¹ Aya-wal oso-wal, ee ama emsa enlala sobiridaꞌan– neno mae mo auyan-azana men kim Musa Bak golewet so gwekake. Alap dekam but yawalsa golzimki– zebe mae hap de jal zini in de ze totot gwibirida gwen hap. Hendep Alap mo sosonkam zep hi yawala insa goletablan gwe kinika.
² Zebe mae hap dekam man nwe-mase gwenan: But de tahalebinni in hen hi yala insa tablan gwe kinik, san de Musa mo baptis tabinnik de ang tanna. Zeno dam gulsunnu, zen dekam mes Musa hon biti gwek.
³ Zen dekam kitak Alap onakore tembanesa dwenblanda gwek,
⁴ hen hona Zebon onakore naka sap notde gwibik. Dekam Alap kaso yawalsa hamal gulzimki, zep dekore hosa notde gwibik, sap kaso yala in hen man ang gwibirida song gwek– zen de ho hap etahalha gwe-gwen srem hap. Hwena ol gulk sun de blaorankam kaso yawalkam in, Zen diki Kristus Zena.
⁵ Neno mae mo auyan-azana zen sap eiwa ki kirekam de owasna hla nul gwek, hwena Alap mo nwenak beya nik hom edakastik. Beya wenya desa man husus gwibirida gweka. Zeno mae mo tok-tok naka zep sasa lang san hli nulida guk song gwek.
⁶ Zen Alap desa nebe mae hap de erak hap ki kang gulku– nen de hen zeno mae mo kim karek-kareksa hole-hle gwe-gwibin srem hap.
⁷ Zep nen bap nen zeno mae mo kim yang tabin alap-alap hap boklena kom ta gwizimdin– men kirekam zebe mae hap dena Alap mo olak lwakke, “Zen yang tabin alap-alap hap de tembane yawala insa dwensiblindak, zao zep syak.”
⁸ Nen bap nen zeno mae mo kim kahalo-kahalokam lowehe gwen– men kirekam zen egwe gwekye. Zen in zep yaklana dekam 23 ribu enkam juwek.
⁹ Hen bap nen Biansa zeno mae mo kim akasik gweblan. Zen in zep zen ahakon wanya de hit ti gwibin nikon juwe gwek.
¹⁰ Nen bap nen zeno mae mo kim Biansa tonsuk gweblan. Zen in zep desa Alap mo dam taha nakore zini heip gulku– men zen juwen hap dena irik gil gwendaye.
¹¹ In zen ki zebon mae kirekam jowe gwek, zen angkam nebe mae hap de erak makan lwaꞌan– nen an zene angkam aumwa hap denak lowe heꞌanye. Zen in zep zini lun Alap mo olak de aisili insa ale nul gwek– nen de desa anakan enlala gwe-gwibin hip, “Bian sa angkam kirekam hen karek tabiri– men zen kirekam karekna nol gweꞌanye.”
¹² Bera! Bahem anakan enaka boltere ta gwibin, “Ëe an Bian onak tateme ezauꞌun.” Zi de kirekam zenaka boltere tankam, zen hwena zeno mae mo kim de kareknak zaran hap alp gwesiꞌira.
¹³ Banakare kareksa de gon hap de enlalana men zen nesa de akasiblin hap enhonak hata gwenda, zen neno mae mo soson nakon hom taman kini gwenan. Sap Alap Zen taibliblanna, zep Zen bejen nesa de serkam akasiblin hap dwam gwibiridan– neno mae mo sosonsa de gulmurunnu kimye. Hwena kareksa de gon hap de enlala de nebon mae hatankam, Zen hen nebe mae hap orasa zertrei gwizimnira– nen dikim karekna in kon wet so gwen hap. Zen dekam zebe tatem ezauk gwenan.
¹⁴ Zen in zep, aya-wal oso-wal, yang tabin alap-alapna emki langa tasibin.
¹⁵ Nen kitak enlalana kike. En-em kles so gwen.
¹⁶ Nen kime Bian Yesus mo timsi de enlala gwibin hip de tembanena olgwen gwibirin, dekam nonol Bian hap dawemsae ol gweblanan. Dekam kime zeno kalsa de enlala gwibin hip de anggur hona otdeblanda gwenan, hen zeno timsi de enlala gwibin hip de rotina olgwenblanda gwenan, dekam zebe enwe-mase gwe-gwenan: Nen ema Bian han eraha-en gweꞌan.
¹⁷ Nen de Bian mo timsi de enlala gwibin hip de rotisa twinbinkim, nen sap beyana, hwena dekam man nwe-mase gweꞌan– san de neno mae mo timni aha-en. Sap nen mese aha-ere rotina insa olgwenbik.
