¹ Aya wal oso wal, ena tawana: Ëe waba hap home ebon mae yaing gwek.
² Ena tawana: Ëe kime nonol Pilipik yaing gwek, zen man tangan asa karek da gwibik hen lamang da gwibik. Eno mae mo enak hen man sap asa jalse neibirida gwek. Sap eiwa kirekam, hwena nere mae mo Alap abe mae hap enlala tatetena zer gwizimki. In zebe udobe naban Alap onakore engaya gwen hap de ol dawemna inkam emsa lonbirida gwek.
³ Zep ee emsa de yasik tabin hip home yaing gwezak. Aha enlala aning tan naban home yaing gwezak– boton olsa de tawa ta gwibin hip.
⁴ Hwena ee an Alap mo taiblibiridan zie yaing gwezak– engaya gwen hap de ol dawemsa de ebe mae hap ayang gul gwizimdin hip. Sap ee zi de asa sam gwesibiridan hap home syal ta gwenan. Hwena Alap, men Zen zi mo enhona karatda ta gwibir-zimnira, Zen en de asa sam gwesibirida gwen habe syal ta gwenan.
⁵ Ena tawana, hen Alap mo nwenake emsa gubiridaꞌan: Ëe ere mae mo timsi de ngalap gwibin hip de enlala naban home yaing gwezak. Ëe u siwen enlala naban home emsa anakan ben-jana la gwibik, “Ano tawa tabinkim mese eei gwer, zep angkam kire-kiresa em ap kap tazimdin.”
⁶ Ëe ebon mae onak ere mae mo bose dikim mam gwen hap home syal ta gwek– sap eno mae mo nwenak, ahaksa aha zi mo nwenak. Ëe an sap Kristus mo dam tasibin zi, zep sap amaka dekam emsa abe mae hap de ba maesa kap ta gwizimdin hip abe la gwibik. Ëe hwena home.
⁷ Ëe hwena ol dawemna inkame dawem enkam emsa laizi gwibik– men kirekam an wal zem walas zemka momkam daizi gwibirinke.
⁸ Ëe sap Alap onakore ol dawem enkam de emsa tawa ta gwibin hibe yaing gwezak. Hwena ama tangan emsa kwasang eibirida gwek, hendep zebe emsa de mas gwibiridan hap ere mae mo timni isrip-sri naban sosok la gwibik.
⁹ Aya-wal oso-wal, ena tawana: Ano mae mo danna te-ala hap de syalak zep hen esin gwe-gwek– sap yaklam, sap kam. Ëe mae habe ere mae mo syala insa ol gwek: Dekam de Alap onakore ol dawemna insa totoresa ebe mae hap gol gwizimdin hip, emsa de dohon-hon ta gwibin sremkam.
¹⁰ Nglinak de gwe gwen Zini Alap mo nwenake emsa gubiridaꞌan– ena men kirekame asa kara la gwibikke: Ëe ebon mae onak enlala lalakkame hen dam-dam enkame lowehe gwek– enho kles gwesin sremkam.
¹¹ Sap em tawana: Ëe bi zik de walas zemka alp gwibiridan mo kime emsa olelowehe gwek.
¹² Ëe zebe aha-en aha-enkam ebe mae hap ol zim-zimni ol gwizimk. Em kime karekna oltowe gwek, eye hwena eno mae mo enlalana tatete la gwizimk. Hen eno mae mo lowehen dikim Alap mo nwenak dakastin hip ama emsa titi la gwibik. Sap Alap Zena man emsa zere mo irik ginnik dikim biti gwen hap kwang guludaꞌara– hen zere mo serkam de ngatannak dikim lowehe gwen hap.
¹³ Ëe hen ama ebon mae onakon Alap hap dawemna mae hap olbla tine gwenan: Sap em kime abon mae onak Alap mo ola esane gwe-gwek, em dekam zebe hendep anakare enlala naban kyang-kyang ulsuk, “An eiwa Alap zere mo ol. Auhu-kama zi mo olsa hom.” Sap em mese ola insa kirekam laiblibik, in zep ola in eno mae mo enhonak syal gwe-gwenan.
¹⁴ In zep, aya-wal oso-wal, em Yahudi mo langnak de Kristen zi mo kim lowehek. In kim ahakore Yahudi eKristen gwek, hwena Yahudi bose zem dekam man karek da gwibik. Emsa in zep hen kirekam karek da gwibiꞌin– ere korena men zen eei gwe srem gweꞌanye.
¹⁵ Sap Yahudi zini, zen kirekam egwe gwenan. Zen orep Alap mo olsa de ayang gul gwen hap de zini man damera gwek, hendep Yesussu dak, dekam zep hen asa neralsa sone gwibik. Zen zep hen asa angkam anakan tru-tru nul gwizimnin, “Em bahem Yahudi srem zini ola inkam tawa ta gwibin.” Zep zen in man enwe-mase gweꞌan– tingare zi mo jal zi. Sap zen engaya gwen hap de ol dawemna insa man tru-tru nul gwizimnin. Zen dekam zep zere mae hap de karekna bwang nulsukse gwenan, hendep angkam Alap de heip gun hup dena mes tangan golek de tabir.
¹⁶ (2:15)
¹⁷ Aya wal oso wal, nen ein tangane esyawek, zep ano mae mo enlalana nama ebon mae onak lwa gweꞌara. Ëe ama eis gwibiꞌin, “Ano mae mo walasna angkam kwasap walas mo kim lowehe gweꞌan.” In zebe sap etan-etankam emsa de duwebiridazan hap eakasik gwek. Hwena dowal mo kigi asa tru-tru gul gwizimki. Ëe an Paulus, ee ama sap etan-etankam emsa de duwebiridazan hap akasik gwek, hendep zebe aumwa hap Timotiussu emsa de amjanbin hip zer sonek.
¹⁸ (2:17)
¹⁹ Sap em in zen tangan– ano mae mo isrip-sri gwibiridan wenyaye. Neno mae mo Teipsinni Yesus in kim de lwa haꞌan zaka, ee dekam asa emsa isrip-sri naban zebe hap anakan oletreblal, “An zen– ano mae mo syal gwibinkim de Emsa taibliblan wenyaye!” Ëe zep asa hwena Yesus onak heꞌho gwibinni hla kul.
²⁰ Zep em in ano mae mo heꞌho gwibin wenya hen isrip-sri gwibiridan wenya zen tangan.