Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E settong malem, dhu taon saellana Rato Nebukadnezar marenta, salerana asopenna. Sopennana jareya maposang panggaliyanna, sampe’ ta’ bisa asaren pole.
2 Daddi rato jareya laju makon oreng ngolok para tokang ramal, kang-tokang seher, kon-dhukon ban reng-oreng se andhi’ elmo, epakon nerrangngagi mempe jareya.
3 E bakto reng-oreng jareya manjeng e ajunanna, rato adhabu, "Sengko’ amempe, ban tang ate posang polana terro taowa ka artena!"
4 Reng-oreng jareya mator ngangguy basa Aram, "Moga-moga junandalem eparengngana molja salanjangnga! Ngereng dhabuwagi dhimen ponapa sopennaepon junandalem, sareng abdidalem pas eterrangngagiya ponapa arte."
5 Rato adhabu, "Sengko’ la motossagi kantha reya: Ba’na kodu malae ka sengko’ apa tang mempe jareya, ban apa artena. Mon ba’na ta’ tao, bi’ sengko’ ba’na ethok-ketthoga, ban bengkona epagujura.
6 Tape mon ba’na sanggup, bi’ sengko’ eberri’ana opa se gus-bagus sarta kahormadan se raja. Lalla, mara sateya kabala ka sengko’ apa tang mempe jareya ban apa artena!"
7 Reng-oreng jareya nyaot pole, "Ngereng dhabuwagi dhimen ponapa sopennaepon junandalem, sareng abdidalem pas eterrangngagiya ponapa arteepon."
8 Meyarsa jareya rato adhabu, "Teppa’ ca’na parsangka’an sengko’. Ba’na pera’ lor-ngolor bakto malolo, sabab ba’na tao ja’ sengko’
9 ngokoma ba’na kabbi kalaban cara se padha mon ba’na ta’ sanggup malae sengko’ apa tang mempe jareya. Ba’na amopakat terrosa co-ngocowa sengko’ polana ba’na gi’ ngarep sengko’ ngoba’a tang potosan. Lalla, mara, kabala apa tang mempe jareya, sopaja sengko’ tao ja’ ba’na bisa nerrangngagi artena."
10 Para ahli jareya mator, "E dunnya ka’dhinto ta’ kera badha oreng se oneng nerrangngagi ponapa se ekasokane junandalem gapaneka. Sarengngan pole, ta’ oneng badha rato, sanare rato raja sareng molja, se makon kadi ka’dhinto ka para tokang ramal, dhukon seher sareng reng-oreng se gadhuwan elmo e karatonnepon.
11 Se ekasokane junandalem barang se talebat malarat. Tadha’ oreng se bisa’a alampa’agi papakon gapaneka kajabana para diba, namong para diba ta’ akompol sareng manossa."
12 Meyarsa ator se kantha jareya rato talebat dukana, laju makon sopaja reng-oreng se andhi’ elmo e nagara Babil epate’e kabbi.
13 Papakon jareya eomommagi, daddi sakabbinna oreng se andhi’ elmo, tamaso’ Daniyel ban ca-kancana esare, epateyana.
14 Daniyel laju manggi’i Ariyokh, pamimpinna pangawalla rato, se la asadhiya mateyana reng-oreng se eokom jareya. Kalaban te-ngate Daniyel atanya ka oreng jareya
15 arapa rato me’ makalowar papakon se kerras kantha jareya. Bi’ Ariyokh Daniyel ebalai apa se la kadaddiyan.
16 Daniyel laju duli ngadhep ka rato sarta nyo’on eparenge kasempadan nerrangngagiya artena mempe jareya.
17 Parnyo’onanna Daniyel ekabbuli, daddi Daniyel pas gubar ka kalenggiyanna sarta laju nyareta’agi sakabbinna kadaddiyan jareya ka Hananya, Misa’el ban Azariya.
18 Daniyel makon kancana se katello jareya adu’a ka Allah e sowarga sopaja Allah bellas ka se katello jareya ban apareng oneng apa roseyana mempe jareya. Kalaban cara se kantha jareya bisa malopot se kaempa jareya dhari okomanna rato, ta’ epate’e akantha reng-oreng se penter laenna.
