¹ Aya-wal oso-wal, nen kie anakan eis gwibirin: Kristus hun de zeraha-en gwenkam, zen dekam zebe enho nakon dikim tatete gwen hap dena eis gwibirin. Zeno kwasangna hen ki neno mae mo enhonak lwa gwenan. Hen zeno Enhona man nesa golelowehe gwenda, zebe aha-ere enlala naban lowehe gwenan, hen nenaka kwasang eibirida gwenan.
² Sap nen kirekame eis gwibirin, zen in zebe emsa titi tabiꞌin: A kire enkam lowehe gwek: enlalana aha-en, kwasangna aha-en, enhona aha-en, hen dwam gwibinni aha-en. Kirekam de lowehe gwenkam, ee asa tangan emsa isrip-sri gwibirida gwer.
³ Bahem ba maesa anakare enlala naban syal gwe-gwibin, “Diki ee amaka mam gweꞌan.” Hen bolte-bolte enlalana bahem ing ta sone gwen. Hwena enlala betekkam em ere mae mo Kristen bose walya anakare enlala naban blikip gwesibirida gwen, “Zen mamna. Ëe an betekna.”
⁴ Bahem ere mae en mo tim en hap ealp gwe-gwen. Hwena aha zisi de mas gwibirida gwen hap em hen ealp gwe-gwen.
⁵ Emki hen ere mae mo enlalana betek ta gwibin– men kirekam hen Kristus Zenaka Alapsa de blikip gwesiblin hap betek takake.
⁶ Yesus nonol lonesen nakon kim gweka, Zen dekam Alap Zena kiye. Hwena Zen hom desa zere en hap anakan inik gwibirki, “Diki A-ene Alap han e gwen.”
⁷ Zen hwena man desa hli yulku– dekam de tingare zi mo tana iltikinnik babu gwen zi mo kim syal gwe-gwen hap. Hendep zi tangankam zep okamanak awe hata zaka– an ki hen nen.
⁸ Dekam zep Alapsa de betek gweblan hap Zenaka tin hip sosok taka– in kim karekkam te-lidak sonnak de makan ta irinkim dakye.
⁹ Zen in zep hendep Alap teipsin tangannak dre neka, hen zeno bosena tingare ahakore bose nakon teip gulsubluka.
¹⁰ Zep zeno bosesa de salbinkim dikire tingan boklena kom da gweblak– sap ngatan zi mo langnak de wenya, sap okamanak de wenya, sap juwen zi mo langnak de wenya.
¹¹ Hen dikire tingan anakan ekira gwe-gwek, “Kristus Yesus Zen eiwa teipsin tanganna!” Sap kirekam de Yesussu boltere tankam, dekam hen Bian Alap zere mo bosesae teip ulsubluꞌan.
¹² Zen in zep, aya-wal oso-wal, men kirekam Yesus Alapsa blikip gwesiblika, nen hen kirekam nen Alapsa blikip gwesik gweblan. Ëe kime nama emsa golelowehe gwek, em dekam dawemkame ano ol san Alapsa betek e gweblak. Zep ano tim bwanak kire enkam em betek gwebla tine gwen. Sap Alap insa kirekam owas tangankam nesa ngaya tabirki, zep nen airiblan naban zere hon dikim etal gwesin hip ealp gwe-gwen.
¹³ Sap Zen Zen nesa enho nakon golesyal ta gwenda– dekam de zere mo dwam gwibin sin aha-ere enlalakam ang ta gwen hapye.
¹⁴ Zep nen banakare maesa de goltowen nakon, tonsun sremkam hen keisa-keisa sremkam nen lowehe gwen.
¹⁵ Sap nen dekam aha zi mo nwenak esa enwe-mase gwer– san de Alap mo wei-wik gun walasna kiye, enlala lalak enna hen enho kles gwesin sremna. Zep nen kime engaya gwen hap de ol dawemna okama kawesinnik awe ol halada gwenan, dekam enlala kawesin zi mo nwenak esa enwe-mase gwe-gwer– san de keis de zil anenna kiye. Zep Kristus mo lwa halzan hap de yaklanak de hatankam, ee asa isrip-sri naban zebe hap emsa anakan goletreblal, “An zen– ano syal gwibinkim de Emsa taibliblan wenyaye. Ëe waba hap home dan-sin niban syal gwibirida gwek– men kire hap Ena asa zer sonekaye.”
