Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai huidah ma bani tangan siamun ni na hundul bani paratas ai sada buku, na marsurat hun darat pakon humbagas, na ilak marhitei pitu lak.
2 Anjaha huidah ma sada malekat na gogoh, na mandilohon maling, “Ise ma na talup mangungkab buku in pakon mananggali lakni in?”
3 Tapi seng dong barang ise i nagori atas, age i tanoh, age i toruh ni tanoh, na boi mambuka buku ai atap manonggor hubagas.
4 Gabe tangis-tangis ma ahu, halani seng dong na talup mangungkab buku ai atap manonggor hubagas.
5 Jadi nini sada humbani sintua ai ma hu bangku, “Ulang ham tangis! Tonggor ma, domma monang singa na humbani marga Juda, urat ni si Daud. Ia do na boi mambuka buku in pakon mananggali lakni.”
6 Anjaha huidah ma i tongah-tongah ni paratas ai pakon pargoluh na ompat ai ampa sintua ai jongjong sada Anak ni biribiri, songon na dob isambolih, pitu do tandukni anjaha pitu do matani, ai ma na pitu Tonduy ni Naibata, na dob isuruh hu sab tanoh on.
7 Jadi roh ma Anak ni biribiri ai, ijalo ma buku ai hun tangan siamun ni na hundul i atas paratas ai.
8 Jadi dob ijalo buku ai, manrongop ma pargoluh na ompat ai ampa sintua na dua puluh ompat ai i lobei ni Anak ni biribiri ai; haganup do sidea manjolom husapi pakon pinggan omas gok bani na misbou, ai ma tonggo ni halak na pansing.
9 Idodingkon sidea ma doding na bayu, nini ma, “Na talup do Ham manjalo buku in pakon mambuka sagala lakni; ai na dob tarbunuh do Ham anjaha marhitei daroh-Mu itobus Ham do bani Naibata jolma humbani ganup morga, hata, pangku, pakon bangsa,
10 anjaha ijadihon Ham do sidea bani Naibatanta gabe sada harajaon ampa malim-malim, anjaha manrajai sidea i atas tanoh in.”
11 Jadi sanggah mangkawah ahu, gabe hubogei ma sora ni buei malekat inggot paratas ai ampa pargoluh ai ampa sintua-sintua ai; ia bilangan ni sidea marlaksa-laksa anjaha marribu-ribu do.
12 Marsora na maling do sidea mangkatahon, “Na talup do Anak ni biribiri, na dob tarsambolih in, manjalo kuasa, habayakon, hapentaron, hagogohon, hasangapon, hamuliaon, ampa puji-pujian.”
13 Jadi hubogei ma sagala na tinompa na i nagori atas, i tanoh pakon i toruh ni tanoh ampa ibagas laut, haganup na ibagas ai mangkatahon, “Puji-pujian, hasangapon, hamuliaon ampa hagogohon ronsi sadokah ni dokahni ma bani na hundul i atas paratas in pakon bani Anak ni biribiri in!”
14 Anjaha ihatahon pargoluh na ompat ai ma, “Amen!” Anjaha manrogop ma sintua-sintua ai anjaha marsombah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA