Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Adhu, ja’ sakenga junandalem ka’dhinto taretan abdidalem tonggal rama tonggal ebu, se oneng nyoso ka ebu abdidalem, tanto junandalem sareng abdidalem eseyom manabi tapanggi e lorong, sabab ta’ kera badha se ngoca’e abdidalem.

² Junandalem sareng abdidalem ebakta’a ka compo’na ebu sopaja junandalem kengenga ngajari abdidalem. Junandalem eatorana anggur se ro’om, sareng aengnga buwana dalima.

³ Asta kacerra junandalem neggu’i abdidalem, asta kanganna agellu’ abdidalem.

⁴ Mara ajanji, babine’an Yerusalim, ba’na ta’ agangguwa tang kataresna’an sabellunna katekkan se daddi pangaterrona. Babine’an:

⁵ Sapa se dhateng dhari sagara beddhi rowa, se nyandhar ka kakasena? Babine’: Abdidalem abungowe junandalem e babana bungkana appel, kennengngannepon junandalem egandhu’ sareng elahirragi.

⁶ Padaddiyagi abdidalem ka’dhinto buwana atena junandalem, ja’ kantos junandalem agellu’ oreng laenna kajabana abdidalem malolo; sabab kataresna’an ka’dhinto kowadda akadi maot, akadi dunnyana oreng mate kobasana napso. Rabbangnga akadi apoy, bar-galabaran kantos oreng padha tako’.

⁷ Aeng sabannya’na ta’ mampo mamate kataresna’anna ate, banjir ta’ kobasa alanyo’. Manabi oreng marengngagi sadaja artana epamondhuda kataresna’an, se ekaolle tanto namong eya-seya.

⁸ Sengko’ kabbi andhi’ ale’ babine’ se sosona gi’ kene’. Epabaramma’a bi’ sengko’ kabbi ale’ jareya mon badha oreng dhateng alamar?

⁹ Ja’ sakenga tang ale’ jareya geddhung, bi’ sengko’ sataretan epaddeggana manara salaka e attasanna. Ja’ sakenga ale’ jareya labang saketheng, bi’ sengko’ sataretan epalanga ban kaju comara. Babine’:

¹⁰ Sengko’ reya geddhung bato, ban manarana tang soso. Tang kakase ngagali ja’ e dhalem salerana, sengko’ nemmo kasennengngan. Lalake’:

¹¹ Sulaiman kaagungan kebbun anggur e Ba’al-Hamon; kebbun jareya epagarap ka oreng se ajaga. Se agarap kebbun jareya rang-sorangnga majar saebu pesse salaka, menangka gantena hasella,

¹² ban narema pesse dhu ratos menangka opana lessona. Dina pesse jareya kala’ ba’na, Sulaiman, ban bagi ka para panjagana kebbunna ba’na. Tape tang kebbun anggur tang andhi’ dibi’, badha e adha’anna sengko’ reya.

¹³ He, reng-oreng se ngennengnge kebbun, ca-kanca terro ngedhinga sowarana ba’na; mara sengko’ ngedhingngagiya keya! Babine’:

¹⁴ Ngereng duli rabu, buwana ate, ngereng rabu akadi keddang, akadi budhu’na manjangan e Pagunongan Beter.

Kidung Agung

Video Kidung Agung 8

Ikuti Kami:

KONTAK | PARTISIPASI | DONASI