¹ Zen in zep, anakan de lowe hensa emki baes tan: zi bose omka de u sal-sal gweblan, lwa tasin, lamang tan, hen dawemsa de gul irinnik de husus gweblan, hen Alapsa de ek enkam betek gweblan naye.
² Nen wal baizil mo kim nen lowehe gwen. Wal baizili zen dawemkam an zik mo momna hole nei gwizimnin. Nen hen kirekam nen eiwakam de tawa tabinsi, lalak en naka, hole gwe-gwibin. Sap men kirekam Alap mo olak zebe hap dena lwak, nen mese angkam Biansa anakan tame lak, “Bian Zen dawem tanganna– san de tembane derekna kiye.” Zep Alap mo Enho nakore eiwa de ol san de ang ta tine gwenkam, dekam sa neno mae mo eini dawemkam tatete gwe zaher, hendep zep esa engaya gwer.
³ (2:2)
⁴ Zep Bian Yesussu emki yaing gwebla kini gwen, sap engaya gwen hap de ausuna, zen Zebon en lwaꞌan. Zep Zen san de Alap mo golak de ngirin gol te yawala kiye. Auhu-kamanak de zini sap man gol tenya insa baes neibik, hwena Alap mo nwenak man tangan sam gwesik, zep bolak ik gilki.
⁵ Zep nen an hen san de gol gom tenya kiye. Neno mae mo timni, diki zen jowen– san de Alap mo Enho hap de gol. Zen dekam esa enwe-mase gwer– san de Alap mo golak de syal tan zini kiye. Sap nen ema nere mae mo timni sosok ul gweblaꞌan, zen zep Alap mo nwenak nwe-mase gwe-gweꞌan– san de otweran ninsi de zebe hap de kalsnak lone seblanna kiye. Sap nen Kristus Yesussu de yaing gwebla kini gwenkame kirekam syal ta gweꞌan, Zen dekam tangan zep nesa sam gwesibirida gweꞌara.
⁶ Sap Alap mo olak man lwak, “Ëe mese tenya ere mo nwenak de dakastin tangan naka dam gulsuk– Desa de Yerusalemk bolak ik gin hipye. Men zen gol tenya insa daiblibiꞌik, zen molya lamkam anakan esaher gwek, ‘Ëe waba habe laiblibik.’”
⁷ Em in zen gol tenya insa laiblibik, zep eno mae mo nwenak man tangan sam gwesik. Hwena taiblibin srem wenya, zebe mae hap Alap mo ola anakan sa lwa gwizim, “Tenya mensa gol tauk gwen wenya baes neibik, hwena Bian Alap zep desa bolak ik gilki.”
⁸ “Zini beya nik sa tenya iwe de tana bol tang ta gwe zankam altil gwer.” Zen mae hap sa altil gwer: Sap zen man Alap mo ola hwa nulsuk gwenan– men kirekam Alap orep hamal hap kalang gwibiridakake.
⁹ Hwena Alap mes nesa hlil inki. Zep nen an men kiye– Teipsin Zini Alap mo golak de syal ta gwen zini, hen Alap zere en hap de zi. Nen an zere mo bi gwibin zi ausu. Zep angkam nen mae en habe lowehe gweꞌan: Dekam de anakan zere mo bosesa mam gul gweblan hap, “Alap mes owas tangan hap nesa kwasang gwibiridaka, zep kawesin nikon zere mo serkam de ngatannak dep nesa kwang guludaka.”
¹⁰ Zep nebe mae hap mes ki jowezimk– Alap mo olak men kirekam nebe mae hap dena lwakke, “Menkam em Alap mo hlil irin zi ausunak home biti gwek, hwena angkam mese biti gwer. Menkam emsa hom kwasang gwibiridaka, hwena angkam em in Alap mo kwasang gwibiridan wenya zen tangan.”
¹¹ Ano dang tininak de wenya, nen kolengkame okamanak awe lowe heꞌan, hwena neno mae mo eiwa de langna, zen diki ngatan zi mo lang. Zep neno mae mo auhu-kama hole-hlena nen ki gwei gubir kini gwen. Sap tim nikore hole-hlena in man neno mae mo enho mo dwam gwibin niban ilman ne gwenan.
¹² Nen an dwan Alapsa de tame tan srem zi mo ngirinnik em-am lowehe gwenan. Zen sap sa nesa anakan lamang da gwibir, “Zen in kareksa nol gwenan.” Hwena nen dekam zeno mae mo nwenak dawem enkam nen lowehe gwen. Alap kim de zebe mae hap dekam de tame gun hup de enlalana zerzimꞌinka, zen dekam sa sahera ban Alap mo bosena anakan teip nulsublul, “Alap Zen eiwa ki emsa golelowehe gwenda.”
¹³ Zen in zep, Bian Yesus mo bose de aha zi mo nwenak karek gwen srem hap, emki okamana awe de pemerinta mo teipsin-teipsin wenyaka blikip gwesibirida gwen. Nonol tangan, teipsin tangan zini,
¹⁴ hen zeno irgwa taha nakore wenyaka– men zen zeno bosekam irik nil gwenanke. Sap teipsin tangan zini, zen mae hap irgwa taha nakore zemka dam dasik gwibirin: Karek gol gwen zi hip dikim kareksa gol gwizimdin hip, hen dawem gol gwen zi hip dikim dawemsa gol gwizimdin hip.
¹⁵ Zep Alap man nesa dawem ensa de syal gwe-gwibin hip dwam gwibiridaꞌara– ekakim enlala joblo-top zi mo eksa mat lasik gwibir-zimk, men zen nesa donsubirida gwenanke.
¹⁶ Sap nen menkam dowal mo kigi hone hen ebabu gwe-gwek, hwena angkam Kristus mes nesa hil ti sonebirki. Hwena anakan bahem eenlala gwe-gwen, “Ëe an hil ti sonen nike gweꞌan. Ëe sap asa aningkim karekna gol gwer.” Diki angkam Alap en hon nen ebabu gwe-gwen.
¹⁷ In zep, tingare zisi blikip eisibirida gwek. Kristen bose omka kwasang eibirida gwek. Alapsa airi gweblak. Hen pemerinta mo teipsin tangan zini blikip eisik gweblak.
¹⁸ Men zen zi mo tana iltikinnik ebabu gwe-gweꞌan, emki ere mae mo zi bina insa dawem enkam blikip gwesibirida gwen, hen zeno mae mo dwam gwibin sin emki ang ta gwen. Zep zi bina in de emsa sae-saekam zergwe gwenna, ahaksa jal-jalkam, em hwena dawem enkam em zergwe gwen.
¹⁹ Karek gwen sremnak de mam zini in emsa karek tanna, dekam ere mo enlalasa em anakan se ta sone gwen, “Ëe namae Alap mo taha terenak gwe gweꞌan.” Hen dekam nama em enlala tatete naban zewe syal gwe-gwen. Kirekam de gwe gwenkam, Alap sa emsa sam gwesik gweblala.
²⁰ Hwena em de karek gwennak de emsa lek-lek tanna, dekam bahem anakan tim gun, “Ëe de enlala se ta sonenkam gwenkam, dekam Alap sa asa sam gwesiblila.” Em dwan mes-am karek gwera! Alap molya kirenak emsa sam gwesiblika. Diki em de karek gwen sremnak de emsa karek tankam maka emsa sam gwesibliꞌara.
²¹ Alap Zen eiwa kirekam de kareksa de goltowe gwen hap nesa kwang guludaka, sap Kristus Zena hen mes kareksa nebe mae hap goltoweka. Zen dekam Zenaka erak makan nebe mae hap dre nezimki– nen dikim tana wei san zertron hap,
²² Alap mo olak men kirekam zebe hap dena lwakke, “Zen hom karek gweka hen zeno ek nakon hom mae boton ola wet sok.”
²³ Desa kim lamang daꞌak, Zen hwena hom lamang tabirki. Hen kim karek daꞌak, Zen hom dekam gubiridaka, “Ëe asa hen emsa karek tabir.” Zen hwena Alap ensa anakare enlala naban yaing gwebla kinika, “Diki Zen sa abe hap dena dam-dam enkam klis gulu.”
²⁴ Zen zere mo timnik neno mae mo karek-kareksa wei yulku– te-lidak sonnak kim makan da inkye, nen dikim auhu-kama enlala karek nakon ehil gwe hanan hap, dekam de hwena dam-dam enkam lowehe gwen hap. Nen mese zeno wei-wei nakon edawem gwek.
²⁵ Nen menkam bi srem domba zaho mo kime ora srem san egwa haꞌak, hwena angkam nen mese nesa de zaho ta gwibin bi san dep lwanda halzal. Angkam Zen neno mae mo angna nep kara ta gwibir-zimꞌira.