¹ Timotius, bol-zaun tanganna, emki tingare Kristen zini Alapsa de abe ta tine gwen hap titi ta gwibin. Zen tingare zi hip zen abe ta gwen– Alap dekakim desa mas gwibirida gweka, hen dawem ta gwibirki, hen tahalhasa dekakim sul sone gwizimki. Deban dikire Alap hap dawemna nolbla tine gwek.
² Zen dikire teipsin-teipsin wenya kip hen abe da gwek– hen tingan men zen zeno mae mo irgwa taha nakon irik nil gwenanke. Zen mae hap: Nen dikim aha-ere enlalakam hen umlae enkam egwe gwen hap, hen zen de neno mae mo Alap mo nganak de syalsa tru-tru gul gwen srem hap, hen aha zi dikim nesa husus gwibirida gwen srem hap.
³ Kirekam de abe ta gwenna, zen man nesa de ngaya tabin hip de Zini Alap mo nwenak sam gwesik gwenan.
⁴ Zen man sap tingare zi de hendep denaban engaya gwen hap de orasa dam tasin hip dwam gweꞌara– hen eiwa denaka de tame gun hupye.
⁵ Sap Alap Zen aha-en. Hen men Zen nesa Alap osan dep zon guluda gweꞌara, Zen hen aha-en: Zen Kristus Yesus.
⁶ Sap Yesus Zen mes tingare zini neno mae mo karek-kareksa dikim ngan gulsuzimdin hip Zenaka zerguku. Zen kirekam Alap mo kalang gwe gun sun ki lwak– dekam de tingare zisi anakan gubiridan hap, “Ëe ama sap em de engaya gwen hap dwam gweꞌan.”
⁷ In zep Alap anakan asa dam tasiki, “Ëngaya gwen hap de ol dawemna ansa em Yahudi srem wenya kip golzim halada gwen. Eiwa de ora san dep em titi tabirida gwen– dekakim zen hen Yesussu daibli gweblak.” Zen eiwa tangankam asa dam tasiki. Ëe bejene boton gwen.
⁸ Ëe zebe dwam gwibiridaꞌan– zikim dena, zen de kitak enho kles gwesin sremkam Biansa abe ta tine gwen hap. Kim de nen sone gweblak, jalsa de lam gun nuban bap zen, hen aha zi niban de keisa-keisa en hap de enlala naban bap zen.
⁹ Hen we walya, ee ama desa dwam gwibiridaꞌan: Zen sap sa enho oto tasin niban zere mae mo timni weir nulsuk gwer, hwena bolamda gwen enlala naban bap zen, hen zi dikim hole gwibin hip de enlala naban bap zen. Te-ala mamkam de teisyan pakeanna, hen te-ala mamkam de kap tan sasyan maena, hen emas maena, desa bap zen kire enlala naban alala ta gwen.
¹⁰ Diki Kristen we walya, Alap mo nwenak de dawemkam wer gwenna, zen diki dawemsa zen tingare zi hip goltrei gwizimdin. Dekam sa Alap mo nwenak eoto gwesil– san de zenaka de weir gulsunnu kiye.
¹¹ Kristen zi de tagal gwennak, we walya zen diki balk enkam zen esane gwe-gwen. Hen men zen tawa tabinni, desa zen dawemkam blikip gwesiblin.
¹² Ëe home we wal de zisi tawa ta gwibin hip gubiridaꞌan. Hen zen bap zen zisi nol gwibirida gwen. Zen diki balk enkam zen teinikin gwen.
¹³ Sap Alap nonol Adamsa yang tasiki, ki zep hwena Hawasa yang gulsuku.
¹⁴ San ki Adamsa dowal mo kigina boton taka! Zen diki we zem Hawasa am boton gulku, dekam zep kareknak zank.
¹⁵ In zep Alap desa anakan gubirki, “Ebon onakon hendep tingare we walya eu gwe- gwenkam Ëe asa sang-sangna mam gul gwizim, hen hlesgwan-hlesgwan naban esa ejaha gwe-gwer.” Hwena Alap sa hen we wal hap hendep dikim engaya gwen hap dena golzimdi– zen de Kristussu de taibliblannak tatem ezauk gwenkam, wal bosyansa de kwasang gwibirida gwenkam, hen Alap mo nwenak de enho kles gwesin sremkam lowehe gwenkam, hen enho oto tasin niban de zenaka wer tasik gwibinkimye.