¹ Aya wal oso wal, em mese sap Bian mo hatan hap de yaklana anakan etawa gwek, “Zen kam de sowe zi mo kim sa nep lwazim.” Zep ee bejene emsa anakan gubiridan, “Yaklana dekam sa hata zala.”
² (5:1)
³ Zeno hatan hap denak kim de golek de gweꞌak, dekam zini sa ekil gil gwer, “Langna an airis ki lwa gweꞌan– umlae enkam.” Hwena zen kirenak sa mumuk ennak Alap mo langsa de karek gun hup dena hatal– men kiye, u nubare we de mumuk ennak zenaka eisbir anenna. Dekam men zen Yesussu daiblibla srem gwek, zen toton ba san molya easendak.
⁴ Hwena aya wal oso wal, em kawesinnik home lowe heꞌan. Zep Bian de sowe zi mo kim hata zannak, em molye auna ohloblak.
⁵ Sap em kawesinnik de zisi hom. Em kitak ngatannak de zi. Nen hleng gwen sremnak de zisi hom. Nen litinnik de zi.
⁶ Zep nen bap nen ni enna truwenda gwen– men kirekam aha zi truwenda gwenanye. Nen hwena enwe-alk gwen sremkam nen lowehe gwen– kawesinnik de enlala nik emamak gwen sremkam.
⁷ Sap kam zen dekam zini nini truwe gwenan, hen ho mamakna dekam notdeblanda gwenan, dekam zep emamak gwe-gwenan.
⁸ Hwena nen litinnik de zi, zep nen mamak sremkam nen lowehe gwen. Nen dowal mo kigi nabane ereija gwenan, zep eijan hap nen nenaka wer tyasibin. Nonol tanganna Yesussu de taibliblanna kwasang-kwasang naban desa biti makan nen darak tan. Enlala zon tasik gweblanna desa mire sigi makan nen anakare enlala naban alala tan, “Zen sa eiwa nesa ngaya tabiri.” Dekam dowal mo kigi mo gwetapna sa nebon mae ejawe guk hana gwer.
⁹ Sap Alap hom nesa anakan goleguku, “Dikire etimbwas gwek.” Hwena nesa mes gubiridaka, “Dikire Bian Kristus Yesus hun de zeraha-en gwenkam engaya gwek.”
¹⁰ Sap Yesus Zen mae hap tilki: Nen dikim apdenak zergwe gwen hap– sap nama de ngaya wenya, hen men zen ngatan zi mo lang san dep edane gukke.
¹¹ Zen in zep, kirekam de ol zim-zimkim em enaka tatete ta gwibin– men kirekam angkam enaka oto lasik gwibiꞌinke.
¹² Aya wal oso wal, ee ama emsa enbiridaꞌan: Men zen eno mae mo ngirinnik Bian mo syala nol gwenan, emki blikip gwesibirida gwen– hen men zen emsa Alap mo olkam titi da gwibirinye.
¹³ Dawem enkam blikip eisibirida gwek, hen kwasangsa em gol gwizimdin, sap zen dan syal-syala ban emsa alp neibirida tine gwenan. Aya wal oso wal, umlae enkam lowehe gwek.
¹⁴ Men zen e-enna nyauk gweblanan, desa emki anakan titi ta gwibin, “Emki hen syalak mas ta gwen. Bahem aha zi ensa blol gwibirida gwen.” Men zen Kristus hup denaka de golluwen hap etitik gwe-gweꞌan, emki zebe mae hap udobe naban dikim golluwe gwen hap de ol zim-zimsi gol gwizimdin. Men zen Yesussu de taibliblannak etatete gwe srem gweꞌan, desa emki tatete ta gwibin. Sosonkam bahem titi ta gwibin, hwena sam-samkam em mas gwibirida gwen.
¹⁵ Wal bose wal oban bahem hwe-hwekam enaka karek ta gwibin. Diki dawemsa emki hwe-hwekam ere mae hap gol gwizimdin– nonol tanganna ere mo Kristen bose wal hap.
¹⁶ Emki eisrip-sri gwe tine gwen.
¹⁷ Alapsa hen-henkam en sonebla tine gwek.
¹⁸ Banakare maekam de lowehen nakon Alap hap dawemsa olbla tine gwek. Sap zeno dwam gwibinni zen kirekam– Kristus mo bi gwibiridan zini nebe mae hap denaye.
¹⁹ Alap mensa zere mo Enhona neno mae mo enhonak ing ta soneka bahem tin tisin.
²⁰ Zep zere mo Enhona mensa hamal hap de ola zinik ing gul sone gwizimnira, zen kim desa ayang nulzimnira gwenan, desa de esane gwenkam em bahem hwaulsuk gwen.
²¹ Hwena kitak de ol ayang gunnu insa, emki anakan akasik gwibin, “San ha eiwa Alap onakorena? San ha dekore naka hom?” Dawem san dep de titi tabinni, desan amki ang ta gwek.
²² Tingare karekna em aes gwesik gwibin.
²³ Dikire Alap, men Zen tahana nebe mae hap deisu guzimꞌira, emsa lalak tasik gwibik– sap timni, angna, hen enhona, enho kles gwesin sremkam ekakim lowehe gwek, hendep Bian Kristus Yesus Zen de lwahal zannak de zauꞌuk.
²⁴ Alap kirekam sa emsa lalak tasibiri, sap Zen taibliblan tanganna. Zep zeno nesa de gu-gubiridan ola desa tingan sa nep sul sone gwizimdi.
²⁵ Aya-wal oso-wal, Biansa de abe ta gwenkam asa mas eibirida gwek.
²⁶ Men kirekam Kristen zini egwe gwenan, ansa de baca gulsun hyanak emki kwasang naban enaka tahasa goletowaran.
²⁷ Ëe Bian mo nwenake emsa gubiridaꞌan: Suratna ansa tingare Kristen bose wal ukip baca ulzimk.
²⁸ Bian Kristus Yesus mo kwasang-kwasangna dikire ebon mae onak lwa gwek!