Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nina TUHAN man Harun, "Kam, anak-anakndu, ras bage pe kalak Lewi la banci la ngenanami kiniseran adi salah pendalankenndu dahin i bas Kemah Perjumpan; tapi kam ras anakndu ngenca ndatken kiniseran adi salah dahin keimamen idalankenndu.

² Baba bengket kade-kadendu, eme suku Lewi, gelah ia erdahin ras kam nampati kam tupung kam ras anak-anakndu ndahiken dahin imam i bas Kemah e,

³ tapi la banci idadapna sada pe barang-barang si badia i bas Ingan si Badia, bage pe batar-batar. Adi idadapna, ia ras kam la banci la ibunuh.

⁴ Ia arus erdahin ras kam, ras nehken tanggung jawabna i bas kerina dahin-dahin i bas Kemah, tapi kalak sideban la banci erdahin ras kam.

⁵ Kam ras anak-anakndu saja ngenca si arus erdahin i bas Ingan si Badia ras i bas batar-batar, gelah ulanai ka pagi gara pernembehKu man bangsa Israel.

⁶ Aku kap si milih kade-kadendu suku Lewi i bas bangsa Israel nari jadi sada hadiah man bandu. Ia iendesken man bangKu saja ngenca, gelah banci idalankenna kerina dahinna i bas Kemah.

⁷ Tapi kam ras anak-anakndu saja ngenca si arus ndahiken dahin keimamen i bas batar-batar ras si lit i bas Ingan si Badiana kal. Si enda kerina jadi tanggung jawabndu, sabap nggo Kubereken man bandu dahin keimamen jadi sada pemere. Kalak sideban si reh ndeheri barang-barang si badia e la banci la ibunuh."

⁸ Ikataken TUHAN man Harun nina, "Ingetlah maka man bandu Kubereken kerina pemere khusus si ibahan man bangKu si la itutung jadi persembahen. Si enda kerina Kubereken man bandu ras man kesusurenndu jadi bagin si itentuken man sikerajangenndu seh rasa lalap.

⁹ I bas persembahen si badiana kal si la itutung i bas batar-batar, si jadi sikerajangenndu eme kap: persembahen buah gandum, persembahen pengalemi dosa, ras persembahen-persembahen tebusen. Kerina si ipersembahken man bangKu jadi persembahen si badia jadi sikerajangenndu ras anak-anakndu.

¹⁰ Kerina si enda la banci la ipanndu i bas Ingan si Badia, janah dilaki ngenca banci manca. Badialah perbanndu nandangi si e kerina.

¹¹ Tambah si e, kerina pemere khusus si deban si ibahan bangsa Israel man bangKu, e jadi sikerajangenndu. Kerina si enda Kubereken man bandu, man anak-anakndu si dilaki, ras man anak-anakndu si diberu i bas kerina paksa-paksa si reh enda. Kerina keluargandu si bersih rikutken peraturen agama banci manca.

¹² Man bandu Kubereken ulih sinuan-sinuan si mejilena si ibereken bangsa Israel man bangKu tep-tep tahun: minak saitun, anggur, ras gandum.

¹³ Si e kerina jadi sikerajangenndu. Kerina anggota keluargandu si bersih banci manca.

¹⁴ Kerina i bas negeri Israel si nggo iendesken khusus man bangKu jadi sikerajangenndu.

¹⁵ Anak sintua ntah asuh-asuhen si ipersembahken bangsa Israel man bangKu jadi sikerajangenndu. Tapi la banci la ialokenndu galar pertebusen tep-tep anak sintua, ras arus pe ialokenndu galar guna tep-tep anak si pemena i bas asuh-asuhen si la bersih rikutken peraturen agama.

¹⁶ Anak-anak e la banci la itebusi i bas umur sada bulan alu erga lima duit pirak, rikutken ukuren si sah.

¹⁷ Tapi anak lembu si pemena, biri-biri ras kambing la banci itebusi; si e kerina jadi sikerajangenKu tuhu-tuhu, janah arus igeleh man persembahen. Pirpirken darehna ku batar-batar janah tabeh-tabehna itutung jadi persembahen pangan, si merim Kuakap.

¹⁸ Dagingna jadi sikerajangenndu, bali ras tenten ras nahe kemuhen si arah pudi i bas persembahen si badia e.

¹⁹ Kubereken man bandu, ras man anak-anakndu si dilaki, ras man anak-anakndu si diberu, i bas kerina paksa-paksa si reh enda pemere si khusus si ipersembahken bangsa Israel man bangKu. Enda me sada perpadanen si la banci iobah-obah si nggo Kubahan ras kam bage pe ras kesusurenndu."

²⁰ Nina TUHAN man Harun, "Kam la ngaloken erta kai pe si banci iwarisken, janah la lit sada bagin pe i bas taneh Israel si itetapken man bandu. Aku, TUHANndu, Aku ngenca sikerajangenndu asa lalap."

²¹ Nina TUHAN, "Nggo Kubereken man kalak Lewi kerina persembahen persepuluhen si ipersembahken bangsa Israel man bangKu. Enda jadi upahna erdahin i bas ia ngurus Kemah Perjumpan.

²² Bangsa Israel si debanna lanai banci ndeheri Kemah e janah ise si ndeherisa arus iukum mate.

²³ Genduari nari ras seterusna suku Lewi ngenca banci ngurus Kemah e janah kerina tanggung jawab kerna si e ia mersanca. Enda sada peraturen si tetap si man ikuten kesusurenndu pe. Kalak Lewi la banci lit ertana si tetap i bas Israel,

²⁴ sabap nggo Kubereken man bana jadi sikerajangenna persembahen persepuluhen si ipersembahken bangsa Israel man bangKu jadi persembahen khusus. Eme sabapna maka Kukataken man bana la banci lit ertana si tetap i bas negeri Israel."

²⁵ TUHAN nuruh Musa,

²⁶ gelah ikatakenna man kalak Lewi nina, "Adi ialokenndu i bas bangsa Israel nari persembahen persepuluhen si ibereken TUHAN jadi sikerajangenndu, la banci la ipersembahkenndu sepersepuluhna i bas si e nari jadi sada pemere khusus man TUHAN.

²⁷ Persembahen si enda bali kap ras persembahen si ibahan sekalak perjuma i bas gandum si mbaru ras anggur si mbaru.

²⁸ Alu dalan si enda kam pe mpersembahken persembahen khusus si jadi sikerajangen TUHAN i bas kerina persembahen persepuluhen si ialokenndu i bas bangsa Israel nari. Persembahen si enda arus iendeskenndu man Imam Harun.

²⁹ Berekenlah si mehulina i bas si ialokenndu.

³⁰ Kenca nggo ipersembahkenndu bagin si mehulina, banci man bandu lebihna e, bali ras perjuma si banci nimpan kerina si tading kenca ibahanna persembahenna.

³¹ Kam ras keluargandu banci man si lebihna e ijapa pe, sabap eme upahndu erdahin i bas Kemah e.

³² Labo kam ersalah adi ipanndu pe e, asal nggo ipersembahkenndu si mehulina man TUHAN. Tapi arus ijagandu maka ula icemarken pemere si badia bangsa Israel alu leben mangani persembahen e ope denga ipersembahkenndu bagin si mehulina: adi bage ibahanndu, kam la banci la ibunuh."

Bilangan

Video Bilangan 18

Ikuti Kami:

KONTAK | PARTISIPASI | DONASI