¹ Timotius, emki hen gubiridan: Kitak men zen zi mo tana iltikinnik ebabu gwe-gwenan, zen dawemkam zen zere mae mo zi bina insa blikip gwesibirida gwen. Zi bina in de eKristen gwen sremna, desa hen dawem enkam zen blikip gwesibirida gwen– mae hap, zen dikim Bian Alap mo bosesa hen neno mae mo tawa tabin niban lamang so gwen srem hap.
² Zeno mae mo zi bina in de eKristen gwenna, dekam bap zen anakan eenlala gwe-gwen, “Ëe sap asa asang gwe-gwer. Molya asa karek taka.” Diki anakan zen eenlala gwe-gwen, “Ano zi bina an, zen ano Kristen bose. Ëe zebe kwasang gwe-gweblanan. Zep asa dawem enkam zebon syal gwe-gwer– ere mo Kristen bosena an dekakim dawemsa ano syala kon gulin gweka.” Zep Timotius, ano ola an, dekam kitak tawa ta gwibir hen titi ta gwibir.
³ Zep aha zi bap zen totore olkam tawa ta gwibin. Diki Bian Yesus mo ola ban de apde ne gwenna kim zen tawa ta gwibin– hen Alap hon dikim etal gwesin hip denakim. Sap zini men zen aha ol aisilkim tawa da gwibirin,
⁴ zen bolte-bolte zi, hen zen eiwa dena hom tangan tame nuꞌin. Kirekam de zini zen man tangan esam gwesik gwenan– Alap mo ola kore ol-gun maesa de gulsuk halasen gwen hapye. Zen hwena dekon zep zenaka husus neibirida gwenan, hen eol tetek gwe-gwenan. Zen dekon zep hen Kristen bose zeban zenaka lamang da gwibirin hen u seger da gwibirin.
⁵ Kire enlala hai zi mo tawa tabin nikon, zep hendep Kristen zi mo ngirinnik ol keisa-keisana nolzausuk srem gwe-gwenan. Eiwa de enlalana hom tangan– zebon mae onakye. Kire zini man tim nul gwenan, “Ano Alap mo nganak de syala kon, ee asa te-alana beya gwer.”
⁶ Eiwa, dawemkam de Alap hon enho nik tal gwesiblin zini, zen sap de tahalha gwen, hwena zen sa anakan eis gwibiri, “Bian Alap sowe henkam ano tahalhana ap sul sone gweblanda.” Kire zini zen sa Alap onakon dawemna hlaulu– sap angkam hen lamkam.
⁷ Sap nesa kim nere mae mo an walya auhu-kamanak ejaha gwe-gwenan, neno kire-kirena hom. Juwenkam hen molye kire-kirena lop la gwek.
⁸ Zep nebon mae de tembane erlwanna, hen pakean, zen syake.
⁹ Hwena ahakon hom kirekam dep edwam gwe-gwenan. Zen hwena kire-kire beya gwen hap edwam gwe-gwenan. Zep zere mae mo dwam gwibin sin de ang tankam enlala ngalap-ngalapna dekam zep tangan mam gwe-gwenan, hendep zep enlalana ejoblo-top gwe-gwenan, dekam zep hendep dowal mo kigi mo zolak ekyanhe gwenan. Zen in zep kareksa de gon hap bejen baes tan, hendep zep tangan etimbwas gwesik gwenan.
¹⁰ Sap karek-karek ausuna, zen te-alanak. In zep hendep ahakon te-ala hole-hle nakon Yesussu de taibliblan nakon ebutehak. Zere mae mo enlala ngalap-ngalapna in san de ang ta gwenna, zen dekam san de toman ben-benkam de enhonak zenaka dang gulblunna kiye. Hendep zep enlalana serkam edowe hana gwenan.
¹¹ Hwena Timotius, em in Alapsa de betek gweblanna. Zep em desan bahem ang gwe-gwen. Em em alp gwe-gwen– Alap mo nwenak de dam-dam enkam gwe gwen hap, hen Zebon de dawemkam tal gwesin hip. Kristussu de taibliblanna em esek gulse zahe gwen– zao en de tatem zaunkum. Emki hen wal bosyansa de kwasang gwibirida gwen hap alp gwe-gwen– hen aha zisi de sae-sae enkam golelowehe gwen hap.
¹² Em ngein en san em Yesus osan dep dam-dam enkam hluwen– ekakim hendep de gwen hap denaka dokwak gul. Sap zen desa de dokwak gun hup Alap emsa kwang taka, hen zen kire habe zi beyanak damnak enaka anakan kira taka, “Ëe ama Bian Yesussu ang gweblaꞌan.”
¹³ Zep engaya gwen ausuna Alap hen Kristus Yesus, men Zen Pontius Pilatus hon damnak Zenaka kira taka, zeno nik mo nwenake emsa titi taꞌan:
¹⁴ Ano titi tanna an san em dawemkam ang gwe tine gwen– tingare zi mo nwenak de enho kles gwesin sremkam gwe gwenkam, hendep Bian Yesus de lwahal zannak de zauꞌuk.
¹⁵ Yesus mo hatazan hap dena in molya bwal kinik. Zen sa ki hendep lwal– soson tangan Zini Alap zere mo gun sun. Zen Zen en tangan teipsinni. Hen Zen tingare bose nabare zi mo Mamna, hen tingare teipsin zi mo Teipsinni.
¹⁶ Zen Zen hendep de gwe gwen Zini. Zeno ngatannak toton nara dep? – golek de gwen naye. Desa zini hom mae hla dak, hendep angkam mae bejen hla tan. Dikire Desa hendep denaban blikip neisik gweblak, sap Ze-en sosonna! In eiwa tangan!
¹⁷ Emki te-ala beya wenyaka anakan jalse gwibirida gwen, “Bahem ebolte-bolte gwe-gwen, hen auhu-kama ennak de kire-kire ennak bahem eyaing gwe kini gwen.” Sap auhu-kamanak de te-ala maena zen nabakam ejek-jak gwe-gwenan. In zep em titi ta gwibin– zen de Alap ensa yaing gwebla kini gwen hap. Sap Zen Zen kae-kaena nebe mae hap mam gul gwizimnira– nen dikim enlala nik eoto gwesin hipye.
¹⁸ Zep emki gubirida gwen, “Eno mae mo kire-kirena beyana, zep em em aha zisi kwei yul sonendan– kitak de zi hip de dawemsa goltrei gwizimdinkimye.” Zep auhu-kama ennak dep de te-alakam, zen dikire ekae-kae gwe-gwek, hen aha zisi mas neibirida gwek.
¹⁹ Zen de kirekam egwe gwenkam, dekam zeno mae mo ngatan zi mo langnak de te-alana sa tangan ebeya gwer. Awe de lowe henna hen okamanak dep de te-alana, zen kitak au-au makan. Hwena wakuwe de lowe henna hen zao de kire-kirena, zen eiwa de tangan wenya zen.
²⁰ Timotius Bak, Alap mensa zere mo nganak de syal gwe-gwen hap emsa taibliblaka, desa dawemkam kara gul gwe. Totore tawa tabinni hen kire hap de ol gulsuk-gulsuknu langa gulsuk. Men zen auhu-kama enlala en san totore ola insa tawa da gwibirin, zen hwena man ekil gil gwenan, “An zen– enlalasa dikim langa tasin hip denaye.” Hwena zen boton.
²¹ Ahakon men zen desan ang tak, hwena dekam zep Kristussu de ang gweblan nakon ebutehak. Em in zene suratna ansa ulin gweꞌak, dikire Bian mo kwasang-kwasangna kitak ebon mae onak lwa gwek.