19 E malem jareya keya Allah marenge oneng parkara roseya jareya ka Daniyel e dhalem pangaton. Daddi Daniyel amolja’agi Allah e sowarga,
20 dhabuna, "Allah reya bicaksana ban parjuga, molja’agi Salerana salanjangnga!
21 Salerana se neptebbagi mosem ban bakto, se magulu’ ban ngangkat pangobasa. Salerana se apareng kabicaksana’an, bariya keya pangarteyan.
22 Salerana se mokka’ roseya se ce’ dhalemma. Allah ngagali pa-apa se kadaddiyan e pettengnga. Salerana katotoban sonar se tera’.
23 Guste Allah, sasemba’anna bangatowa abdidalem, abdidalem amolja’agi sareng ngagungngagi Junandalem. Sabab Junandalem marenge abdidalem hekmat sareng kakowadan. Parnyo’onan abdidalem sareng Junandalem ekabbuli, jawaban kaagem rato sareng Junandalem eduduwagi."
24 Saellana jareya Daniyel pas manggi’i Ariyokh se eparenta’agi mate’e reng-oreng se andhi’ elmo e Babil. Dhabuna Daniyel ka oreng jareya, "Ja’ pate’e reng-oreng se andhi’ elmo ka’issa’. Tore kaula bakta’agi ngadhep ka rato, kaula ngatorana oneng ka rato artena mempe ka’issa’."
25 Ariyokh pas duli ngater Daniyel ngadhep ka Rato Nebukadnezar, pas mator, "Abdidalem ampon manggi e antaraepon oreng buwangan Yahudi settong oreng se oneng nerrangngagi sopennaepon junandalem."
26 Rato laju adhabu ka Daniyel se ejulugi Beltsazar, "Apa ba’na bisa abala ka sengko’ apa tang mempe ban apa artena?"
27 Atorra Daniyel, "Guste, tadha’ oreng se andhi’ elmo, dhukon seher, tokang ramal otabaepon ahli parbintangan se oneng ngatore oneng parkara ka’dhinto ka junandalem.
28 Namong e sowarga badha Allah se mokka’ sadajaepon roseya, ban Salerana ampon apareng oneng ka junandalem ponapa se kadaddiyana e budhi are. Samangken, abdidalem nyo’ona edi nerrangngagiya parkara sopenna sareng pangaton se etarema junandalem e bakto asaren.
29 E bakto junandalem asaren, junandalem asopenna parkara jaman se bakal dhateng. Allah se mokka’ sadajaepon roseya noduwagi ka junandalem ponapa se bakal kadaddiyana.
30 Roseya ka’dhinto ampon eduduwagi ka abdidalem banne polana abdidalem apenterran dhari pasera’a saos, namong sopaja junandalem ngagaliya arteepon sopennana junandalem gapaneka, sareng ngagaliya jugan parkara esseepon panggaliyanna junandalem.
31 Ka’dhinto pangaton se eoladi junandalem: E ajunannepon junandalem badha arca; arca gapaneka ce’ rajana, sareng tera’ mancorong, namong robaepon nako’e.
32 Cethakkepon dhari emmas morne, dhadha sareng lengngennepon dhari salaka, teng-keltengan sareng bangkongngepon dhari dimbaga,
33 pokangngepon dhari besse, sokoepon sabagiyan dhari besse ban sabagiyan dhari lempong.
34 E bakto junandalem kalerressan mandeng ka arca gapaneka, badha bato gaggar dhari penggirra gunong ta’ kalaban badha oreng se nyedding, bato gapaneka ngenneng ka sokona arca se dhari besse sareng lempong ka’dhissa’, kantos lejjar.
35 E bakto gapaneka jugan arca gella’ robbu pas daddi tombuganna besse, lempong, dimbaga, salaka sareng emmas se ampon ancor lejjar akadi abu e kennengngannepon pagebba’anna gandum e mosem panas. Tombugan ka’dhissa’ eabber angen, kantos tadha’ lampadda sakale. Namong bato se magujur arca gapaneka daddi raja akadi gunong sareng mossa’e bume.
