¹ Nen menkam tok-tok makare nike lowehe gwek, sap dekam karek ensae ulin halasen gwek, hen Alap mo dwam gwibin srem sane lowehe gwek.
² Sap nen dekam auhu-kama zi mo enlala karek-karek sane ang ta gwek, hen dowal mo kigisae betek e gweblak– men zen gulk de dowal-dowala irik giꞌirake, men zen eihe nasen gwenanke. Zen in zen angkam golesyal taꞌara– zini men zen Alapsa betek nebla srem gwe-gweꞌanye.
³ Orep nen hen deban mae apdenak– auhu-kama zi mo hole-hle san de ang ta gwenna, hen nere mae mo tim nikore dwam-dwam san de ang ta gwen naye. Zep nen hen dekam Alap mo jalake lowe heꞌak– in kirekam tingare ahakore zini lowehe gweꞌanke.
⁴ Hwena eiwa, Alap mo kwasang-kwasangna mam tanganna, zep nesa serkam kwasang gwibiridaka.
⁵ Sap menkam nen an hen nere mae mo karek-karek nakon tok-tok makare nike lowe heꞌak, hwena Alap Kristus mae han apdekam nesa ngaya tabirki– Kristussu kim tin nikon ngaya takake. Zep nen Alap mo kwasang en nakone ki engaya gweꞌan.
⁶ Sap Yesus hun de zeraha-en gwen wenya nesa mes Alap Deban mae juwen zi mo lang nakon kap gul aneka. Zep nen angkam san de Yesus de nesa teipsin-teipsin zi makan ngatan zi mo langnak apdenak goleteinikirinni kiye.
⁷ Zen insa kirekam kitak syal gwibirki, zen dekam de nesa ngein sin de kama esenak anakan goletre gwen hap, “Em an zen ere mo kwasang-kwasang nakon de engaya gwen wenyaye.” Serkam de kwasangna in, zen Kristus ensa de zeraha-en gwen nakon esa ki hla kul.
⁸ Zep nen mese Alap mo kwasang-kwasang nakon engaya gwek– in kime Yesussu laibliblakke. Nere mae mo syala kon home engaya gweꞌan. Zen Alap totoresa nep gol gwizimꞌira.
⁹ Nen home mae ba maena syal eibik– dekam de engaya gwen hap denaye. Zep toton nara dep? – bola-bola gwenna.
¹⁰ Nen an sap diki Alap mo syal gwibin zi. Kristus hun de zeraha-en gwenkam, dekam nen san de ese yang tabinni. Nen in zebe dawemna syal ei gwibirin– men kirekam nebe mae hap orep kalang gwe gukuye.
¹¹ Zep em in zene Yahudi srem zi ausu nakon esaltik, emki ansa enlala gwe-gwibin: Emsa man Yahudi zini nenbirida gwenan, “Zen to mip blom tasibin srem zi.” Sap Yahudi zini zen zere mae mo to mip blom tasibinni insa boltere nul gwenan. Hwena zen sap zere mae mo tim ennak de syal. Enhona dekam hom wet gwesik gwizimꞌira.
¹² Em menkam home Kristussu tame laꞌak. Dekam em home Alap mo hlil irin zinik biti gweꞌak. Zep em dekam okamanak awe Alapsa de tame tan srem nike lowehe gwek, hen em anakane eenlala gwe-gwek, “Ëngaya gwen hap dena mensa Alap zere mo hlil irin zi hip gu-gubiridaka, ee molye desa ulink.”
¹³ Zep em menkam Alap onakon hen zere mo hlil irin zi nikon langanake lowehe gwek. Hwena angkam em mese Kristus hun eraha-en gwer, hen Zen mes zere mo kalkam de ngan tasibinkim Alap onak emsa zon guludaka.
¹⁴ Zep Kristus Zen mes nesa siri gulsuku— Yahudi zi niban Yahudi srem zi niban, hendep Zen mes nesa zere mo timnik aha-en gulku. Sap menkam Yahudi zi niban Yahudi srem zi niban bejen siri gwen. Hwena angkam jal-jala men zen lang zip son makan nesa kles sok, desa mes Kristus jek-jak gulku.
¹⁵ Maekam jek-jak gulku: Zere mo timsi de golgunkum. Zen kim tilki, Zen dekam zep Musa mo titi tabin ola kitak nebe mae hap sul sonezimki. Zep nen de angkam etan desan ang tan hap hom dakastiꞌin. Menkam Yahudi zini Musa mo ola in kon anakan dam nulsuk gwek, “Yahudi srem zini bejen Alap mo nwenak eoto gwesin.” Hwena angkam Kristus mes dare hlikna insa zere mo timnik aha-en gulku– san de aha-ere zi aususa de yang tabinni kiye, nen kime kitak Zere han eraha-en gwekke. Zen dekam zep hliwenna in kon nesa umlae tabirki.
¹⁶ Zeno te-lidak sonnak de tinni in, Zen dekam neno mae mo hliwenkam de lowe henna insa aha-en gulku– dekam de Alap onak zere mo tim makan lowehe gwen hap. Hen neno mae mo gil-gilkim de lowe henna in dekam zep goltilki.
¹⁷ Zen in zep Kristus aha-ere enlalakam de lowehen hap de ol dawemna ansa nebe mae hap golhatazim zika– sap orep de Alapsa tame tan zini abe mae hap, hen sap Alapsa de tame tan srem wenya ebe mae hap.
¹⁸ In zep Kristus onakon, sap Yahudi zini ee, hen sap Yahudi srem zini em, Bian Alap onak hatankam– sap Kristus mes Alap mo Enhona kitak nebe mae hap hle ta sonezimki.
¹⁹ Zen in zep em Yahudi srem zini, em angkam zi mo enak de emas gwinzin zisi hom, hwena em an hen angkam lang bi tanganna– apdekam Alap mo hlil irin zi nibanye. Em mese lalak wenya in han eiye gwek.
²⁰ Nen an san de Alap mo gol. Men zen gola in mo moko makan enwe-mase gweꞌan, zen Kristus mo dam tasibin zi, hen Alap mo Enho nakore olsa de ayang gul gwizimdin hip de zi. Kristus Zena, Zen ngirin bol tenya Zen.
²¹ Nen de deban zeraha-en gwenkam, dekam zebe enwe-mase gweꞌan– san de Alap zere hap de golsa de ayang tabla song gwenna kiye, zao de lalak Zini Alap Zen gwe gwen hap.
²² Yahudi srem zini, em hen Kristus hun de zeraha-en gwenkam dekam ema hen gola iwe de gol te makan enwe-mase gweꞌan– men zewe Alap zere mo Enhona gwe gweꞌarake.