¹ Zen in zep, sap Bian Alap zere mo kwasang-kwasang nakon mes kirekam syala abe mae hap wei yul sonezimki, ee in zebe enlala dowe hanan sremkam syal ta tine gwenan.
² Zep men zen zere mae mo tawa tabin karekna saher hap ber-ber nulida gwenan, ee kirekam home. Ëe home Alap mo ola men-man ul gwenan– dekam de zisi ere mae osan dep wan-wan ta gwibin hipye. Ëe hwena dam-dam enkame eiwa de enna kim hleng ososubirida gwenan– dekam de kitak de zi asa anakan tame tabin hip, “Zen dam-dam enkam Alap mo nwenak syal ta gwenan.”
³ Ëe zebe Alap onakore engaya gwen hap de ol dawemna ba maesa de ber-ber gun sremkam tawa la gwibirin. Hwena men zen tame nul srem gwe-gwenan, zen zen enwe-mase gwe-gwenan– san de kaen hakkam de nwesa tatak sonna kiye. Zen men zen juwen ora san ang ta gweꞌanke.
⁴ Okamana awe de boton alapna, dowal mo kigi, zen mes Yesussu de taibliblan srem wenyik mo nwena dimin tabir-zimki– zen dikim ol dawemna in mo ngatansa enhonak eisbin srem hap. Kirekam de gweibiridan sremkam, zen maka Kristus mo ngatan zi mo lang nakore sosonna tame nul gweꞌan. Sap Kristus Zen Alap zere han ki en.
⁵ Zep ee aen dikim emam gwen hap home ol halada gwenan– ahakore zini men kirekam egwe gwenanke. Hwena ee Bian Yesus Zen de mam gwen en hap denakae anakan ol halada gwenan, “Yesus Zen Teipsin Tangan Zini Zen.” Hwena zeno bosesa dikim mam gun hup ee mese egwek– san de ebon mae de ebabu gwen zini kiye.
⁶ Sap Alap men Zen okamana ansa de yang gulsun sremnak guku, “Kawesinni an kon ngatanna de jowek,” zep Zen mes hen kirekam neno mae mo enhona ngatan tabir-zimki. Menkam neno mae mo nwena tatak sonna hen enhona kawesinni. Hwena angkam enho nakon nen ema Yesussu kara la gweꞌan. Zen in zebe tame uk, “Kristus hun de zergwe gwenkam, nen dekame Alap mo ngatan zi mo lang nakore sosonna eis gwibiꞌin.”
⁷ Neno mae mo timni, zen sap kama nakon de yang tabinni, zep dawem naka hom. Hwena dekam de enho nakon engatan gwen hap dena insa Alap ing ta sonezimki, zen serkam de dawem tangaranna zen. Neno mae mo timni sap karekna, hwena olk, ngatan zi mo lang nakore nik ze gwe gwenda. Zen dekam zep dam gwesik gwenan: Sosonna men dekame syal ta gwenan, zen kitak Alap onakorena. Ëre mae mo tim nikore naka hom.
⁸ Ano mae mo jal zini sap beya tanganna, hendep zen man sap asa ngirin da gwibirin. Hwena Alap abe mae hap sosonna gol gwizimnira, ee zebe nama lowehe gweꞌan. Anakare ngalap enlalana hen ki sap abon mae onak hata gwenda, “Ëe banakan asa loweher?” Hwena ee dekam home enlalana anakan etopse gwe-gwenan, “Alap molya asa mas gwibiridaka.”
⁹ Zen karek tabin hip sap asa alp dasik gwibirin, hwena Alap hom asa da tasik gwibirida. Sap ki asa mos-mos ta gubin hip alp dasik gwibirin. Hwena Alap ap sosonna gol gwizimnira, zep asa timbwas dabir srem gwe-gweꞌan.
¹⁰ Ëe mese Yesus hun eraha-en gwek, zep ee tim niban de nama okamanak lowehe gwenkam zebe mwin-mwankam anakan eis gwibirin, “Nesa an hen Yesus mo kim karek da gwibirin, hendep zeno kim hen nesa damera gwenan.” Hwena sosonna men dekam Yesus etan ngaya gweka, zen hen man ano mae mo timnik lwa gwenan. Zep ahakon asa de hlauluda gwenkam anakan tame nul gwenan, “Zeno mae mo timni sap sin-sinni, hwena Yesus Zen engaya gwen hap de sosonna gol gwizimnira.”
¹¹ (4:10)
¹² Zep Alap mo nganak de syal ta gwen wenya ee insa kirekam juwen hap ealp gwesik gwenan, hwena em dekone engaya gweꞌan.
¹³ Alap mo olak zini man anakan ale gulku, “Ëe Alapsae taibliblak, zebe tonbiridak.” Ëe hen kirekame Alapsa laibliblaꞌan, zebe zebe hap dena airin sremkam lonbiridanda gwenan.
¹⁴ Sap ee mese Alapsa anakan laibliblak: Men kirekam Bian Yesussu tin nikon ngaya taka, zep nen men zene Deban eraha-en gwek, nesa hen kirekam sa ngaya tabiri. Zen dekam sa zere onak dep kitak nesa tagal gulsulu.
¹⁵ Zep ee de kareksa goltowe gwenna, zen airis. Ëe ama dekam esam gwesik gweꞌan. Sap zen dekame em anakan tawa ei gwibiꞌin, “Alap man angkam Yesus onakon nesa kwasang gwibirida gweꞌara.” Hwena etan beya tangan nik sa ebon mae onakon esane gwe-gwer, hendep zen de hen Yesussu taibli gweblankam, zen hen sa Alap hap dawemna nol gweblal hen bosena teip nulsuk gweblal.
¹⁶ Zen in zebe enlala dowe hanan sremkam syal tanda gwenan. Neno mae mo timni an sap man esin gwe hana gwenan, hwena Alap man neno mae mo angna mwin-mwankam tatete ta gwizimnira.
¹⁷ Zep ee insa awe karekna oltowe gwenan, zen jahalhana hen holo tangankam hom. Hwena ngatan zi mo langnak zen zep sa Alap dawemna abe mae hap dohon-hon tangankam golzimdi. Zen zen– hendep de wenya, hen mam tangan wenyaye.
¹⁸ Zep nen home angkam en dep de ba maesa enlala ei gwibirin– mensa okamanak awe hla kul gwenanye. Sap nwekam de hlaul gwenkam dena, zen hendep denaka hom. Hwena nwekam de hlaul gwen srem wenya, zen diki zen– hendep de wenyaye. Zen diki desa de dokwak gun hup nen dam-dam enkam hlu-hluk gwen.