¹ Suratna an, Alap mo hlil irin wenya kip– Kristus hup de jal hap mensa Yahudi mo lang nakon nolealsa sonekke. Em in zen angkam zi mo lang san ein lowehen daꞌan– Pontus sun, Galatia san, Kapadokia san, Asia san, hen Bitinia san. Hwena neno mae mo eiwa de langna, zen diki ngatan zi mo lang. Kristus Yesus mo dam tasin zini, Petrus onakon:
² Dawem! Bian Alap orep mes ngein sin dep dena tame gulku, zep emsa hlil inki. Hendep zep zere mo Enhona ebe mae hap hle ta sonezimki– dekam de emsa lalak tasibin hipye. Em in zebe Alap mo dwam gwibin sin ang ta gwenan, sap emsa mes Yesus mo kalkam ngan tasibirki. Diki Bian sa kwasang-kwasang zemka serkam ebe mae hap gol gwizimdi. Hen nen zere mo taha terenak esa lowehe gwer.
³ Nen diki dawemsa nen Bian Yesus mo Bian Alap hap gol gweblan, sap Zen mes zere mo kwasang-kwasangna mam tangankam nebe mae hap goltreizimki. Hendep zep nebe mae hap lowe hensa dikim li yul sonen hap dena golzimki– dekam de etan de jaha gweblan mo kim eliwehe gwen hap denaye. Nen in zebe Alap hon tingare enho naban eyaing gwe kini gweꞌan– anakare enlala nabanye, “Zen sa nesa tin nikon ngaya tabiri, sap Zen ki Yesussu ngaya taka.”
⁴ Hen anakare enlala nabane eyaing gwe kini gweꞌan, “Alap insa dawemna zere mo hlil irin walasna nebe mae hap hamal gulzimki, nen esa desa ulin.” Sap ngatan zi mo langnak de dawemna in, zen bejen tap gwen, bejen batren, hen bejen jek-jak gwen.
⁵ Em mese kirekam etaiblik, in zep Alap zere mo sosonkam emsa tatete ta gwibirida– em dikim Kristussu de taibliblan nakon altil srem gwe-gwen hapye. Aumwa hap de yakla yalak, Zen dekam tangan sa emsa ngaya tabiri, hen hendep de dawemna insa golzimdi.
⁶ Nen in zebe serkam de isrip-sri naban lowehe gwenan. Hwena eiwa, kirekam-kirekam karekna kime oltowe gwenan, dekam zep enlala dowe hananna nebon mae onak hata gwenda. Hwena neno mae mo isrip-srina in dekam mae hom tap gwe-gwenan.
⁷ Karekna in mae hap nebon mae jowe gwenan: Neno mae mo ei nika dikim nep lalak gulzimdin hip. Emasna, zen sap okamana awe en dep dena, hwena desa ki syauknuk de tru tankam lalak da gwibirin. Alap hen kirekam syauknuk de ang gun makan neno mae mo eini lalak gul gwizimnira– anakan dikim nesa goletren hap, “An eiwa tangankam Asa daibliblaꞌan.” Hendep aumwa hap denak, kim de Bian Yesus Zenaka tingare zi hip zertreizimꞌinka, Zen dekam sa hen hendep de lwa gwen hap de hamal gulzimdinni insa nebe mae hap golzimdi. Bose dawemna Zen dekam sa hen tingare ngatan zi mo langnak de wenyik mo nwenak nebe mae hap golzimdi.
⁸ Em sap home Yesussu nwekam hla lak, hwena em ensae ola gweblaꞌan. Hen em sap home angkam hla laꞌan, hwena em mes tangane laibliblak. Hen Zebon onakon zebe anakan dam ulsuk gwenan, “Nen eiwa esa engaya gwer.” Zen in zebe Alap onakore serkam de isrip-sri naban lowehe gwenan, hendep zebe nenaka anakan lenggwanbirida gwenan, “Kareksa de goltowe gwen nakon ba habe nama isrip-sri naban lowehe gwenan?”
⁹ (1:8)
¹⁰ Alap mo ol ayang gul gwen zini men desa orep tame gun sremkam ayang nulzimnira gwek, nen in desae hwena angkam oltowe gweꞌan! Zen mensa tame gun sremkam hamal hap anakan egu-guk gwek, “Alap sa lamkam zere mo kwasang-kwasang nakon nesa ngaya tabiri,” zen man sap tangan dam gulsun hup dei gwibik.
¹¹ Kristus mo Enhona mensa Zen de hatazan hap de ola hamal hap ing gul sone gwizimki, zen sap man desa anakan de dam gulsun hup dei gwibik, “Nesa de ngaya tabin hip de Zini in bawalkam sa hata zala? Zen de teipsinkim irik gin sremnak, Zen ba hap sa mamkam karekna goltowe gwera?”
