Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Are panghakimanna PANGERAN la para’, Yerusalim bakal erampoga, ban hasella bakal egi-bagiya e adha’na matana ba’na.
2 PANGERAN makompola sakabbinna bangsa epanyerranga Yerusalim. Kottha jareya bakal erebbu’a, ko-bengkona erampoga, ban babine’anna eparkosa’a. Saparona pandhudhu’ bakal egiba’a ka pambuwangan, salebbina bakal pagguna enneng e kottha jareya.
3 PANGERAN pas bakal majuwa aperrang ngadhebbana sa-bangsa jareya, akantha se elampa’agi gi’ lamba’na.
4 E are jareya Salerana bakal ngadegga e Gumo’ Jaitun, e temorra Yerusalim. Gumo’ Jaitun jareya pas bakal eseba’a bi’ cora sampe’ madhuwa dhari temor sampe’ ka bara’. Saparona gumo’ jareya bakal ajalana ka dhaja, ban saparona bakal ajalana ka lao’.
5 Ba’na bakal buruwa lebat e cora se magi gumo’ jareya daddi dhadhuwa’. Ba’na bakal buruwa akantha bangatowana e bakto badha lendhu e jaman pamarenta’anna Uziya, rato Yehuda. Saellana jareya Pangeran tang GUSTE Allah bakal rabuwa, eerengngagi sakabbinna malaekat.
6 Mon are jareya la para’, tadha’ hawa se cellep otabana es pole.
7 E are jareya tadha’ papetteng pole’. Are bakal tera’a terros, bariya keya e bakto malem. Tape pera’ PANGERAN se ngagali bila are jareya se dhapa’a.
8 E are jareya aeng se segger bakal agiliya dhari Yerusalim; saparona aeng jareya bakal agiliya ka Tase’ Mate ban saparona ka Tase’ Tengnga. Aeng jareya bakal agiliya sataon benteng, e mosem nambara’ ban e mosem nemor.
9 PANGERAN pas bakal marenta’a menangka rato e saantero bume; saneyap oreng bakal nyemba’a ka Salerana menangka Allah ban ngennal Salerana kalaban asma se settong.
10 Saantero nagara dhari Geba e dhaja sampe’ ka Rimon e lao’, bakal daddiya tenggangan. Tape Yerusalim bakal mo’dula sampe’ tenggi, atenggiyan dhari tana e sabingkerra; kottha jareya bakal atamba’a lebar dhari Labang Saketheng Benyamin sampe’ ka Labang Saketheng Paddu, iya reya kennengnganna Labang Saketheng Se Kapeng Settong ban dhari Manara Hananel sampe’ ka kennengnganna pamerressanna anggur andhi’na rato.
11 Reng-oreng bakal amana enneng e tha-kottha jareya, ta’ tako’ epate’e oreng.
12 PANGERAN bakal madhatengnga panyaket se nako’e ka sakabbinna bangsa se la aperrang ngadhebbi Yerusalim. Matana ban jilana, la’-mala’ sabadan bakal bucco’a gi’ dhi’-odhi’.
13 E are jareya bi’ PANGERAN sa-bangsa epabingonga parana ban epakatako’ana sampe’ saneyap oreng bakal mega’a ban nyerranga kancana se badha e seddi’anna.
14 Lalake’an e Yehuda bakal aperranga abilla’ana Yerusalim. Menangka barang rampasan reng-oreng jareya bakal ngala’a sakabbinna artana sa-bangsa e sabingkerra se aropa emmas, salaka ban kalambi se atombugan.
15 Panyaket se talebat nako’e bakal ngennenga ka jaran, jaran buwadan, onta ban hemar, ban sakabbinna keban e parkemahanna moso.
16 Saellana jareya sakabbinna oreng se gi’ odhi’ e antarana sa-bangsa se nyerrang Yerusalim, bakal entara ka kottha jareya nyemba’a Rato, PANGERAN Se Mahakobasa, ban araya’agiya Pesta Ranggun Dhaun.
17 Mon badha bangsa se ta’ endha’ entar ka Yerusalim kaangguy nyemba Rato, PANGERAN Se Mahakobasa, e nagarana ta’ kera badha ojan toron.
18 Ban mon oreng Messer ta’ endha’ araya’agi Pesta Ranggun Dhaun, bangsa jareya bakal ekennenga keya panyaket se epadhateng bi’ Pangeran ka saneyap bangsa se ta’ endha’ entar abakte.
19 Jareya okoman ka Messer ban ka sakabbinna bangsa se ta’ endha’ araya’agi Pesta Ranggun Dhaun.
20 E are jareya sampe’ seng-gungseng pangangguyya jaran bakal eokerana ca’-oca’, "Kaagem PANGERAN malolo." Ci-panci e Padalemman Socce bakal earga’ana akantha bung-tobungnga tor-ator e adha’na mezba.
21 Sakabbinna panci e Yerusalim ban e saantero Yehuda bakal epadaddiya kaagunganna PANGERAN Se Mahakobasa malolo. Pandhudhu’ se ngatorragi kurban bakal ngangguya ci-panci jareya epangella’a daging tor-ator. Mon bakto jareya la napa’, ta’ kera badha sodagar pole e Padalemmanna PANGERAN Se Mahakobasa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA