¹ Ëe de men-kore men-kore olsa owas hap tawa gwibiꞌinam, hen Alap mo dam taha nakore zi mo olsae tawa gwibiꞌinam, hwena ee de zisi kwasang gwibirida gwen sremkam, ki hwena ano ol toranna in waba tangan hap– san de ngli glungna kiye, auku en naka de salblan.
² Hen kirekam, eye tewesiꞌinam, Alap mo Enhokam de hamal hap de olsa ayang gul gwizimdin hip denaka, hwena ee de zisi kwasang gwibirida gwen sremkam, zen waba hap. Hen eye tewesiꞌinam, tingare kirekam-kirekamsa de olk san denaka kitak tame gunkum, hwena ee de zisi kwasang gwibirida gwen sremkam, kirekam hwena ano tame gunnu in waba hap. Hen eye serkam Alapsa taibliblaꞌanam, hendep ano gublunkam de kwatap hinak keing gweꞌanam, hwena ee de zisi kwasang gwibirida gwen sremkam, zen hen waba hap.
³ Hen eye ere mo bi gwibin kire-kiresa kitak tahalha zi hip kap tazimꞌinam, hen ere mo timsi Alap hap sosok gulblunkam Yesus hup de jal hap de ano timsi ang gulsun hup, kirekam hen waba hap– ee de aha zisi kwasang gwibirda gwen sremkamye.
⁴ Kwasang mo syala zen a kirekam moye: Zen sam-samkam hen sae-saekam de zisi golelowehe gwen. Kwasang enlalakam, wal bosyansa de anakan hla tanna, “Zen dawemsa gul iri,” zep bejen husus gweblan. Kwasang enlalakam, zen bejen zenaka boltere tan, hen bejen bola-bola gwen,
⁵ hen aha zisi bejen blostablan. Kwasang enlalakam, zen bejen zere en mo timsi ngalap gwibin, hen bejen nabakam jal gwen. Kwasang enlalakam, zebe hap de zi kareksa golblanna, zen hwena eititi gwibinkim.
⁶ Kwasang enlalakam, karek-karek enlala zi mo klesnak bejen sam gwesin. Hwena eiwa de enlalakam de lowehen zi mo klesnak de gwenkam isrip-sri gwenkam.
⁷ Kwasang enlalakam, zen bejen blalen gwen– aha zisi de mas gwibirida gwen naye, hwena zen Alapsa de taibliblannak de tatem zaun, hen enlalakam anakan zon dasik gweblanan, “Alap sa hen lamkam asa kwasang gweblala.” Zep kwasang enlalana, zen tatete tanganna.
⁸ Kwasang enlalana in, zen hendep denaban sa lwa gwer. Hwena hamal hap de olsa de ayang gulzimdin hip de sosonna, hen owas olkam de toran hap dena, hen owaskam de ba maesa tame gun hup dena, zen kitak sa zausul.
⁹ Alap sap man ki nebe mae hap tame gun hup de sosonna gol gwizimnira, hwena neno mae mo tame gunnu hom tangan langa gwe haꞌan. Zen hen ngein sin dep denaka de hamal hap tame gun hup de sosonsa gol gwizimnira, hwena tame gunkum home tangan su kul sone gwenan.
¹⁰ Hwena sul sonen hap de Zini kim de hataꞌan zaka, zen dekam esa nen hen kitak tame gunkum su kul soner. Angkam dep de sosonna dekam sa hen zausul.
¹¹ Zen hen a kirekam moye: Ëe kime nama betek nik gweꞌak, ano enlalana hen ol toranna dekam walas betek enlalana. Hwena kime zise gwek, dekam zebe walas enlalana insa hli tak.
¹² Zep nen okamanak de lowe hennak dawemkam de lalak gwen srem honak de kara gun makane Alap hap dena kara ul gweꞌan. Hwena Kristus kim de hataꞌan zaka, zen dekam esa lalak tangannak de kara gwen makan hla la gwer, hen neno mae mo enlalana dekam sa liwe hera. Aena hen angkam home tangan Alapsa dawemkam hli-hli tasiꞌin. Hwena zen dekam tangan asa tame tal– men kirekam hen Alap Zena asa tame takaye.
¹³ Zep nebe mae hap angkam dan-ahan bol-zaun gwizimꞌin– desan de ang ta gwen hapye: Ahana, Alapsa nen taibliblan. Ahana, Alapsa nen anakan blol gweblan, “Zen sa lamkam nesa ngaya tabiri.” Hen ahana, aha zisi nen kwasang gwibirida gwen. Hwena dan-ahanna in kon, bol-zaun tanganna, aha zisi nen kwasang gwibirida gwen.