¹ Ano dang tininak de syal bosena Pilemon Bak, hen eno golak men zen Kristen zini etagal gwe-gwenan, hen nere mae mo somola Afia, hen Arkipus Bak– men zen hen Alap mo nganak syal gwe-gwendake: Suratna an ebe mae hap. Kristus hup de jal hap de bwinak gwen zini Paulus onakon, hen nere mae mo osona Timotius onakon:
² (1:1)
³ Dawem! Nere mae mo Bian Alap ne Bian Kristus Yesus ne sa kwasang-kwasang zemka mamkam ebe mae hap ol gwizimdi. Hen nen zere nik mo taha terenak esa lowehe gwer.
⁴ Pilemon Bak, ee, Paulus, Alapsa de gu soneblan nakon kime emsa enlala gwe-gweblanan, dekam ebon onakone dawemsa golbla tine gwenan,
⁵ sap ee ama anakan emsa sal gweblanan: Em eiwa-eiwakame Bian Yesussu taibliblaꞌara, hen tingare Alap mo hlil irin wenya ema kwasang gwibirida gwenda.
⁶ Sap nen mese Biansa de taibliblan nakon aha-en eka, zen in zebe Alapsa ebe hap hen anakan abe ta gwenan, “Bian, tingare dawemna mensa Kristus hun de zeraha-en gwen nakon hla kul gwenan, dikire hen Pilemon Bak kitak tame gul gwek.”
⁷ Oso Bak, sap em mese Alap mo hlil irin wenya kip kwasangna goltrei gwizimki, zen dekon zebe isrip-srina hen tatetekam de gwen hap dena eis gwibik. Tingare Kristen zini, zen hen ebon onakon enho misrim-srina neis gwibiꞌin.
⁸ Zen in zep, sap nen mese apdekam Kristus hun eraha-en gweka, zep ee amaka emsa anakan titi taꞌan, “A kirekam syal gwe.”
⁹ Hwena ee home kirekam emsa gweblaꞌan. Hwena ama sapꞌnen emsa abe taꞌan, “Asa de kwasang gweblankam, em wehe ano dwam gwibin sin ang gweꞌanka?” Sap ee an zi bogol, hen Yesus hup de jal habe jalom ek tihinak awe gwe gweꞌan.
¹⁰ Zebe emsa Onesimus Bak hap denaka angkam gu soneblaꞌan. Zen mes bwinak awe de asa mas gwe-gweblankam gweka– san de ano tane tangan. Zep bahem tol karek tan.
¹¹ Menkam nen emaka bose laka, “Waba Hap Bak”kam, sap zen dekam asang naban ebon babu gwe-gweka. Hwena angkam esa en gweblala, “Syal-syal tanganna.”
¹² Zep ama angkam ano dang tininak de walasna ansa etan ebon osan dep zer soneꞌan.
¹³ Ëe ama sap awe de zergwe gwen hap dwam gweblak– zen de eno weinak asa mas gwe-gweblan hap, ee kime nama engaya gwen hap de ol dawem gol halada gwen jal hap bwinak awe gwe gweꞌanke.
¹⁴ Hwena em de asa kirekam gublun sremkam bejene. Diki dawemna– em de asa de kwasang gweblan nakon gublunkam bap, “Amki zergwe gwe.” Hwena menkam ee emsa de sowe tan makane zergwe gwek– kime emsa tawa ta srem gweꞌakye.
¹⁵ San ha Alap kirekam mes yap emsa dwam gwizimki, “Dikire nongka sya kek. Hwena kim de etan gaing eꞌanka, dekam molya sya keka.”
¹⁶ Hwena zen angkam emsa de babu gweblan en hap de zisi hom. Kirekam de gwen nakon zen mes tangan esek gwe seka. Sap zen angkam neno nik mo dang tininak de oso. Hwena dawemkam eno tangan mo dena, sap zen ebon de babu gwen zi. Hwena angkam Yesussu de taibliblan nakon zen mes tangan gwera– san de neno nik mo oso tanganna kiye.
¹⁷ Zen in zep, em de asa enlala gweblankam, “Zen ano Kristen bose,” ki Onesimuꞌu etan zerin– san de enaka de zer irinni kiye.
¹⁸ Zen de orep banakare maekam emsa karek tanna, ahaksa eno kire-kiresa de ahan gonna, zen hwena ee asa ep te-alana golblal.
¹⁹ Suratna an mo aumwa hap de alena an ere mo tahakame ep ale gulbluꞌan: Ëe an Paulus, ee asa kitak te-alakam sul soner. Hwena sap diki amaka emsa enlala soblaꞌan, “Diki em emaka ano dwam gwibin sin totoresa ang gweꞌara, sap ee hendep de gwen hap denakae emsa tawa tak.”
²⁰ Zen in zep, Oso Bak, sap nen mese Kristus hun eraha-en gweka, ee ama emsa ano ol san de ang gwen hap abe taꞌan. Em dekam esa ano enhona ap misrim-sri tablala.
²¹ Pilemon Bak, ee kime suratna ansa de ep ale gul soneblan hap enlala gweꞌak, ee mese hen dekam emsa anakan taibliblak, “Zen molya ano abe tan en san zer inki. Hwena zen sa hen etan zere mo enlalakam serkam kwasang gweblala.”
²² Hen ere mo gol teksonna ahana ap hohle ta gublu. Sap ee ama Alapsa anakan blol gweblaꞌan, “Zen man tingare aya-wal oso-walya eno mae mo abena sal gweꞌara. Zep Zen sa etan bwina an kon ebon mae osan dep asa zerwet sola.”
²³ Epafras Bak, men debane Kristus hup de jal hap bwinak awe eꞌan, zen dawem ensa ep gol soneblaka.
²⁴ Hen kirekam– ano syal bose walya, Markus, Aristarkus, Demas, hen Lukas. Zen hen dawem ensa ep nol soneblak.
²⁵ Dikire Bian Kristus Yesus onakore kwasang-kwasangna eno mae mo enhonak lwa gwek.