Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mahlah, Nuah, Hogelah, Milkah, ras Tirsah eme anak-anak si diberu i bas Selopehat anak Heper, anak Gileat, anak Mahir, anak Manase, anak Jusup.
2 Lawes ia ngadap Musa, Imam Eleasar, peminpin-peminpin Israel, ras kerina perpulungen e i bas dalan bengket ku bas Kemah Perjumpan, jenari nina,
3 "Bapa kami nggo mate i bas taneh si mesawang alu la nadingken anak dilaki sada pe. Ia labo nai pengikut Korah, si nimbak TUHAN; ia mate erkite-kiteken dosana jine.
4 Adi erkite-kiteken la lit anakna dilaki nge, ngkai maka gelar bapa kami arus masap i bas Israel nari? Berekenlah man kami taneh i bas bagin kade-kade bapa kami."
5 Persoalan enda isehken Musa man TUHAN,
6 jenari nina TUHAN man bana,
7 "Payo nge pemindon anak-anak si diberu Selopehat; berekenlah man bana taneh i bas bagin kade-kade bapana. Berelah erta-erta tenading bapana nusur man bana kerina.
8 Kataken man bangsa Israel maka adi lit sekalak dilaki mate alu la nadingken anak dilaki, anakna si diberu arus ngaloken erta-erta tenadingna.
9 Adi anakna si diberu pe la lit, senina-seninana si ngalokenca.
10 Adi senina-seninana pe la lit, senina bapana si ngaloken tading-tadingen e.
11 Adi la lit seninana ntah pe senina bapana, emaka kade-kadena si ndeherna si ngaloken tading-tadingenna e, janah njemaksa bagi ertana jine." Bangsa Israel arus ngaloken si enda jadi sada ketetapen undang-undang sue ras si nggo ipedahken TUHAN man Musa.
12 Nina TUHAN man Musa, "Nangkihlah Deleng Abarim jenari tataplah taneh si Kubereken ateKu man bangsa Israel.
13 Kenca idahndu e, kam pe mate, bagi seninandu Harun,
14 sabap duana kam nimbak pedahKu i bas taneh si mesawang Sin. Asum kerina perpulungen e jungut-jungut man bangKu i Meriba, la kam nggit ngakui kuasangKu si badia i lebe-lebena." (Meriba eme kap sada ulu lau i Kades i bas taneh si mesawang Sin.)
15 Ertoto Musa nina,
16 "TUHAN Dibata, sumbul kerina kegeluhen, ertoto aku gelah IangkatNdu min sekalak si ngasup minpin bangsa e,
17 janah ngasup mereken perentah man bana i bas peperangen, gelah perpulungenndu ula pagi bagi biri-biri si la erpermakan."
18 Nina TUHAN man Musa, "Buatlah Josua anak Nun, sekalak si megegeh, jenari tangkuhken lah ia.
19 Suruh ia tedis i lebe-lebe Imam Eleasar ras kerina perpulungen e, jenari i lebe-lebena kerina, momoken maka ia me si jadi gancihndu.
20 Bereken man bana kuasandu e deba, gelah kerina perpulungen Israel patuh man bana.
21 Ia la banci la rusur nungkun man Imam Eleasar, si banci meteh sura-surangKu alu make Urim ras Tumim. Alu dalan si enda Eleasar banci mabai Josua ras kerina perpulungen Israel i bas kerina persoalenna."
22 Minter ibahan Musa sue ras si ipedahken TUHAN man bana. Isuruhna Josua tedis i lebe-lebe Imam Eleasar ras kerina perpulungen e.
23 Bagi si nggo ipedahken TUHAN, itangkuhken Musa Josua, jenari imomokenna Josua jadi gancihna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA