¹ Aya-wal oso-wal, ee Kristen zi dikim Alap mo nwenak esam gwesin hip dena mese emsa tawa la gwibik, hendep em mese desan ang tak. In zebe etan Teipsin Zini Yesus mo bosekam emsa titi labiꞌin– em dikim kire syalsa etan esek gulse gwen hap.
² Sap Kristen zi mo kirekam de lowehen hap de ola mensae Bian Yesus mo bosekam ayang ul gwizimk, ena namae desa enlala ei gwibiꞌin.
³ Zep Alap mo ebe mae hap de dwam gwibinni, zen em dikim enho lalak enkam lowehe gwen hap, hen ekahalo gwe-gwensa dikim baes tan hap.
⁴ In zep zikim dena, em ere mae mo wanga tebolena enho lalakkam oleinik gwe-gwek, aha zi mo bi gwibin nika ekakim nwe enkam hla kulsuk gwek.
⁵ Bahem ere mae mo hole-hle san ang ta gwen– men kirekam Alapsa de tame tan srem zini egwe gwenanye.
⁶ Zi bose uk mo dobe jopnak bahem ake anen, hen bahem ap son. Kire zini Bian sa kareknak kang gulu– men kirekame hamal hap emsa enbirida gwekke.
⁷ Sap Alap hom nesa anakan gubiridaka, “Em kahalo sosonkam lowehe gwek.” Zen diki enho lalak enkam de lowehe gwen hap nesa gubiridaka.
⁸ Ëe ansa emsa tawa labiꞌin, zen ere mae mo olsa hom. Zep men zen de ola ansa baes neibiꞌik, ki zen mes Alap, men Zen zere mo Enhona zer gwizimnira, zeno ola baes gwibirida.
⁹ Angkam ee sap Kristen bose wal omka dikim kwasang gwibirida gwen hap denaka amaka ale ulzimꞌin, hwena Alap Zen mes ki kire hap dena ebe mae hap golzimki.
¹⁰ Ere mae mo kwasangna mese ki oltrei gwizimk– tingare langna Makedoniak de ere mae mo Kristen bose wal hap. Hwena aya-wal oso-wal, ee ama emsa titi labiꞌin– em de ere mae mo kwasangna insa etan esek gul kini gwen hap.
¹¹ Emki ealp gwe-gwen– enlala sesekkam de lowehe gwen hap. Aha zi mo syalak bahem enaka golengewenda gwen. Hwena diki e-en em ere mae mo syalsa gol gwen– men kirekame emsa enbirida gwekke.
¹² Dekam Kristen zini neno mae mo bosena sa aha zi mo nwenak dawem gwer, hen nen dekam aha zisi molye blol eibirida gwek.
¹³ Aya wal oso wal, ee home em de anakan tame gun srem hap edwam gweꞌan, “Neno mae mo Kristen wal bose walya men zen juwenkam eteingir gwe guk, zen banakan sa egwer?” Sap eKristen gwen srem wenya, zen iye zik de tinkim karekkam hala-hla neibirida gwenan, sap zen hom Yesussu enlalana anakan zon dasik gweblanan, “Zen sa desa ngaya tala.” Hwena ee home ki edwam gweꞌan– em de hen kirekam egwe gwen hapye.
¹⁴ Sap nen mese anakan etaiblik, “Yesus sap mes tilki, hwena man etan ngaya gweka.” In zep nen hen anakan etaibliꞌan, “Yesussu de taibliblan wenya men zen juwenkam eteingir gwe guk, Yesus kim de etan lwa haꞌan zaka, Alap sa desa Yesus onak dep tagal gulsulu.”
¹⁵ Ëe in zebe Bian Yesus mo ola, etan de nesa tagal gulsuzun hap dena, ebe mae hap ayang gulzimꞌin: Yesus de etan lwahal zankam, nen an zen nama ngaya wenya lowe heꞌan, nen bejen nen juwenkam de teingir gwe gun wenya insa ngatan zi mo lang san de sesek gwe senkam ngip guludan.
¹⁶ Dekam Alap mo dam taha nakore zi mo teipsin nik sa ol mamkam takenbirida zala, ki esa ngatan zi mo lang nakore sramin aukuna esane gwer. Zen dekam sa neno mae mo Teipsinni Yesus Zena butnak dep ati gwe ine zala. Desa de taibliblan wenya men zen juwek, zen dekam sa nonol tim ese naban luk tal.
¹⁷ Ki sa hwena apdekam ngaya wenya neban mae ngli san dep lup gul ane hala– dekam de ze zere han zertowehan hapye. Zen dekam sa ze hendep denaban nesa golelowehe gwera.
¹⁸ Zen in zep, emki kirekam enlalana enaka se ta sone gwizimdin.