¹ Zen zep, tane tol, emki Kristus onakore kwasang-kwasangnak tatem zaun.
² Mensa abon onak zi beya mo ngirinnik sane gwe-gweka, zen desa em hwena aha zi hip etan ayang gul gwizimdin. Ere mo anakarekam de taiblibiridan zi hip em ayang gul gwizimdin, “Zen sa hwena aha zi hip etan ayang nul gwizim.”
³ Anakare enlala naban emki tatem zaun: “Ëe an hen zen ahana– Kristus mo jana nabare zi niye. Ëe sap asa hen zebe hap de jal hap karekna goltowe gwer.”
⁴ Jana nabare zini zen mam zik mo gubiridan en san ang ta gwenan. Zen bejen aha syalak ehir-hir gwen, sap zen man mam zik dikim sam gwesibirida gwen hap edwam gwe-gwenan. Zep emki hen kirekam nere mae mo Mamna Kristussu enlala gwe-gweblan.
⁵ Men ki hen bolasa de asyas gwe-gwibin zini: Zen de peraturan san ang ta gwen sremkam, zen bejen asyas hap de hadiana insa gul irin.
⁶ Ahana hen ki: Nga syal gwe-gweblan zini, syal-syal wenya, zen zen sa lamkam ngana in kore eini dawemkam gul iri.
⁷ Ano ola ansa emki enhonak lonen. Alap dekam sa ebe hap golblala– dekam de kitak tame gun hup denaye.
⁸ Em de tatem zaun hup, diki Bian Yesussu em anakan enlala gwe-gweblan: Zen teipsin zini Daud Bak onakon saltilki, hwena Desa man dak. Hwena Alap zep etan tin nikon ngaya taka– ee men kirekame zebe hap de ol dawemna gol halada gwenanke.
⁹ Ëe in hen zebe angkam jal zi makan bwinak awe karekkam gwe gwenan. Hwena Alap onakore ol dawemsa bejen bwinak mat gulsun. Zen wet sonkam.
¹⁰ Hwena ee an zebe anakare enlala hohle tan naban gwe gwenan, “Ëe sap asa karekna goltowe gwer. Diki mensa Bian Alap Kristus onakon de engaya gwen hap dam tasibirki, zen dikire kitak Bian zere mo serkam de ngatannak yaing gwek– zao deka hendep denaban lowehe gwek.”
¹¹ Zep nen dikim tatem yaun hup, Kristen zini neno mae mo kirekam de taiblibinni ansa nen enlala ei gwibin: “Kristus sa nesa hendep denaban golelowehe gwera– nen de anakan eenlala gwe-gwenkamye, ‘Yesus kim tilki, Zen abane lik.’
¹² Nen de tatem ezaunkum, nen esa lamkam Yesus zere mae han irik il gwer. Hwena nen de zi mo inik Yesussu anakan zabeblankam, ‘Ëe an Zebon de ang gwe-gwen zisi hom,’ ki hwena Zen hen sa nesa gubiridala, ‘Zen Asa de ang gwe-gweblan zisi hom.’
¹³ Nene Yesussu de taibliblan nakon etan esin gwe hanaꞌak, hwena Yesus nama sa zere mo nesa de gu-gubiridan ola syal gwe-gwibir-zimdi. Sap Zen hom wet gwesik gwenda. Zen sa nesa etan tatete ta gwibiri.”
¹⁴ Emki Kristen zisi anakan enlala sobirida gwen, “Ëe Bian Alap mo nwenake emsa titi tabiꞌin: Bahem Alap mo olak de ol-gunsu keisa-keisa gwe-gwibin.” Kirekam em titi ta gwibin, sap kirekam de keisa-keisa gwibinni, zen waba hap. Sap zen kire nakon zere mae mo Biansa de taibliblan nakon ealtil gwenan.
¹⁵ Dawemkam emki alp gwe-gwen– dekam de Alap emsa anakan sam gwesik gweblan hap, “Zen dawem enkam ano nganak syal gwe-gweꞌara.” Dam-dam enkam em Alap onakore ol dawemkam tawa ta gwibin. Dekam em molye zere mo nwe kara gwennak saher gweka.
¹⁶ Auhu-kama enlala zi mo totore tawa tabinsi emki langa gulsun. Sap kire ol san de ang tankam, dekam zini Alapsa man langa dasik gwenan.
¹⁷ Kirekam de tawa tabinni, zen men kiye– kwae yala. Himeneus ne Piletus ne zen kirekam de kwae naban.
¹⁸ Zen mes eiwa de ola kon olsyal heka– anakan de yasik la gwibinkim: “Kristus molya emsa juwen nakon ngaya tabirki, sap zisi de kirekam juwen nakon ngaya tabin hip dena mes lwak.” Zeno nik mo ol san de ang tankam, zep hendep ahakon Kristussu de taibliblan nakon etan lwan dahak.
¹⁹ Hwena nen de ze tatem ezauk gwen hap dena, Alap mes ngirin gol te makan Kristussu nebe mae hap ik tizimki. Zebon onakon zebe anakan dam ulsuk gwenan, “Bian mes zere mo hlil irin wenya neno mae mo bosem-sena kitak tawa gwibiridaka,” Ahana dam gulsunnu hen anakan, “Men zen egu gwenan, ‘Ëe an Biansa de ang gwe-gweblanna,’ hwena karek gol gwensa zen baes tan.”
²⁰ Men kiye, te-ala beya zi mo golak de piringni: Ahakon emaskam dena hen perakkam dena. Hwena ahakon hen ki totore piringni– kama ngatdarakkam dena hen tenya korena. Totore piringni, zen mwin-mwankam dep dena. Hwena dawem-dawem wenya, zen tembane yawal ennak dep dena.
²¹ Zep hen kirekam, men nara zere mo enhosa kirekam-kirekam karek nakon lalak tanna, zen sa Alap mo nwenak gwera– san de emaskam de piringni kiye. Bian sa desa sam gwesiblila, hen syal dawemsa sa zep wei yul soneblala, sap zen kire hap mes hohle gweka.
²² Zen in zep, Timotius Bak, emki wal sei-siwir mo hole-hle enlalana langa tasik gwen. Hwena a kire orasa em te gweblan: Dekam de dam-dam enkam gwe gwen hap dena, Biansa dikim dawemkam taibliblan hap dena, dekam de aha zisi kwasang gwibirida gwen hap dena, hen aha-ere enlalakam de lowehe gwen hap dena. Sap tingare zini men zen enho zon tasiblin naban Bian Yesussu betek ne gweblanan, zen kirekam lowehe gwenan.
²³ Enlala joblo-top zi mo ekeisa-keisa gwe-gwen san em bahem ang gwe-gwen. Zen waba hap. Ena tawana: Zen dekon zini edarak gwe-gwenan.
²⁴ Hwena Bian mo nganak de syal ta gwen zini, nen bap nen edarak gwe-gwen, hen bap nen nabakam jal ta gwen. Nen diki enlala sae-sae naban nen eiwa de enna kim tawa ta gwibin.
²⁵ Zini men zen nebon mae onakon edrak gwe inehal gwenan, nen hwena ol sin-sinkim nen etan eiwa de ora san dep titi ta gwibin. San ha dekam Alap sa zebe mae hap dekam de ehalen hap dena golzimdi– hen eiwa de ora san dikim etan lwanda han hap denaye.
²⁶ Zen eiwa mes dowal mo kigi mo zolak ekyanhek, in zep zeno dwam gwibin sin ang ta gwenan. Hwena nen de kirekam mas gwibirida gwenkam, Alap wehe golzimꞌinka? – dekam de enlala mamakna insa tapbla tan hap denaye.