¹⁶ (2:15)
¹⁷ Ano emsa de syal gwibin nikon insa Yesussu dawemkam laibliblak, zep em mese ere mae mo timni zebe hap sosok ulblik. Zep eno mae mo lowe henna in man Alap hon nwe-mase gwe-gweꞌan– san de otweransa de zebe hap tru tasik seblanna kiye. Zep hen kirekam, asa de tankam de ano kal wet soꞌak, dekam sa hen nwe-mase gwer– neno mae mo tim sosok gublunna insa de Alap hap goltre seblanna kiye. Zen in zebe emsa gubiridaꞌan: Alap sa neno mae mo syala ansa dokwak gulu! Ëe in zebe isrip-sri gwe-gweꞌan, hen ee ama eno mae mo kire hap de isrip-srina eis gwibiꞌin.
¹⁸ Zen in zebe emsa gubiridaꞌan: Emki hen eisrip-sri gwe-gwen, hen ano isrip-srina insa emki gul irin.
¹⁹ Bian Yesus mo dwam gwibin sin diki lwaꞌak, ee ama Timotiussu de nabakam ebon mae osan dep zer sonen hap dwam gweꞌan. Zen kim de etan ebon mae onakore ol dawem naban gollwa haꞌan zaka, ano enlalana dekam tangan sa oto gwesili.
²⁰ Timotius in zen en tangan– aban de enho apde en naye. In zep zen hen dawemkam emsa de mas gwibirida gwen hap alp gwibirida gwenda.
²¹ Ahakon kitak zere mae mo timsi ngalap nei gwibirin. Hwena dekam Yesus hup de syala man eititi nei gwibirin.
²² Hwena em mese hen desa anakan tame lak, “Zen taibliblan tanganna.” Aban kime Yesus hup de ol dawemna ol halada gwek, ee dekam ere mo walas tangan makane zersyal gwe-gwek.
²³ Zep ee asa nabakam Timotiussu ebon mae osan dep zer sonezal– Roma mo teipsin-teipsinni kim de abe hap dena klis nuꞌikye.
²⁴ Hen ee ama Biansa anakan taibliblaꞌan, “Molya holo gwek, dekam sa ere hap hen orana kles tyasiblila– dekam de emsa etan duwebiridazan hapye.”
²⁵ Suratna an han ee ama ein nere mae mo wal bose dawemna Epafroditussu etan ebon mae osan dep zer soneꞌan. Em sap desae ano tahasa de tri so gweblan hap er sonek. Zen ano syal bose dawem, hen ee debane dowal mo kigisa ereija gwenan.
²⁶ Zen man kitak emsa ensa lwabirda gwenda, hen enlalana anakare hap dowebla hana gwenda, “Zen kim sang-sangna asa nasalblak, zen man tangan asa ngalap ne gweblaꞌan.”
²⁷ Eiwa, zen man tangan sang-sangna sabak gweka, hendep tin hip alp gwesiki. Hwena Alap man kwasang gweblaka, hen asa kwasang gweblaka. Sap zen de tilinam ano enlala dowe hananna dekam tangan maka taman kinika.
²⁸ In zebe ebon mae osan dep de etan zer sonen hap dwam gweblaꞌan. Sap hla tankam esa tangan isrip-sri eblal. Hen ano ebe mae hap de embwanna, hen zebe hap dena, dekam sa sewe hera.
²⁹ Zep emki nere mae mo wal bose dawemna in isrip-sri naban dokwak tan– Kristen zini nen men kirekame nenaka dokwak ulida gwenanke. Kirekam de zisi emki blikip gwesibirida gwen,
³⁰ sap zen mes Kristus hon de syal gwe-gwen hap zere mo angna sosok taka, hendep eno mae mo bose hap de ano tahasa tri so gweblannak maka tilki.