¹ Kristus Zen hen kareksa goltowe gweka– tim niban kim nama okamanak awe gwe gwekaye. Zep nen hen nen ki enlalasa hohle ta gwen– Kristus mo kim de hen okamanak awe kareksa goltowe gwen hap. Nesa de karek gwen sremnak karek tanna, zen airis tangan. Sap zen dekam kareksa de gon hap de hole-hlena nebon mae onakon som gwe hana gwenan.
² Dekam nama de okamanak lowe hennak, nen molye nere mae mo auhu-kama hole-hle san ang ta gwek. Hwena Alap mo dwam gwibin en san esa ang ta gwer.
³ Nen dwan mes-am tangan eholo gwek– nere mae mo lowehen karek san de ang ta gwen naye, hen hole-hle san de ang ta gwenkam, men kirekam Alapsa de tame tan srem wenya lowehe gwenanye. Nen dekam kirekam-kirekam karek ensae nere mo dwam gwibin sin ulin halasen gwek. Neno mae mo enlalana dekam ho mamak otdebin en hap dena, syan-syan en hap, hen swi en hap dena. Hen yang tasin dowal-dowal ensae boklena kom labirida gwek.
⁴ Men zen angkam kirekam nama zere mae mo hole-hle san totoresa ang ta nasen gweꞌan, zen zep angkam nesa anakan denggwanbirida gweꞌan, “Zen ba hap angkam nebon mae osan ang ta srem gwe-gweꞌan?” Zen zep nesa lamang da gwibirin.
⁵ Hwena neno mae mo Teipsinni Yesus, Zen mes tangan kitak de klis gulzun hap hohle gwera. Men zen totoresa lowehe gwek, sap ngaya wenya hen sap men zen juwenkam teingir gwe guk, Zen dekam sa zeno mae mo lowehen karekna in hap takensibiridala.
⁶ Zen in zep Yesus nonol juwen zi mo lang san dep ati gwe ineka– dekam de ho namwanak de juwen wenya in hap ol dawemsa tonbiridan hap. Sap zen kim tim niban nama lowe heꞌak, Alap man tangan karek tabirki. Zen kirekam tingare zini nebe mae hap erak makan kang gulku– anakan dikim nesa enlala sobiridan hap, “Ëe asa tingare zini ebe mae hap ere mae mo syal eini golzim.” Hwena Yesus zep zini in hap ol dawemna tonbirida onka– dekam de zebe mae hap hen engaya gwen hap de orasa kles tyasizimdin hip, desan de ang tankam dikim zen hen Alap onak hendep denaban lowehe gwen hap.
⁷ Zep aumwa hap denak angkam mes golek de gwer. Zen in zep enlalasa nen hohle ta gwen, hen nenaka nen goleinik gwe-gwen– Biansa ekakim dawemkam en sone gweblak.
⁸ Zep bol-zaun tanganna, nenaka nen ki tingare enho naban kwasang gwibirida gwen. Sap nenaka de kwasang gwibirida gwenkam, zen dekame nere mae mo karek-karekna beyakam jek-jak ul gwenan.
⁹ Nen nere mae mo gola kon zini zi walya aha-ere enlalakam lup gulin gwen. Bap nen enlala ennak anakan mae ehusus gwe-gwen, “Ano golak dekam hir-hiri sa mam gwer.”
¹⁰ Alap mo Enho nakore sosonna mensa Alap zere mo kwasang-kwasang nakon nenaka dikim tatete ta gwibin hip sren-srenkam nep gol gwizimnira, desa dawem enkam nen gwirensik gwen– aha zi dekakim Alap mo kwasang-kwasangna insa tame nul gwek.
¹¹ Zep a kirekam em gwirensik gwen: Zen de ebe mae hap aha zisi de mas gwibirida gwen hap de sosonsa gol gwizimdinkim, dekam Alap ensa em anakare enlala naban yaing gwebla kini gwen, “Zen diki Zen sa sosonna abe hap gol gweblala– ee dikim syala ansa sul sonen hap denaye.” Ahaksa, Alap de ebe mae hap zere mo Enho nakore hamal hap de olsa ayang gul gwizimdin hip denaka gol gwizimdinkim, ahaksa Alap mo olkam de tawa ta gwibin hip denaka, em dekam anakare enlala naban em tonbirida gwen, “Ëe zi mo olsa home emsa tonbiridaꞌan. An hwena Alap zere onakorena.” Dekam aha zi de emsa kirekam kara ta gwibinkim, zen sa Alap mo bosena teip nulsublunda gwer– sap Kristus Yesus onakore kwasang-kwasangna hen sosonna ebon mae onak syal gwe-gwenan. Dikire tingan Alapsa anakan tame dak, “Alap Ze-en teipsinni hen sosonna– hendep denaban!” In eiwa.
¹² Ano dang tininak de wenya, bahem anakan etenggwan gwen, “Ëe an ba habe serkam de karekna oltowe gwenan?” Zen kirekam sa nebon mae onak lwa gwer, zep esa ehusus gwe-gwer– san de syauk sal-salak de ezauk ane gwenna. Zen kirekam Alap Zen ki nesa akasibirida gweꞌara.
¹³ Sap nen Kristus mo kime hen karekna oltowe gwenan, zep dekam anakare hap nen eisrip-sri gwe-gwen, “Ëe an eiwa Kristus hun de zeraha-en gwenna.” Zen zep esa lamkam serkam eisrip-sri gwer– Yesus kim de zere mo ngatan zi mo lang nakore ngatan naban golati gwe ineꞌan zakaye.
¹⁴ Emsa de Kristus mo bose hap lamang ta gwibinni, dekam anakan em eisrip-sri gwe-gwen, “Alap mo ngatan zi mo lang nakore sosonna abon ki lwaꞌan.” Sosonna in, zen Alap zere mo Enho nakorena.
¹⁵ Hwena karek gonnak de emsa karek tankam, anakare kareksa de gonnak– zisi de tan, sowe gwen, kareksa de gulin hala seran, ahaksa aha zi mo syalak de enaka zerngewen– dekam emki esaher gwe-gwen.
¹⁶ Hwena Kristus hup de jal hap de kareksa goltowe gwenkam, dekam bahem esaher gwe-gwen. Dekam hwena anakare hap em Alapsa isrip-sri gwe-gweblan, “Ëe eiwa mese Kristus hun zeraha-en gwek.”
¹⁷ Sap Alap mo tingare zisi dikim karek tabin hip de yaklanak angkam mes zaul. Zen mes kon gwisibir hanaka– Yesussu de taibliblan wenya nesa de karek tabinkimye. Nen nonol kareksae oltowe gweꞌan. Hwena emki eenlala gwe-gwen: Nesa de kirekam angkam karek ta gwibinkim, hwena Alap onakore ol dawemna men zen i-san i-san neibir srem gwe-gwenan, desa hwena aumwa hap denak serkam tangan sa karek tabiri.
¹⁸ Sap Alap mo olak man lwak, “Dam-dam enkam de gwen zi de engaya gwen hap dena, zen gwa-gwa tanganna. Zep hwena Alapsa de tame tan srem wenya hen kareksa de gulin halasen gwen wenya, zen tangan toton banakan molya engaya gwek.”
¹⁹ Zen in zep, nen de Alap mo dwam gwibin sin kareksa goltowe gwenkam, dekam dawemsa de syal gwe-gwibinni bap nen golzausuk gwen. Dekam Alap men Zen nesa yang tabirki, Desa en nen anakare enlala naban yaing gwebla kini gwen, “Zen man zere mo ol gu-gunnu sul sone gwenda.”