Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Zelafehad andhi’ ana’ babine’ kalema, iya areya Mahla, No’a, Hogla, Milka ban Tirza. Eppa’na Zelafehad iya areya Hefer, eppa’na Hefer iya areya Gileyad. Eppa’na Gileyad iya areya Makhir, eppa’na Makhir iya areya Manasye, ban eppa’na Manasye iya areya Yusup.
2 Ana’na Zelafehad se kalema jareya entar ngadhep ka Mosa, ban Imam Eleyazar sarta para pamimpin ban sakabbinna ommat se teppa’na akompol e seddi’na labangnga Kemah Socce. Oca’na se kalema jareya,
3 "Eppa’ kaula seda e ra-ara beddhi, sareng ta’ kaagungan pottra lalake’. Eppa’ ta’ ngereng Korah sarengngan ta’ alaban ka PANGERAN. Eppa’ seda lantaran dusana dibi’.
4 Tape aponapa me’ asmana epaelang dhari bangsa Isra’il namong lantaran ta’ kaagungan pottra lalake’? Kaula sataretan nyo’ona tana sangkolan akadi la-balana eppa’."
5 Mosa ngatorragi parkara jareya ka PANGERAN,
6 ban PANGERAN laju adhabu ka Mosa,
7 "Oca’na na’-ana’na Zelafehad jareya pajat bendher. Daddi la padha berri’i tana sangkolan akantha tan-taretanna eppa’na. Sangkolanna Zelafehad kodu etoronnagi ka ana’ babine’anna.
8 Kabala ka bangsa Isra’il ja’ mon badha oreng lalake’ mate tape ta’ andhi’ ana’ lalake’, sangkolanna kodu etoronnagi ka ana’ babine’anna.
9 Mon ta’ andhi’ ana’ babine’, sangkolan jareya kodu etoronnagi ka taretan lake’na.
10 Mon ta’ andhi’ taretan lake’, tanana jareya daddi sangkolanna taretan lake’na eppa’na.
11 Mon ta’ andhi’ taretan lake’, ban eppa’na ta’ andhi’ taretan lake’ keya, tanana daddi andhi’na balana se paleng semma’ dhari kaomma." Katantowan jareya kodu etoro’ bi’ reng-oreng Isra’il menangka atoranna hokom se edhabuwagi PANGERAN kalaban parantara’anna Mosa.
12 Dhabuna PANGERAN ka Mosa, "Kassa’ ba’na ongga ka Gunong Abarim, dhari jadhiya abassagi nagara se bi’ Sengko’ ebagi ka bangsa Isra’il rowa.
13 Mon ba’na la mare ngabas nagara jareya, ba’na pas bakal mateya akantha Harun, kaka’na rowa,
14 sabab ba’na ban Harun e baktona badha e ra-ara Zin rowa ta’ atoro’ Tang parenta. E bakto ommat Isra’il ango’ngo’an ka Sengko’ e Meriba, ba’na ta’ endha’ noduwagi Tang kakobasa’an se socce ka bangsa jareya." (Kadaddiyan jareya neng e somber Meriba e Kades, e ra-ara beddhi Zin.)
15 Atorra Mosa ka PANGERAN,
16 "GUSTE Allah se apareng odhi’ ka sadajana mahlok se odhi’ e bume, abdidalem nyo’ona, kasokana Junandalem mele oreng se epamimpina bangsa ka’dhinto;
17 oreng se bisa apareng parenta e dhalem paperrangan, sopaja ommat Isra’il ka’dhinto ta’ kantosa akadi dumba se tadha’ tokang ngowanna."
18 Dhabuna PANGERAN ka Mosa, "Olok Yusak, ana’na Nun. Yusak jareya cakep orengnga. Tompangngagi tanangnga ba’na ka cethagga.
19 Pas soro manjeng e adha’anna imam Eleyazar sarta e adha’anna ommat Isra’il. Omommagi ka reng-oreng jareya ja’ Yusak jareya epadaddi gantena ba’na.
20 Sabagiyan dhari kakobasa’anna ba’na bagi ka Yusak jareya, me’ olle ommat Isra’il bisa ta’at ka Yusak kabbi.
21 Yusak kodu menta petodu ka Imam Eleyazar ban Eleyazar kodu atanya apa se ekakarep Sengko’ kalaban cara atanya ka Urim ban Tumim. Kalaban cara se kantha jareya Eleyazar bisa mimpin Yusak ban ommat Isra’il kabbi e dhalem parkara apa’a bai."
22 Mosa alampa’agi papakonna PANGERAN jareya. Yusak epakon ngadek e adha’anna Imam Eleyazar ban sakabbinna ommat Isra’il.
23 Saellana jareya Mosa laju nompangngagi astana ka serana Yusak, sarta pas ngomommagi ja’ Yusak la eangkat epadaddi gantena, menorot se edhabuwagi PANGERAN ka salerana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA