¹ Angkam aya-wal oso-wal, ee ama edwam gweꞌan em de hen ansa etawa gwen hap: Alap zere mo kwasang-kwasangna mamkam propinsi Makedoniak de Kristen zi mo enhonak ing gul sonezimki,
² zep hendep zeno mae mo enhonak isrip-srina serkam tangan mam gwek. In zep zen te-alana beya tangankam tagam dak– dekam de Yerusalemk de Kristen zi tahalhasa mas gwibiridan hapye. Hwena zen hen sap karekna mamkam noltowe gweꞌan hen tahalha tanganna.
³ Ëe eiwa denake emsa gubiridaꞌan: Zen kim Bian onakore kwasang-kwasang hap beya tangankam tagam dak, zena hwena man tangan etan etahalha gwek. Ëe sap home desa enbiridak– te-alasa de zen hen zer sonezimdin hipye.
⁴ Hwena zen asa nenbirida gwek, “Ëe hen ama Yerusalemk de nere mae mo Kristen aya-wal oso-walsya de mas gwibiridan hap edwam gweꞌan– men kirekam hen aha langnak de zini ekalang gweꞌanke.”
⁵ Hwena zen kim kire hap ola aha-en nuk, zen ein hom kirekam syal neibik. Zen nonol zere mae mo lowe hensa kitak Bian hap anakan yaing nilblik, “Bian, ere mae mo lowe henna kitak eno tahanake onne seꞌan, sap ee ama Yerusalemk de tahalha zisi mas gwibiridan hap edwam gweꞌan.” Hen dekam zep asa nenbiridak, “Men kirekame asa enbiridaꞌak, ee asa ki desan ang tal.” Zen kitak Alap mo dwam gwibin sin ki lwak. Hendep ee hen ama tangan lenggwanbiridak.
⁶ Ëe in zebe hen Titussu enblak– dekam de Korintusk de zini emsa etan amjanbin hipye, Yerusalemk de Kristen zi tahalhasa de kwasang gwibiridan hap de syala insa ekakim su kul sonek, ee de ahakore naban goleyaing gwezan sremnak. Sap Titus zen zen nonol kire hap de syal hap emsa titi tabirki. Zen zep sam gwesiꞌira– zen de etan kire hap de syala insa eban mae zisul sonen hapye.
⁷ Sap em eiwa mese tangan dawemkam eKristen gwek: Em serkam tangane Biansa laibli gweblaꞌan. Hen eno mae mo ol toranna soson tanganna. Hen eno mae mo tame gunnu mes tangan esek gweser. Alap hap de syalsa de gon hap em hen syal-syal tanganna. Hen em serkame asa kwasang eibirida gwenan. Sap em mese kirekam tangan esam gwesik, zep angkam emki hen tahalha zisi de kwasang gwibirida gwen hap de syalak esyal-syal gwen.
⁸ Kirekam insa ep ale gulzimk, ee anakan home kim emsa tik-tik tabiꞌin, “Em hen te-alana olzimk.” Hwena ee ama kim emsa anakan akasibiridaꞌan, “San ha zen hen sa Makedoniak de Kristen zi mo kim tingare enho naban tahalha zisi hen kwasang neibiridal?”
⁹ Sap em mese Bian Yesus mo kwasang-kwasangna tame uk: Zen sap nonol ngatan zi mo langnak tahalha sremkam gwe gweka. Hwena nebe mae hap de kwasang hap desa kitak hli yulku– dekam de tahalha zi mo kim awe gwe gwen hap. Zen mae hap ki kirekam gweka: Nen dikim hen lamkam ngatan zi mo langnak zere mo kim sowehen tangankam lowehe gwen hap.
¹⁰ Zep ee ama ere mo enlalasa ebe mae hap zer sonezimꞌin: Dawemna, mensa nonol tahunkam ena kon eisibir hanak, emki sul sonen. Tahalha zisi de mas gwibiridan hap de ekalang gwenkam, eme enonol gwek, hen te-alana nonol eme sap tagam lak.
¹¹ Zep emki ere mae mo ekalang gwenna insa sul sonen. Sap em ema ekalang gwen hap esyal-syal gwek, zen in zep emki angkam de sul sonen hap ealp gwen. Men kire enkam Alap ebe mae hap gol gwizimꞌira, zeno hlik naka emki ing gul gwen– men kire enkam ena edwam gweꞌanke.
¹² Sap em de mas gwibiridan hap ehohle gwenkam, Alap sa emsa anakan sam gwesibiridala, “Zen man mas gwibiridan hap edwam gweꞌan.” Betekkam de ing gun zisi Zen sa anakan tawa gwibiridala, “Zini an sap man beyakam de ing gun hup dwam gweka, hwena basa dep?” Sap zi de tahalha gwenna, Alap molya desa enlala gweblaka, “Zen maka mamkam ing gulu.”
¹³ Ëe home anakan dwam gweꞌan, “Korintusk de zini dikire etahalha gwek. Yerusalemk de zini tahalha sremkam de lowehek.” Hwena ee hwe-hwekam de enaka mas gwibirida gwen habe dwam gweꞌan.
¹⁴ Sap angkam em tahalha sremkame lowehe gweꞌan, zep em emaka mas eibiridaꞌan. Hwena aha tahunkam de zen tahalha sremkam lowe heꞌak, zen maka hwena emsa mas neibiridaꞌan– em de hwena etahalha gwenkamye. Zep em kirekam esa enaka mas eibirida gwer.
¹⁵ Zep men kirekam Israel Bak mo zi ausu nakore zini orep tahalha sremkam lowehe gwek, em tingare Kristen zini kirekam esa lowehe gwer. Sap Alap mo olak anakan lwak: “Men zen tembanena beyakam tagal dak, hwena hyanak hom mosrona zalta dep yal dak. Hen men zen betekkam tagal dak, hwena hyanak hom etahalha gwek.”
¹⁶ Ëe ama Alap hap dawemsa gol gweblaꞌan, sap Zen mes ere mo enho makare enlalana Titus Bak hap hen ing ta soneblaka. Zen zep ere mo kim syal-syal gweꞌara– emsa de mas gwibirida gwen hapye.
¹⁷ Zep ee kime desa emsa de amjanbin hip lakensiblik, zen man tangan sam gwesiki. Sap zena hen mes takensiblin sremnak emsa de etan amjanbin hip kalang gweꞌanka.
¹⁸ Titus hun nere mae mo aha oso naban sa asa ebon mae osan dep angirbirida zala. Zen hen dawemkam Kristus hup de ol dawemna tonbirida gwenda, zep desa hen man tingare jematna sam neisik gweblanan.
¹⁹ Hen awe de jemat-jematna mes zini insa dam dasik– zen de hen asa ang gwibiridan hap, te-alana insa dikim Yerusalemk dawemkam zerhatan hap. Sap kwasang hap de syala an, zen mae habe syal taꞌan: Bian mo bose dikim mam gwen hap, hen dekam de tingare zi nesa anakan tame tabin hip, “Zewe de Kristen zini in tahalha zisi de mas gwibirida gwen hap syal-syal tanganna.”
²⁰ Zep zini Yerusalem san dep beya tolkam sa ang tal– dekam de tingan asa anakan taiblibiridan hap, “Zen eiwa kitak sa neirzim. Zena molya mae nulink.”
²¹ Sap ano mae mo dwam gwenna, dam-dam enkam de syal tan hap– sap zi mo nwenak hen sap Alap mo nwenak.
²² Zi darena in hon ee asa hen zini ahana er soner. Ëe mese zini insa hen dawemkam akasik gweblak, zebe tame laꞌan, “Zen hen Alap mo syal hap syal-syal tanganna.” Zena man tangan sam gwesiki– desa de hen ang gwen hap dam tasinkimye. Sap zen man emsa taiblibiridaꞌara, “Korintusk de Kristen zini zen dawem-dawemna.”
²³ Titus zen ano syal bose. Ëe apdekame deban emsa syal eibiridaꞌan. Aha zi darena in, zen awe de jemat-jemat mo dam sosun zi dare. Zere nik mo en nakon tingan mes tame nosok, “Zen dawemkam Kristus mo bose hap syal e gwenda.”
²⁴ Zen in zep, amki hen zebe nikip kwasang-kwasangna oltrei gwizimk. Dekam sa hen awe de jemat-jematna zebon nebon onakon anakan esane gwer, “Men kirekam Paulus tonbirida gweka, Korintusk de Kristen zini, zen eiwa dawem-dawem tanganna.”