Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iaminne pasanNa Batara. Le’ba’mi Napattantu untu’ anghukkungi pa’rasangang Hadrakh siagang kota Damsyik. Teai poro suku-suku Israel bawang, mingka ibukotana pole Siria Napatang tongi Batara.
2 Hamat a’baeng-baenga siagang Hadrakh Ia todong ampatangi, kammayatompa kota-kota Tirus siagang Sidon siagang sikontu kacara’dekanna pandudu’na.
3 Le’ba’mi Tirus ambangung benteng-benteng untu’ kalenna siagang appatambung tamaka jaina bulaeng siagang pera’ sa’genna a’jari sangkammami barang biasa sangkamma kassi’ siagang butta peoka ri aganga.
4 Mingka Nipa’jari kasi-asi ri Batara. Sikontu kakalumanynyangnganna anjo kotaya lanipelaki antama’ ri tamparanga siagang anjo kalenna kotaya lala’busuki nikanre ri pepe’.
5 Kota Askelon siagang Gaza lanaciniki anjo kajarianga sa’genna a’jari malla’. Lanacini’ tongi Ekron na tappela’mo sikontu panrannuanna. Gaza latappelaki karaenna, siagang Askelon la’jari sinoi tena bonena.
6 Asdod lanipammantangngi ri tau battua ri bansa-bansa a’bengkoroka. Nakana Batara, "Anjo tu Filistin tampoa laKutumpasaki.
7 Talangnganreami ke’nanga dageng acceraka ija siagang kanre maraengang nipappisangkanga. Sikontu tau tassesaya la’jari ummakKu siagang nipasangkammai salaku bageang battu ri suku Yehuda. Ekron la’jari anggota ummakKu, sangkamma tu Yebus ri jammang riolo.
8 LaKujagai buttaKu siagang laKutahangi sikamma pasukang-pasukang bansa maraeng niaka ero’ allaloi. Tenamo nalaKupa’biang sikamma tumanjallakkanga anjajai ummakKu. Nasaba’ Kucini’mi kasessanna ke’nanga."
9 He pandudu’na Sion, rannu mako! He pandudu’na Yerusalem, makkio’ rannuko! Ciniki! Battui Karaennu angngerang pammetang! Ia Karaeng adele’ angngeranga kasalamakkang. Mingka tuna pa’maiki lalang kabattuanna A’dongko’ keledai, sikayu keledai rungka.
10 Nakana Batara, "LaKupelaki kareta-kareta pa’bundukang battua ri Efraim, sikontu jarang niaka ri Yerusalem laKupa’lanynyaki siagang sikontu panaya laKuancuruki. Lanapa’la’bangi napabattu Karaennu passiamakkanga ri alla’na bansa-bansaya. Lakoasai battu ri tamparang se’rea mange ri tamparang maraenga, battu ri Binanga Efrat sa’genna ri cappa’na linoa."
11 Nakana Batara mae ri umma’Na, "Lanri parjanjiang le’baka Kupare’ siagang ikau ngaseng, parjanjiang nipa’jari assaya siagang cera’ koro’bang nipassareanga, laKupakabebasaki ra’ya’nu sessaya lalang ri butta pammelakkang sangkamma tau nikurunga lalang ri bungung kalotoro’.
12 Ammotere’ mako he sikamma tunipelaka, anne kamma nia’mo panrannuannu. Ammoterekko mange ri tampa’ pa’la’langannu, iNakke tuli lambarakkaki ngasengko. Pilangngeri: LaKubarakkakiko a’lappi rua lanri sikontu kasessang le’baka nukasia’.
13 Yehuda laKupake a’jari salaku pana tubarani, siagang Israel salaku ana’ pana sadiaya lanipabuccu’. Pandudu’na Sion laKupake salaku pa’dang; anjo pa’danga laKupake ambuccuki sikontu tu Yunani."
14 LaNapappicinikangi KalenNa Batara mae ri umma’Na, sanrapangi kila’ nipabuccu’ ana’-ana’ panaNa. Batara Kaminang Tinggia lappasa’ra’ tarompe’ pammatei maju a’bundu’, nampa a’jappa maju lalang anging barubu battu timboro’.
15 Umma’Na mattantu laNasarei pa’la’langngang, sa’genna akkulle nabeta ke’nanga sikontu musua. Sanrapang pakkio’na tau nasa’ringa lanri angnginung, kammaminjo pakkio’na ke’nanga lalang pa’bundukang. Sanrapang cera’ nitumpaya irate ri tampa’ pakkoro’bangnganga, kammaminjo tattumpana cera’na musunna ke’nanga.
16 Punna battu anjo alloa, laNapasalamaki Batara umma’Na, sanrapang pakalawaki ampasalamaki gimbala’na battu ri bahayaya. Laccayai ke’nanga ri buttaNa Batara, sanrapang paramata songko’ karaeng accilla’-cillaka.
17 Tamaka baji’na buttaNa Batara sallang, teai sipato’ baji’na siagang ga’gana! Anjorengi coppong sikali timbona anggoroka siagang gandunga, sa’genna pila’ katambang gassinna turungkaya siagang tuloloa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA