¹ Angkam Yerusalemk de Kristen bose wal tahalha hap de te-alasa tagal tazimdin hibe ep ale gulzimꞌin: Men kirekame hen langna Galatiak de jemat-jematna gu sonebiridakke, em hen kirekam syal tak.
² Minggunak kim tagal gwe-gwek, em dekam te-alana ing ul gwek– men desa minguna inkam Bian onakon ulin gwenanke, zeno aha hlik tolaka. Bahem ee de hata zannak de tagam tan hap eeissin.
³ Em zisi dam lasibik– zen de te-alana insa Yerusalem san dep zerhan hapye. Ëe kime hataꞌanzak, dekam asa zebe mae hap suratna ale gulzim– dekam de Yerusalemk de Kristen zi mo mam-mam nik tame tabin hipye.
⁴ Hen em de asa ang gwen hap dwam gweblankam, ki asa hen ang gwibiridal.
⁵ Ano kalangna, ee nonol Makedoniak de e-e san asa amjanbir, ki asa hwena ebon mae onak hatazal.
⁶ Ëe ebon mae holokam wehe yap gweꞌak– hi ngep tamle gwenkamye. Hwena hi ngep tap gwennak em emaka dekon asa mas eblaꞌan– aha lang san dep de ayang gunnukye.
⁷ Ëe home ta guk kinin enkam de emsa hlauluda guk kinin hap dwam gweꞌan. Diki Bian de asa kirekam dwam gweblankam, ee ama holo tolkam de emsa golelowehen hap dwam gweꞌan.
⁸ Hwena angkam ee nama Efesusk awe gweꞌan, hendep Pentakostana awe sa asa jap dal.
⁹ Ëe mae habe kirekam kalang gweꞌan: Sap awe Bian mes abe hap orana dawemkam kles tyasiblika– dekam de zisi beyakam halen ta gwibin hip denaye. Hwena ano syalsa de ap tru-tru gulblun hap de zini hen beyana.
¹⁰ Timotius de ebon mae onak goleyaing gwe zanna, bahem anakan husus gweblan, “An nama wal seiwir sike.” Dawem enkam blikip gwesiblin naban eirink, sap zen hen Bian mo nganak syal gwe-gwenda– men ki hen aena. Amki etan an san de golesek gwe zannak dawemkam mas eblak– dekakim dawemkam ahakore Kristen zini in han golesek gwe zaka, sap ee ama an kon eisbirida gweꞌan.
¹¹ (16:10)
¹² Angkam hwena Apolos hap denakae ep ale gulzimꞌin: Ëe mese sap desa titi tak– zen de ahakore Kristen zi niban emsa ziamjanbin hip. Hwena angkam zen hom dwam gweꞌara. Bian de zebe hap orasa kles tyasiblinkam, dekam sa emsa ziamjanbir zira.
¹³ Salok-salokkam lowehe gwek. Hen Yesussu de taibliblan ennak em tatem ezauk gwen. Bahem eairi gwen. Enho drak-drakkam em lowehe gwen.
¹⁴ Tingare ere mae mo lowe henna aha zisi de kwasang gwibirida gwenkam em goltre gwen.
¹⁵ Aya-wal oso-wal, ena mese Stepanus Baksa we wal walas zeban tame labik. Zen zen nonola langna Akaya kon eKristen gwek, hen angkam zen tingare enho naban Bian mo syal ensa nol gwenan.
¹⁶ Zen in zebe emsa gubiridaꞌan: Em kire zisi blikip gwesibirida gwen– hen tingan men kirekam tingare enho naban syal ta gwenanke.
¹⁷ Ëe ama tangan sam gwesik, in kim Stepanus, Portunatus, hen Akaekus mae yaing gwezak. Ëe dekam zebe ebe mae hap de embwanna sewehek.
¹⁸ Zen in kim yaing gwezak, zen isrip-sri gwibin olkam ano enhona ap tatete dablazak– zen men kirekam hen emsa tatete da gwibirinke. Nen diki kitak kire zisi nen blikip gwesibirida gwen– men zen kirekam esyal-syal gwe-gwenanye.
¹⁹ Asia mo langnak de Kristen zini dawem ensa ebe mae hap nol sonezimk. Akwila ne Priskila ne, hen Kristen zini men zen zeno nik mo golak tagal gwe-gwenan, zen hen kwasang nabare dawem ensa ebe mae hap nol sonezimk.
²⁰ Tingare ahakore awe de aya-wal oso-walya, zen hen dawem ensa ebe mae hap nol sonezimk. Men kirekam Kristen zini egwe gwenan, ansa de baca gulsun hyanak emki kwasang naban enaka tahasa goletowaran.
²¹ An kon an ee, Paulus, ere mo tahakame aumwa hap ep mas gulzimꞌin.
²² Men zen Biansa kwasang nebla srem gwe-gwenan, dikire kareksa hla nuk. Hwena Bian, nabakam hataza!
²³ Dikire Bian Yesus mo kwasang-kwasangna ebon mae onak lwa gwek.
²⁴ Ëe ama emsa kwasang gwibirida gwenan– em in zene Bian Yesus hun eraha-en gwekye. Dawem!