsa de gubirida gwenna beya guk, hen angkam etan nwe go-ho nabane emsa gubiridaꞌan: Zini beya nik zere mae mo lowehen nakon anakare enlalana nertrei gwizimnin, “Yesus zen waba hap te-lidak sonnak tilki.”
¹⁹ Kirekam de zini zen syauk blanak dep dena! Zen hom Alapsa betek ne gweblanan, hwena zere mae mo tim nikore hole-hlena in desa en betek neibirisen gwenan. Zen zere mae mo lowe hensa boltere nul gwenan, hwena zen diki maka nolsaher gwe-gwenan. Sap zeno mae mo enlalana zen auhu-kama ennak dep dena.
²⁰ Hwena nen an ngatan zi mo langnak dep de wenya zen. Nen in zebe enlala zon tasiblin naban nesa de ngaya tabin hip de Zini Bian Yesussu kara e gweblanan.
²¹ Zen sa neno mae mo auhu-kama tim sin-sinni ansa nep wet tyasibir-zim zira– dekam de zere mo tim makan eliwehen hap. Nen hen dekam zere mo kim esa elitil ane gwer. Sap zeno kirekam de syal gwibin hip de sosonna man tangan taman kinik. Zen zep sa okamana ansa kitak hendep denaban bi gwibir zira.