Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Aih, gabe birong do omas, mubah rupa ni omas pitah ai! Mambur merap batu na mapansing ai bani topini ganup dalan!
2 Anak ni Sion na marmulia ai, na maharga songon omas pitah, gabe songon hudon tanoh do sidea ihira, jadi-jadian ni sitopa hudon.
3 Gari sorigala ibere do bagodni, anjaha ipainum do anakni, tapi anggo boru ni bangsangku domma gabe jahat, doskon burung unta na i halimisan.
4 Longkot do dilahni na inuman bani langit-langitni halani horahni, mangindo indahan do dakdanak, hape seng dong na mambere bani sidea.
5 Halak sipangan na mantin hinan, matei gayuran i alaman. Halak sipakei hiou sitora, martibalan bani tompoh-tompoh.
6 Dousani boruni bangsangku banggalan do ai ase dousa ni Sodom, na pinarseda ibagas sangkidop mata, seng pala dais tangan.
7 Na sangap-sangap ai, na pitahan humbani salju, na lopakan ase dadih, na marbadan gergeran humbani batu intan, na marrupa songon batu intan sapir,
8 tapi sonari birongan do rupa ni sidea ase tampar apuy, seng tartandai be sidea bani dalan-dalan; longkot mando hulingkulingni bani holi-holini, horah songon soban-soban.
9 Sonangan do sidea ai, na matei binahen ni podang, ase sidea ai, na gayuran, na matei marsik, halani seng dong sipanganon hun ladang.
10 Parinangon siparholong manlompah anakni sandiri; sidea do gabe sipanganon bani sidea, sanggah parboisni boru ni bangsangku.
11 Ipadas Jahowa do gila-Ni, iuseihon do gajag ni ringis-Ni; ipagara do apuy i Sion, na mamboiskon das ronsi onjolanni.
12 Seng porsaya raja-raja ni tanoh on atap pangisi ni dunia on ganup, paboa masukan ni munsuh atap imbang do horbangan ni Jerusalem.
13 Halani dousani nabi-nabi ampa hajahatonni malim-malim do ai, ai ma na manduruskon darohni halak parpintor ibagas ai.
14 Mawat-awat do sidea, mapitung i dalan-dalan, marlapu-lapu daroh tumang, gabe seng dong na pag manjamah hiou ni sidea.
15 Misir! Mabutak! Dilo-dilo halak bani sidea. Misir! Misir! Ulang jamah! Lintun do sidea anjaha mawat-awat. Ihatahon halak do i tongah-tongahni bangsa-bangsa: Seng bulih be sidea ijon!
16 Jahowa do na mangerap sidea, seng be idompakkon sidea; seng hona parduli be malim, seng dong be, na malang dompak na matua.
17 Tongtong do kawah-kawah matanami bani pangurupion, tapi soya-soya do; manatap-natap do hanami dompak sada bangsa, na so boi mangurupi hanami.
18 Intei do sidea bani parlangkahnami, gabe seng boi meret hanami i alamannami. Dohor mando ujungnami, das ma ari-arinami; tongon jumpah ma ajalnami.
19 Dorasan do na mardakdak hanami ase lali na i awang-awang. Ipardakdak do hanami i atas dolog, igompangi i halimisan.
20 Hosah hagoluhan bennami, ai ma na mininakan ni Jahowa, dapot ibagas godung ni sidea. Nini uhurnami: Itoruh ni linggomni, manggoluh ma hanami i tongah-tongah ni bangsa-bangsa.
21 Marolob-olob anjaha marmalas ni uhur ma, ale boru Edom, na marianan i tanoh Us! Tapi age hubam das do panginuman in gabe mabuk ma ho, anjaha talanjanganmu dirimu.
22 Salosei ma uhum halani hajahatonmu, ale boru Sion, lang be paturutonni tarbuang ho; tapi hajahatonmai, ale boru Edom, balaskononni do, patidakonni do dousamu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA