¹ Nen mese sap etawa gwek: Neno mae mo timni an, zen san de sohlas gola kiye– bohekam de ze okamana awe lowehe gwen hap dena. Zen gol kluk mo kim sa eklasak gwer. Hwena dekam neno mae mo ngatan zi mo langnak dep de timni hen ki. Zen hendep de gola zen– Alap mo syal gweblan zi niye. Zen zi mo syal gweblan golsa hom.
² Okama ennak dep de timni an karekna. Zen zebe serkam edwam gwe-gwenan– ngatan zi mo langnak dep de timsi de baju makan ala son hapye.
³ Desa de alala tankam, dekam neno mae mo angna molya irkare makan lowehe gwek.
⁴ Okamanak dep de kluk gol makare tim niban de nama lowehe gwenkam, nen dekam ema anakan eenlwan gwe-gwenan, “Awe de gwenna dohon tanganna. Diki hendep de tim niban de gwenna airis.” Hwena juwenkam nen home edwam gweꞌan– tim sremkam de ang en nik lowehe gwen hapye. Diki nabakam de ngatan zi mo langnak dep de timsi de ala sonna airis. Dekam awe en dep de timni ansa Alap sa owas hap hendep de engaya gwen hap de tim hip nep li yul sonezimdi.
⁵ Zen Alap Zen ki kirekam dep nesa hohle tabirki. Zen in zep zere mo Enhona nebe mae hap ing ta sonezimki– dekam de nesa anakan hamal hap gu-gubiridan hap, “Em esa eiwa ere mo Tane naban hendep denaban er gwe gwer.”
⁶ Nen in zebe enlala tatetekam lowehe gwenan, sap nen mese tame uk, “Okamanak dep de tim niban de nama lowehe gwenkam, dekam nen Bian onakon nama langanak.”
⁷ In zebe Biansa de anakan taibliblan enlala naban lowehe gwenan, “Mensa angkam hla kul srem gwe-gweꞌan, Zen desa sa lamkam nebe mae hap golzimdi.” Zep nen home nwekam de hlaul gwen wenya ansa dwam ei gwibiꞌin.
⁸ Zep nen enlala tatete nabane Biansa anakan laibli gweblaꞌan, “Zen eiwa ngatan zi mo langnak dep de timni sa nep lop tazimdi.” In zebe anakan edwam gwe-gwenan, “Angkam de timni ansa emaka hli kuꞌin– dekam de hendep de wenyaka gul irin hip– Bian zere hon dikim gwe gwen hap denaka.”
⁹ Zen in zep okamanak awe de nama lowehe gwennak, nen diki Bian de nesa sam gwesibirida gwen en hap nen ealp gwe-gwen– men kirekam esa hen wakuwe ealp gwerye.
¹⁰ Sap nen lamkam Kristus hon esa kitak aha-en aha-enkam yaing gwe-gwer, hen Zen dekam sa nesa takensibirida gwera, “Em banakarekam okamanak de tim niban gwe gweka?” Dawemsa de syal gwe-gwibin wenya kip, dawemsa sa golzimdi. Hwena karekna men zen syal nei gwibik, zebe mae hap hendep kareksa sa golzimdi.
¹¹ Sap ee mese Bian de kirekam nesa klis gun hup dena insa tame uk, zen in zebe ee, Bian mo nganak de syal ta gwen wenya, Alap han dikim zerumlae gwen hap de olkam titi la gwibirin. Alap Zena mes asa anakan tame tabirki, “Zen tingare enho naban ano nganak syal ta gwenan.” Zen in zebe hen edwam gwe-gweꞌan– em de hen kirekam asa tame ta gwibin hip.
¹² Ëe enaka de boltere tabin hip home ki kirekam emsa gubiridal. Hwena ee ama edwam gweꞌan– em dikim asa isrip-sri gwibiridan hap. Dekam aha zi de asa tonsubiridankam em emaka enbiridaꞌan, “Paulus wal bose wal zeban Alap mo nganak zere mae mo bosesa de mam gun hup hom golesyal ta gweꞌara. Zen tingare enho naban syal ta gwenan.”
¹³ Zep auhu-kama enlala zini sap sa asa anakan donsubirida gwer, “Zen in mamakkam syal ta gwenan.” Hwena ano mae mo enlalana anakan lwaꞌara, “Ëe sap asa zi mo nwenak saherak altil gwer, sap ee Alap en de asa sam gwesibirida gwen en habe syal ta gweꞌan.” Hwena em de anakan asa tame tabinkim, “Zen mamakkam hom syal taꞌan,” kirekam airis. Sap ee emsa de mas gwibiridan habe syal ta gweꞌan.
¹⁴ Sap ee anakare enlala nabane syal ta gwenan, “Kristus Zen nebe mae hap de kwasang hap te-lidak sonnak tilki.” Zep zeno kwasang-kwasangna man ano mae mo enhonak syal gwe-gwenan. Sap ee hen anakane etaiblik, “Kristus Zen tingare Alap mo hlil irin wenya nebe mae hap tilki, zep Alap mo nwenak Zen dekam nesa kitak golejuweka.”
¹⁵ Zen kirekam mae hap ki lwak: Nen dikim Zebon en onak lowehe gwen hap, nere mae mo auhu-kama enlala san dikim lowehe gwen srem hap. Zep Kristus mo nebe mae hap de tinni, hen Alap kim nebe mae hap de dawem hap tin nikon ngaya taka, nen bap nen desa asyas makan enlala gwe-gwibin.
¹⁶ Zen in zep, ee bejene angkam aha zisi auhu-kama enlalakam anakan enlala gwibiridan, “Zen mamna,” ahaksa, “Zen betekna.” Orep ee hen Kristussu auhu-kama enlalakam ama kil lik, “Totore zi.” Hwena angkam ano mae mo enlalana mes wet gwesiki.
¹⁷ Sap men nara Kristus hun zeraha-en gwenna, zen dekam sa jowera– san de aha zi, esena! Dekam epba enhona mes tap gweblaka, hwena angkam ese enho naban zergweꞌara.
¹⁸ Zen kitak Alap ki kirekam nebe mae hap syal gwe-gwibir-zimnira. Orep nen sap Alap mo jal zi mo kime lowehe gwek, hwena Kristus onakon zep nesa goleumlae gweka. Zen in zep hen abe mae hap syala wei yul sonezimki– zere han dikim zerumlae gwen hap de ol dawemna insa de gol halada gwen hap denaye.
¹⁹ Ëe in zebe ol dawemna ansa ol halada gwenan, “Alap Kristussu zer soneka– Zen de te-lidak sonnak okamanak de zi hip tin hip, Alap Zen dikim kitak nesa goleumlae gwen hap. Kristus hun de zeraha-en gwenkam, dekam Alap man neno mae mo karek-karekna eititi gwe-gwibirida.” Ëe kirekame ol halada gwenan, sap Alap mes ki Zen dikim goleumlae gwen hap de syala insa abe mae hap wei yul sonezimki.
²⁰ Zep ee an Alap mo dam tasibinni– Kristus mo bosekam de emsa kwang guludan hap dena, Alap Zen de emsa kwang guludan makan. Ëe in zebe emsa Kristus mo bosekam etan anakan titi tabiꞌin, “Alap han em zerumlae gwen.”
²¹ Sap Kristus Zen sap hom karek maena golka. Hwena Alap man gweblaka– san de kareksa de gol gwen zini kiye, neno mae mo karek-karekna kim kitak wei yul soneblakaye. Hen zen mae hap ki Alap kirekam syal gwibirki: Nen dikim Kristus hun de zeraha-en gwenkam zere mo nwenak edakastin hip.