Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Assala’na Mikha iamintu tubattu ri se’re kota ca’di niarenga Moresyet. Ri wattu niparentana pa’rasangang Yehuda iamintu sikamma karaeng: Yotam, Ahas, siagang Hizkia; iaminjo wattua nannarima Mikha pasang battu ri Batara ri passala’na Samaria siagang Yerusalem.
2 Pilangngeri, he sikamma bansa-bansaya! Parhatikangi, he pandudu’na sikontu linoa! Niaki battu Batara Kaminang Tinggia salaku sa’bi ambaliang ngasengko! Pilangngerimi a’bicara battu ri Balla’ matangkasa’Na ri suruga.
3 Naungi battu ri pammantangngang matangkasa’Na Na’jappa irate ri coppo’-coppo’ buluka ri buttaya.
4 Assolongi sikamma buluka irawa ri pala’ bangkenNa kontui liling lalang pepe’ a’rinraya; la’boroki buttana antama ri ka’bung-ka’bunga, rapang je’ne’ irate bulu’ a’lo’loro’ naung.
5 Yangasenna anjo lakajariangi lanri dorakai tu Israel siagang angngewai ri Allata’ala. Inai passabakkang nadoraka tu Israel? Sai Samaria ibukotana tonji? Inai passabakkang nanynyomba tu Yehuda ri barhalaya? Sai Yerusalem tonji?
6 Lanri kammanami anjo na Nakana Batara, "LaKupa’jari Samaria tambungang loro ri paranga, siagang tampa’na taua a’lamung poko’ anggoro’. Rumbanganna anjo kotaya laKubuangi antama ri ka’bunga, siagang laKubongkara’ kabusuki pondasina.
7 Patung-patunna ka’jalaka ballinna laniancuruki, siagang sikamma apa-apa nipassareanga mae ri bai’-baine tugasaka ri balla’ rewataya lanitunui, kammayatompa sikontu barhalana lanipanraki. Anjo barang-barang kammaya wassele’ ibadana ke’nanga mae ri rewata kacopponganga. Kamma-kamma anne kabusu’na anjo laniengkaki ri musu-musunna untu’ napassareang mae ri rewata-rewatana ke’nanga."
8 Lanri kammana anjo, inakke, Mikha, si’nai pa’maikku siagang akkunrarenga’. La’jappa’ natena kummakeang siagang tena kummake pa’lapa’ bangkeng untu’ ampappicinikangi angkanaya antekamma si’nana pa’maikku. Lappilollonga’ rapang kongkong romang siagang lammarranga’ rapang unta.
9 Nasaba’ bokka’-bokka’na Samaria takkulleai niballei, siagang Yehuda lanituju tongi ri sare kammaya anjo. Battumi balaya mae ri Yerusalem, pakke’bu’ lompona butta passolongang cera’na bansaku.
10 Teako paui mae ri musu-musunta ri Gat ri passala’na bala antujuaki’; teako lappassangi ke’nanga ancinikko angngarru’ ngaseng. He pandudu’na Bet-Le-Afra, anggulung mako lalang ri aua salaku tanra tappu’ panrannuang!
11 Ikau ngaseng pandudu’na Safir, a’lampamako mange ri tampa’ pammelakkanga tammakea pakeang siagang tena siri’-siri’nu! Tu Zaanan tena nabarani assulu’ battu ri kotana ke’nanga. Sa’ra ammarranna taua ri Bet-Haezel a’jari tanra mae ri kau angkanaya anjoreng tenamo pa’la’langngang.
12 Nia’mi battu ri dallekang pakke’bu’ lompona Yerusalem bala battua ri Batara! Lanri kammana anjo, tena olona tu Marot anrannuang pannulung.
13 Ikau ngaseng pandudu’na Lakhis, patabami jaranga ri kareta bunduka! Nupalembai dosa-dosa nigaukanga ri Israel sa’genna doraka tommo Yerusalem napakamma.
14 Kamma-kamma anne, he tu Yehuda, latappela’mi battu ri kau kota Moresyet-Gat. Sikamma karaeng-karaeng Israel tenamo nalanggappa bantuang battu ri kota Akhzib.
15 He tu Maresya, laNapassareangko Batara mae ri musunnu eroka ambetai kotanu. Pamimping-pamimpinna Israel makoasaya laccokkoi lalang ri leang-leanga ri Adulam.
16 He tu Yehuda, polongi uu’nu salaku tanra susa mae ri ana’-ana’nu nukamaseanga. Cukkuruki ulunnu sa’genna a’gondolo’ rapang jangang-jangang pakanre bakkea, nasaba’ laniengkaki ana’-ana’nu mange ri butta pammelakkanga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA