¹ Timotius Bak, ee ola ansa Alap mo nwenake ebe hap hli yulbluꞌan– hen Kristus Yesus mo nwenak, men Zen sa zere mo irik ginsi golhata zalake. Zen sa dekam juwen wenyaka hen nama de engaya gwen wenyaka klis gul zula. Zep Timotius Bak, Eirzi-Bia yawal mo nwenak ee ama emsa gubluꞌan:
² Alap mo olsa em tonbirida tine gwen– sap sane gwen hap de edwam gwennak, sap edwam gwen sremnak. Emki dekam oto tasik gwibin, hen udobe naban jalse gwibirida gwen, hen titi ta gwibin, hen ol sin-sinkim em dawemkam tawa ta gwibin.
³ Sap molya holo gwek, dekam sa zini anakarekam lowehe gwer: Eiwa de tawa tabinsi de esane gwenna sa baes tal, hwena zen guru-guru esesa sa beyakam deibirida gwer. Desa sa hwena nenbirida gwer, “Asa ere mae mo dwam gwibin en san tawa la gwibik.” Zep sa hendep zere mae mo hole-hle en san tawa da gwibir.
⁴ Zen dekam sa hwena eiwa de olsa de esane gwe-gwen hap zeno mae mo ini emat-mat gwizim. Hwena auyan-aza zik mo epba olsa sa sren li nul sone gwer– dekam de zere mae mo dwam gwibin derek san dep syan nahlan hap.
⁵ Hwena Timotius Bak, emki enaka kara ta gwen. Kareksa de goltowe gwennak tatem em zauk gwen. Yesus mo bosesa de salbin srem zi sin dep emki engaya gwen hap de ol dawemsa golzim halada gwen. Em Alap mo nganak de syal gwe-gwen zi, zep syala insa dawem enkam em sul sonen.
⁶ Sap ee nabakam asa emsa hli tal, hen ano kala nabakam sa wet sol– men kiye, dombasa de Alap hap zip soblanna.
⁷ Ëe mese ere mo syala sul sonek. Ëe jana zi mo kime Yesus hup de ol dawemna golasas gwe-gwek. Yesussu de taibliblan nakon home mae syalhek.
⁸ Ëe insa kirekam tatem zauk gwek, zep angkam abe hap de mire sigina Bian man ap golkara gweblaꞌara. Yesus Zen dam-dam enkam de klis gun hup de Zini Zen. Zen kim de nesa klis guꞌun zaka, Zen dekam sa abe hap golblala. Abe en hap molya golblaka, hwena tingan men zen zere mo lwa halzan hap de yaklana anakan enlala ne gweblaꞌanke, “Diki nabakam zen ki lwan,” Zen zebe mae en hap sa kap tazimdi.
⁹ Emki dawemkam alp gwen– dekam de nabakam asa duweblazan hap.
¹⁰ Sap Demas Bak mes asa hli ta guk halka. Zen auhu-kamana ansa ensa lwa gwibiꞌira, hendep zep Tesalonika san dep heya gweka. Ëe mese Kreskes Baksa Galatia san dep zer sonek. Hen Titus Baksa Dalmatia san debe zer sonek.
¹¹ Lukas Bak en hane nama eꞌan. Markussu kwang ta kinzi. Sap zen airis– ano tahasa de tri son hapye.
¹² Ëe mese Tikikus Baksa Efesus sun dep zer sonek.
¹³ Song gwe zankam, Troask ano baju sal-sala teisya kinzi. Karpus Bak mo golake hli sok. Hen ano bukuna lop ta kinzi– nonol tangan dawem-dawem wenyaka.
¹⁴ Tembaga nakon de kire-kire yang ta gwibin hip de zini in, Aleksander Bak, zen mes asa dawemkam karek taka. Hwena zen sa Bian onakon hlaulu.
¹⁵ Em hen em terya-tya gweblan, sap zen serkam neno mae mo tawa tabinsi husus gwe-gwibiꞌira.
¹⁶ Pemerinta mo mam-mamna kim nonol asa taken-taken neblak, dekam zini hom tangan asa nerzauk sonek. Tingan man asa hli da gukhak. Dikire Alap zeno mae mo karekna insa tap gulsuzimk.
¹⁷ Hwena Bian Zen zep asa golek de ta zaka, hen sosonna ap golblaka– dekam de zere hap de ol dawemna insa sowe henkam Yahudi srem zini insa tonbiridan hapye. Bian dekam zep asa zeno mae mo jana ngi nakon zeser soneka– ee dikim etan engaya gwen hap de ol dawemna insa tingare Yahudi srem zi hip golluwe gwizimdin hipye.
¹⁸ Zep Bian Yesus sa tingare zi mo jala kon asa hil ti sone gwera, hendep Zen sa asa drene sera– zere mo irik ginnik de gwe gwen hapye. Dikire zere mo bosena teip nulsuk gweblak– hendep denaban! In eiwa.
¹⁹ Priskila ne Akwila neka guzim, hen Onesiforus mo golak men zen lowehe gwenan, desa kitak anakan gubirida, “Paulus dawem ensa ep gol sonezimki.”
²⁰ Erastus Bak Korintusk gweka. Hwena Trofimus Bak man sang-sang gweka, zebe Miletusk hli tak.
²¹ Bahem dakal gwen, ki hwena hi ngep tamle gwennak esa song gwe zala. Yubelus Bak, Pudes, Linus, hen Klaudia Bak dawem ensa ebe hap nol soneblak. Hen kirekam– tingare awe de aya-wal oso wal omye.
²² Dikire Bian emsa zergwe gwek. Hen kitak em in zen iwe lowe heꞌan, dikire Bian mo kwasang-kwasangna ebon mae onak lwa gwek.