¹² Alap dekam zep zebe mae hap ahaꞌen-ahaꞌenkam ola anakan ing gul sone gwizimki, “Hamal hap de ola in, zen ebe mae hap hom. Zen ngein sin de zi hip dena.” Hwena zen mensa tol tame gun sremkam ayang nul gwek, hwena angkam zen mes ki nebon mae jower. Zen in zep zini Alap mo Enho mo sosonkam ebon mae onak engaya gwen hap de ol dawemna nolhatazak. Zep Alap mes nesa ol dawemna inkam ner hom hleng sosubiridaka, hwena Alap mo dam taha nakore zini, zen nama hom kitak tame nul gweꞌan hen nama dei gwibiꞌin.
¹³ Zep Alap insa kirekam nesa ngaya tabiꞌira, zen in zep salok-salokkam nen lowehe gwen, hen nenaka nen goleinik gwe-gwen. Dawem enkam nen Yesus onak anakare enlala naban eyaing gwe kini gwen, “Zen kim de etan Zenaka nebe mae hap zertreizimꞌinka, zen dekam tangan sa zere mo kwasang-kwasangna nebe mae hap golzimdi.”
¹⁴ Nen an Bian mo walas, zep nen blikip gwesik gweblan. Nere mae mo epba hole-hle san bap nen ang ta gwen– men kirekame tame gun sremnak lowehe gwekye.
¹⁵ Sap Alap men Zen nesa kwang guludaka, Zen lalak enna. Zep nen ki hen nere mae mo enhona lalak ta gwibin.
¹⁶ Sap Alap man nesa gubiridaka, “Ëe an lalak enna, zen in zep emki hen ere mo kim enho lalak enkam lowehe gwen.”
¹⁷ Nen Alapsa “Bian”kame en sone gweblanan, hwena ansa emki enlala gwe-gwibin: Bian man kitak nesa nwekam goleake gwenda. Men nara karek gwenna, desa sa karek tabiri. Zep nen de nama okamanak awe lowehe gwennak, dekam nen ki Biansa de airi gweblan naban lalak enkam lowehe gwen, sap nen okamanak awe kolengkame lowehe gweꞌan.
¹⁸ Sap nen mese tame uk: Nen menkam waba habe auyan-aza mo epba lowehen karek san ang ta gwek. Hwena Alap ki zep tin zi mo ora nakon nesa alal gulhal zaka. Zen dekon okamanak de perak, ahaksa emas mae nakore te-alakam hom nesa lup gulhal zaka.
¹⁹ Hwena Zen zere mo Domba Tane mo kalkam nesa alal gulhal zaka. Zeno kala in, tingare okamanak awe de emas-perak mae naban apdenak hom. Zen serkam de dawem tanganna. Hen nesa de ngaya tabin hip de Zini in lalak enna. Zebon onak karek maena hom tangan.
²⁰ Alap sap orep mes nesa dikim ngaya tabin hip Domba Tanena insa dam tasiki– okamana ansa de yang gulsun sremnak. Hwena ner hom tangan nep zertreizimki. Zep okamana an mo aumwa hap de yaklana an zen lwa zaheꞌan, nen lalak enkam nen lowehe gwen.
²¹ Sap Alap insa Yesussu tin nikon ngaya taka hen teipsinkim kim dre neka, nen dekon zebe Alapsa anakan laibliblaꞌan, “Zen eiwa sa nesa de ngaya tabin hip lwahal zala.”
²² Zep nen mese nere mae mo timni lalak enkam dikim lowehe gwen hap sosok labik– in kime Alap onakore ol dawem san ang takke. Nen in zebe nenaka dawemkam kwasang eibirida gwenan. In zebe emsa gubiridaꞌan, “Nen tingare enho naban nenaka kwasang gwibirida gwen.”
²³ Sap in zen neno mae mo enhonak sip gwek, zen zi mo olsa hom. Zen Alap zere mo ol. Nen in zebe etan de jaha gweblan makan eliwehek. Zeno ola in bejen hom gwen hen bejen timbwas gwen. Zen hendep denaban sa lwa gwer.
²⁴ Sap Alap mo olak man lwak, “Zini so mo kim nabakam juwe gwenan– men kiye hen te eisni. Zen namen de eis gwenna, hwena holo gwen sremnak sa bulk gweher. Zini nen hen kirekam: Namen de eteipsinni, hwena holo gwen sremnak de altirin.
²⁵ Diki Alap mo ol, zen hendep denaban sa lwa gwer.” Ola in ebon mae onak mes nolhatak.