36 Gapaneka sopennaepon junandalem, ban samangken abdidalem nerrangngagiya ponapa arteepon.
37 Junandalem ka’dhinto ratona rato; junandalem se paleng kobasa. Allah e sowarga marenge junandalem karaja’an ka’dhinto, kakobasa’an, kakowadan sareng kaagungan.
38 Junandalem epangobasae bagiyannepon dunnya se badha pandhudhu’epon, sareng epangobasae mano’ sareng burun alas laennepon. Junandalem dibi’ se eparsemmonnagi sareng cethakkepon arca se dhari emmas ka’issa’.
39 Namong saamponnepon karaja’annepon junandalem napa’ ka anggannepon, bakal badha’a karaja’an laen se rajana ta’ kantos akadi karaja’annepon junandalem. Saamponnepon gapaneka bakal badha’a pole karaja’an se nomer tello’ se eparsemmonnagi sareng bagiyan se dhari dimbaga e badannepon arca gella’, se bakal ngobasa’ana saantero dunnya.
40 Saamponnepon gapaneka badhi badha’a karaja’an se nomer empa’, se kakowadannepon akadi besse. Akadi besse se malejjar sareng maancor ponapa’a saos, sapaneka jugan karaja’an se nomer empa’ gapaneka badhi malejjara sareng maancora karaja’an en-laennepon.
41 Soko sareng garigi’epon sokona arca gapaneka se sabagiyan dhari lempong ban sabagiyan dhari besse ka’dhinto, noduwagi ja’ e bingkeng are karaja’an gapaneka bakal aca’-pecca’a. Karaja’an gapaneka badha kakowadannepon jugan sabab lempongngepon acampor besse.
42 Gi’-garigi’epon soko se sabagiyan dhari besse ban se sabagiyan dhari lempong gadhuwan arte ja’ badha bagiyannepon karaja’an gapaneka se kowat ban badha se ta’ kowat.
43 Camporannepon besse sareng lempong gapaneka nandha’agi jugan ja’ karaja’an gapaneka badhi aehteyar makowada aba’epon kalaban akabin campor, namong ehteyar gapaneka tadha’ ollena, akadi besse ta’ bisa acampor sareng lempong.
44 E jaman pamarenta’annepon to-rato gapaneka, Allah e sowarga badhi maddek settong karaja’an se bakal ngadegga salanjangnga, ban ta’ oneng bisa epakala’a sareng bangsa se ka’dhimma’a saos. Karaja’an gapaneka bakal makala’a sadajana karaja’an laennepon.
45 Junandalem gu ta’ ampon ngoladi ja’ sanare tadha’ se nagguk, badha bato se locot dhari penggirra gunong ngenneng ka arca se dhari besse, dimbaga, lempong, salaka sareng emmas ka’dhissa’ kantos arca gapaneka lejjar? Allah se agung anyata’agi ka junandalem ponapa se badhi kadaddiyana e bingkeng are. Sopenna gapaneka kengeng eparcaja ban katerrangan abdidalem ka’dhinto lerres."
46 Rato Nebukadnezar pas asojud e ajunanna Daniyel sarta marenta’agi sopaja Daniyel ehormadi ban sopaja oreng ngatorragi kurban obbaran ban tor-ator laenna kaangguy Daniyel jareya.
47 Rato adhabu, "Onggu, Daniyel, Allahna ba’na jareya Allah se paleng raja e antarana sakabbinna allah. Salerana jareya se ngobasane sakabbinna rato, ban se mokka’ sakabbinna roseya. Sengko’ tao jareya polana ba’na sanggup nerrangngagi artena roseya jareya."
48 Daniyel pas eparenge pangkat se tenggi, sarta eparenge rang-barang se gus-bagus sabannya’na, Daniyel pas epajumenneng gubennor Babil, ban epadaddi pamimpin se paleng tenggi kaangguy sakabbinna panasehadda karaton.
49 Tape rato ngabbuli parnyo’onanna Daniyel sopaja pamarenta’an e propinsi Babil jareya epassra’agi ka Sadrakh, Mesakh ban Abednego, dineng Daniyel dibi’ alenggi e karatonna rato.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA