¹ Nada sadia honok dung i, mardalani ma Jesus tu angka kota dohot huta-huta i. Dijamitahon Ia ma disi Jamita Na Denggan taringot tu Harajaan Ni Debata. Dohot ma dua bolas halak siseanNia i laho mandongani Ia.
² Songon i muse angka dadaboru na dung dipamalum sian angka tondi na jahat dohot nyae. I ma si Maria na nigoaran muse si Magdalena (pitu begu dipaorot sian ia);
³ dohot si Johanna daboru ni si Khusa, bendahara ni Raja Herodes; si Susanna, bahat dope tehe daboru na asing. Halahi sandiri do na pasingkop na hasaya di Jesus rap dohot angka siseanNia i.
⁴ Torus do marroan halak mandapotkon Jesus sian angka kota na marragam. Dung bahat sajo halak marlagut, dicaritahon Jesus ma umpama on tu halahi.
⁵ Ning Ia ma, "Adong ma sada halak, na kehe manyabur same. Jadi hatiha na manyabur i ia, adong ma same i na madabu di dalan i, gabe didege-dege halak ma i jana dipapangani unggas.
⁶ Adong muse ma na madabu tu tano na marbatu-batu. Di na mamungka haruar tumburna manigor malos ma suan-suanan i, angke mahiang do tanona i.
⁷ Adong muse ma same i na madabu tu tonga-tonga ni angka duri. Mur magodang ma angka duri i rap dohot angka same na tubu i.
⁸ Tapi adong muse do same na madabu tu tano na napu, gabe tubu ma i jana marsuha ma saratus lompit." Dung i dipaujung Jesus ma umpamania i songon on, "Sanga ise na marpinggol laho marbinege, ditangihon ia ma!"
⁹ Disapai angka siseanNia i ma tu Jesus astuan ni umpama i.
¹⁰ Ninna Jesus ma mangalusi, "Madung dilehen anggo di hamu parbinotoan laho umboto sibunian ni Harajaan Ni Debata. Tapi anggo tu halak na asing mamake umpama do dipaboa taringot tusi, anso ulang diida halahi haru pe nian manaili halahi; haru pe marbinege halahi tapi nada mangarti."
¹¹ "Ondo astuan ni umpama i: Same i, i ma hata ni Debata.
¹² Same na madabu tu dalan i, manggambarkon angka halak na manangihon hata i. Tapi ro ma Sibolis mangarampas hata i sian roha ni halahi anso ulang porsaya jana nipalua halahi.
¹³ Same na madabu tu tano na marbatu i, i ma manggambarkon angka halak na manangihon hata i jana na manjagitsa mardongan sonang ni roha. Tapi nada jabat marurat di bagasan roha ni halahi. Hum santongkin sajo do halahi porsaya hape di na ro pandugaan, marbalik ma halahi.
¹⁴ Same na madabu tu tonga-tonga ni duri i, manggambarkon angka halak na manangihon hata i tapi ganggu do roha ni halahi jana por roha ni halahi di sinadongan boti lungun roha ni halahi marsonang-sonang di tano on. Sudena ma i mangkapit halahi mambaen halahi nada marbatuhon parbatu na matoras. (Angka duri)
¹⁵ Same na madabu tu tano na napu i, i ma manggambarkon angka halak na umbege hata i, jana na manjagohon sadenggan-dengganna di bagasan roha ni halahi. Burju do halahi jana sobar, gabe tulus ma marbatuhon parbatu na denggan."
¹⁶ "Nada adong halak manutung lampu, dung i ditungkupi muse dohot ampang, sanga pe dipayakkon di toru ni podoman. Di inganan ni lampu do dibaen lampu, anso diida na ro tu bagas i sondangna i.
¹⁷ Angke nada adong bagi aha na buni, na so haidaan muse, jana nada adong na simo na so diboto halak muse, angkon tarboto do i jana dipapatar.
¹⁸ Antong parrohahon hamu ma tangkas sanga songon dia parbinegemunu. Angka halak na dung marnampuna, nitambaan muse dope disia. Tapi halak na so adong diha-dihana, dibuat muse dope sian ia sanga aha na nietongnia adong disia."
¹⁹ Ro ma inang ni Jesus dohot angka anggiNia mandapotkon Jesus. Tapi nada tarbaen halahi marsuo dohot Ia hara ni bahat ni halak.
²⁰ Dung i adong ma sada halak paboahon tu Jesus. "Di ruar an do inaMu dohot anggiMu. Giot marsuo halahi dohot Ho."
²¹ Tapi didok Jesus ma tu halahi sude, "Angka halak na umbege hata ni Debata jana na mamarangehonsa, i do Dainang dohot anggingKu."
²² Di na sadari marparau ma Jesus dohot angka siseanNia i. Ning Jesus ma tu halahi, "Taripar ma jolo hita tu bariba ni dano on." Dung i kehe ma halahi marparau.
²³ Hatiha na marparau i halahi tarpodom ma Jesus, jana mangombus ma alogo na gogo di dano i. Masuk muse ma aek tu bagasan parau i gabe di parmaraan ma halahi sude.
²⁴ Kehe ma angka siseanNia i mandapotkon Jesus mangngoti Ia. Ning halahi ma, "O, Guru! Guru! Marmara ma hita on!" Ngot ma Jesus, digorahon Ia ma alogo dohot aek ni dano na marombak i. Alogo i pe dohot aek ni dano i nada marombak be jana gabe so ma sudena.
²⁵ Dung i ninna Jesus ma tu angka siseanNia i, "Di dia do haporsayaanmunu?" Mabiar ma halahi boti homang-homang sajo. Didok halahi ma sama halahi, "Ise do ulaning on? Alogo dohot ombak pe tarparenta Ia. Patu muse do alogo dohot ombak i tuSia!"
²⁶ Ditoruskon Jesus ma dohot angka siseanNia i marparau lopus tu Luat Gerasa di ipar ni Dano Galilea sabola Habincaran.
²⁷ Dung mijur Jesus tu darat, didapotkon sada bayo na hona tondi na jahat ma Ia. Na ro sian kota i do bayo i. Honok ma nada ra marpakean jana nada ra tinggal di bagas bayo i. Hum na di liang ni kuburan ma ia.
²⁸ Di na niidania Jesus, mangangguhi ma ia jana marsomba di jolo ni Jesus, marsurak ma ia, "O, Jesus Anak Ni Debata Na Guminjang! Na giot mahua do Ho tu au? Gomos ma hupangidohon, ulang ma parkanciti au!"
²⁹ Umbaen na nidok ni bayo i pe songon i, hara ni na dung dipaorot Jesus do tondi na jahat i ruar sian ia. Bahat sajo tondi na jahat i na manggosa-gosa bayo i. Jadi haru dirante pe tangannia dohot patna i jana dijagoi dope ia, laing tarruntaskon ia do rante i gabe dioban setan i ma ia tu halongonan.
³⁰ Disapai Jesus ma tu bayo i, "Ise goarmu?"