Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Beterus tiang serioq sopoq gulungan kitab lẽq gading-Ne saq melinggih lẽq tahte nike. Kitab nike penoq siq tulisan lẽq bagian dalem dait bagian luahne, dait tesẽgel kadu pituq sẽgel.

² Terus tiang serioq sopoq malaẽkat saq perkase bekuih-kuih siq suare saq belẽq, "Sai saq patut bukaq sẽgel-sẽgel niki dait bukaq kitab niki?"

³ Laguq timaq lẽq sorge, atao lẽq gumi, atao lẽq bawaq gumi ndẽq araq sopoq dengan juaq saq sanggup bukaq kitab nike, dait serioq isine.

⁴ Make tiang nangis ẽroq asẽq sẽngaq ndẽq araq sopoq dengan juaq saq patut bukaq kitab nike, dait serioq isine.

⁵ Terus salaq sopoq lẽq antare pemimpin-pemimpin nike bebase lẽq tiang, "Ndaq nangis! Silaq pade serioq! Singe lẽman suku bangse Yehuda, keturunan Daud, sampun menang. Ie sanggup bukaq pituq sẽgel dait bukaq gulungan kitab nike."

⁶ Beterus tiang serioq, sopoq Anak Dombe nganjeng lẽq tengaq-tengaq tahte nike, tekeliningin siq keempat mahluk dait selapuq pemimpin nike. Anak Dombe nike ruene maraq sampun tesembelẽh. Ie bedowẽ pituq tanggẽq dait pituq mate: Nike pituq Roh Allah saq sampun teutus ojok seantẽro dunie.

⁷ Beterus Anak Dombe nike maju dait bait gulungan kitab nike lẽman gading kanan Dengan saq melinggih lẽq atas tahte.

⁸ Lẽq waktu Anak Dombe nike ngelaksaneang hal nike, keempat mahluk dait keempat likur pemimpin nike nyungkur lẽq arepan-Ne. Ie pade sopoq-sopoq negel kecapi dait cawan emas saq berisi menyan, nike do'e-do'e dengan-dengan saq tehususang bagi Allah.

⁹ Ie pade nyanyiang sopoq lagu saq baru: "Deside patut bait kitab nike, dait bukaq sẽgel-sẽgelne. Sẽngaq Deside sampun tesembelẽh, dait siq ninggal Deside, manusie lẽman selapuq suku, base, umat dait bangse sampun Deside tumbas bagi Allah.

¹⁰ Deside sampun jariang ie pade sopoq kerajaan, dait jari imam-imam, adẽq ie pade ngelayanin Allahte, dait mrẽntah lẽq gumi."

¹¹ Beterus tiang serioq malik dait Tiang dengah suare malaẽkat saq beiyu-iyu dait bejute-jute luwẽqne. Ie pade nganjeng ngiterin tahte dait keempat mahluk serte pare pemimpin nike.

¹² Dait ie pade benyanyi siq suare saq belẽq, "Anak Dombe saq sampun tesembelẽh nike, patut nerimaq kuase, kesugihan, kebijaksanean dait kekuatan; Ie patut tehormatin, temulieang dait tepuji-puji!"

¹³ Beterus tiang dengah selapuq mahluk lẽq sorge, lẽq gumi, lẽq bawaq gumi dait lẽq dalem segare -- selapuq mahluk lẽq alam semeste niki -- benyanyi, "Bagi Ie saq melinggih lẽq atas tahte, dait bagi Anak Dombe nike, selapuq pujian dait hormat dait kemuliean dait kuase jari selaẽq-laẽqne!"

¹⁴ Make keempat mahluk nike bebase, "Amin!" Dait pemimpin-pemimpin nike ẽndah nyungkur dait nyembah.

Wahyu

Video Wahyu 5

Ikuti Kami:

KONTAK | PARTISIPASI | DONASI