¹ Alap mo Enhona mes nesa damkam anakan tawa ta guk gwibirki, “Ngein sin de yaklanak zini sa Yesussu hli da gwer– dekam de hwena dowal onakore tawa tabin en san ang ta gwen hap.”
² Dekam yasik tabin zini men zen de dowal onakore ola insa nol halada gweꞌak, zen ek enkam sa anakan egu gwer, “Ëe an Alap mo syalsae gol gwenan.” Hwena zeno mae mo enhona mes tangan top-top gwizimki, zep zen bejen anakan tame gun, “Ëe an kareksae gol gweꞌan.”
³ Zeno mae mo tawa tabinni, “Wenya bahem gon. Zini bahem zen. Ansa bahem twinbin.” Hwena tingare tembane nwe-masena zen dwan twin gwibin hip am Alap nep syal gwibir-zimki. Zep nen men zene Alapsa laibli gweblaꞌan hen eiwa dena tame ul gweꞌan, nen sap esa olgwenblanda gwer– Alap hap de dawem golblan nabanye.
⁴ Sap tingan mensa twin gwibin hip dena Alap nep syal gwibir-zimki, zen kitak airis. Nen de nonol Alap hap dawemsa golblan naban twinbinni, dekam banakare maena hom– nen de dekon Alap mo nwenak ekun gwen hap denaye. Zep ba hap de aha tembane maesa baes gwibin hip, sap Alap mo olak man hen anakan lwak, “Tingare tembanena airis. Zen kitak ebe mae habe syal gwibir-zimk.”
⁵ (4:4)
⁶ Ano ola ankam emki Kristen bose omka tawa ta gwibin. Dekam esa gwera, Kristus mo nganak de syal gwe-gwen zini dawem tanganna. Sap Kristus mo nganak de syal gwe-gwen zini, zen diki eiwakam de tawa tabinnik zen zise gwen. Hwena ee mese emsa tame tak: Em ema angkam zise gweꞌara.
⁷ Em bahem Alap mo ol aisilsi de butwalen gul gwennak ang gwe-gwen– hen bong-bong mo tame gun boton ol sanye. Hwena enaka em tatete ta gwen– em dikim Alap en hon tal gwesin hipye.
⁸ Timsi de misrim-sri ginni, zen airis. Hwena zen angkam en dep dena. Diki Alap hon dikim tal gwesin hip de enaka tatete tanna, zen dawem tanganna zen. Sap zen angkam en dep hom. Zen hwena lamkam dep dena.
⁹ Eiwa de ola ansa emki dokwak gun hen dawemkam taiblibin:
¹⁰ “Nen Ngaya Zini Alap ensae blol eblaꞌan, sap Zen Zen tangan– zisi de ngaya ta gwibin hip de Zi niye. Tingan men zen Desa kirekam daibli gweblanan, Zen desa en sa ngaya tabiri.” Nen insa kirekam Alapsa blol eblaꞌan, zen in zebe nen angkam Kristus mo nganak dan syal-syala ban syal ta gweꞌan.
¹¹ Zep ano ola ankam emki tawa ta gwibin, hen dekam em titi ta gwibin– desan dekakim ang tak.
¹² Timotius, em nama home bong gweꞌara. Hwena aha zi bap zen emsa gublun, “In nama walas. Zen tawa naka hom.” Hwena emki enaka Kristen zi hip anakan erak ta gwizimdin, “A kirekam de ol toran mo Kristen zi hip sam gwesik gwizimnin. Kristen zini a kirekam nen lowehe gwen. A kirekam nen nenaka kwasang gwibirida gwen. Alapsa de taibliblannak de tatem zaunnu, zen a kirekam moye. Hen a kirekam nen enho lalakkam lowehe gwen.” Zep Timotius, emki kirekam enaka erak makan drene gwizimdin.
¹³ Ëe de nama lwa halzan sremnak, emki dan syal-syala ban Alap mo olsa baca gul gwizimdin, hen titi tabin niban em tonbirida gwen.
¹⁴ Emki enlala gwen– ebe hap kim Kristen zi mo nol-nola tahana dehabla inekke, Alap mo syalsa dikim ebe hap wei yul soneblan hap. Dekam Alap mo Enhona man zebe mae hap hamal hap de ola golzimki– ebe hap de desa ayang gulblun hapye. Hendep dekam zep Alap mo Enhona hen ebe hap sosonna golblaka. Zep Alap mo Enho nakore sosonna insa dawem en tangankam em gwirensin.
¹⁵ Zep em tingare ano ol tan-tanna ansa em syal-syal gwe-gwibin– zao en de enlala lwablankam, dekam deka kitak de zi emsa hla dak, “Zen dawemkam syal gwe seꞌara.”
¹⁶ Dawemkam em enaka kara ta gwen. Hen men dekam tawa ta gwibir, desa dawem enkam em karatda gul gwen. Kirekam de syal gwe-gwennak em tatem zauk gwen. Dekam esa enaka ngaya tala. Hen in zen emsa sane da gwenan, desa hen esa ngaya tabiri.