¹⁸ Israelk de zini hen kirekam egwe gwenan. Men zen Alap hap de zip soblan domba ninni dwin gwibiꞌin, zen en dekam zep Alap han nerumlae gweꞌan.
¹⁹ Hwena kirekam insa ebe mae hap ale gulzim, zen em dikim anakan enlala gwibin hip hom, “Yang tabin alap-alapna zen eiwa ensasa naban.” Hen anakan home kim emsa gubiridal, “Zebe mae hap de tembanena, zen sosonna.” Zen waba tangan hap.
²⁰ Ëe hwena em dikim anakan tame gun hube kirekam ebe mae hap ale gulzim: Yang tabin alap-alap hap mensa otweranna blom da gwibir-zimnin, zen Alapsa hom kim boltere da gwenan. Zen hwena dowal-dowalsa kim boltere da gwibirin, hen deban mae kim noleaha-en gwe-gweꞌan.
²¹ Zep nen bejen nen Bian mo kalsa de enlala gwibin hip de anggur ho naban dowal hap de ho naban otdenkam siri so gwen. Hen bap nen Bian mo timsi de enlala gwibin hip de tembane naban dowal hap de tembane naban siri so gwen.
²² Ki san ha ema Bian de emsa husus gwibiridan hap edwam gweꞌan? San ha ema tim ul gweꞌan? – “Bian mo sosonna hom.”
²³ Ahakon sa ano ola insa nulsul– anakan de egunkum, “Nen Kristen zini sap esa banakare maesa syal ei gwibir.” Hwena kire zini ee ama ding gulzimꞌin, “Banakare maesa de syal gwibinkim diki nonol enaka de enhonak anakan takensibirida gwenkam airis, ‘San ha dekam ee ama ere mo Kristen bose walsya mas gwibiridaꞌan? San ha ano gwen san de ang tankam ahakon dekam sa Yesussu hli dal?’”
²⁴ Bahem ere en mo timsi ngalap gwe-gwibin. Hwena aha zisi emki hen enlala gwibirida gwen.
²⁵ Pasarak de tweran ninni, sap esa enlala beya gwen sremkam lop la gwer– anakan de takensibiridan sremkamye, “An san yang tabin alap-alap hap de blom tabir-zimdin mosrona?”
²⁶ Sap Alap mo olak man lwak: “Okamana an hen kitak zewe de kirekam-kirekamna, zen kitak Bian mo bi gwibiridanna.”
²⁷ Kristen srem zi de emsa zebon de tembane gwen hap gublunna, dwam gwenkam sap esa. Men kire tembanesa ep lop tablanna, em sap esa twenblan dala. Em bahem mae anakan de takensiblin hap enlala gwen, “An san yang tabin alap-alap hap de blom tabir-zimdin mosrona?”
²⁸ Hwena tembane tanna iwe de eno Kristen bose emsa gublunkam, “Tweran ninni an yang tabin alap-alap hap de mosrona,” ki bahem twinbin. Sap zen zere mo enhosa ebe hap zertreblala. Sap zen hom dawemkam enho nakon anakan tame guꞌura, “Yang tabin alap mo sosonna hom.” Zep em de zeno nwenak tembanena insa twenblan dankam, desae kim karek san dep titi taꞌara. Zen sremkam sap emaka ahakore en naban zitwenblaꞌara. Hwena em ahakon esa eenlala gwer, “Aha zi ba hap de zere mo dam gulsun nukon tembane hap asa tru-tru gulblun hap?
²⁹ (10:28)
³⁰ Ëe de Alapsa gu soneblan naban de tembane gwenkam, ki aha zi ba hap de asa tembanena in hap husus gweblan hap? Ëe dwan mes-am tembanena in hap dawemna Alap hap golblal!”
³¹ Hwena ee a kirekame mo kirekam de enlala gwen zi hip ding gulzimꞌin: Ba maesa de twinbinkim hen otdebinkim, ahaksa banakare maesa de gonna, zen Bian mo bosesa dikim tingare zi teip gulsublun hap emki syal gwe-gwibin.
³² Bahem Kristussu de taibliblannak de etatete gwen srem zisi karek san dep de titi tan makan gweibirida gwen– sap Yahudi zi, sap Yunani zi, hen sap kitak de Alap mo hlil irin zi niye.
³³ Zep em ano kim em hen lowehe gwen. Ëe tingare zi dikim asa sam gwesik gweblan habe alp gwe-gwenan. Ëe home ere mo tim hip dena anakan ngalap gwe-gwenan, “Ëe de aha zi mo dam gulsun sun ang gwenkam, ee asa usak gwer.” Hwena ano dwam gwibin tanganna, ano syala kon bap zen aha maena Yesussu hli tan. Diki kitak zen engaya gwen.