Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Emas si isepuh nggo magem, kerina batu Rumah Pertoton ampar merap gedang-gedang dalan.
2 Anak perana Sion seri kap mbarenda ras emas, tapi genduari seri nge ras kudin taneh.
3 Indung serigala pe ipepinemna anak-anakna, tapi bangsangku bali kap ras perik unta si kejam man anak-anakna.
4 Ipelepasna anak-anakna si mbaru tubuh mate lumben ras muas. Anak-anak mindo pangan tapi la lit sekalak pe si merekenca.
5 Kalak si semal man pangan ntabeh mate kelihen i gedang-gedang dalan. Si biasa medem i bas bantal sutra medem i bas gun-gunen sampah.
6 Bangsangku nggo iukum, lebihen asangken ukumen man kalak Sodom, si rempet itombangken alu tan Dibata.
7 Peminpin-peminpinta la keliamen bersih kal bali ras salju, paguh, dingen megegeh, erndilap ndilap perbahan sehatna.
8 Genduari amparen ia i bas pasar, lanai itandai, ayona biringen asangken ageng; kulingna kerah bagi ranting, ringut mbaluti tulan-tulanna.
9 Mate i bas perang ulin kap asang si pudin mate, manjar-anjar perpatena perban lumben, sabap lanai lit nakan si man pangan.
10 Kecedan si reh engkenai bangsangku seh kal hantuna, seh maka nande si ngkelengi anak-anakna pe itanggerna anakna jine man panganna.
11 TUHAN nguseken gegeh rawana si gurlah, IpegaraNa api i Sion nuluhisa gelah radas ras taneh.
12 Ise pe la tek, raja-raja bangsa si deban pe la tek, maka musuh banci mengketi pintu gerbang Jerusalem.
13 Tapi jadi me bage, erkiteken nabi-nabina nggo erdosa, imam-imamna ersalah kerna kematen kalak bujur.
14 Peminpin-peminpin mampa-mampa i gedang-gedang dalan, desken kalak pentang, uisna melket ibahan dareh, seh maka la lit ise pe banci ndadapsa.
15 "Ente ko lawes! Nggo engko keliamen," ningkalak. "Ula dadap aku." Emaka mampa-mampa ia i bas sada bangsa nari ku bangsa si deban, la lit ise pe si ngaloken ia.
16 Lanai diate TUHAN pe ia, TUHAN jine si engkernepken ia kerina. Imam-imam ras peminpin-peminpinna lanai iperdiateken TUHAN.
17 Idarami kami kalak si nggit nampati kami, tapi sia-sia. Itimai kami penampat i bas sada bangsa nari, tapi sada bangsa pe la tersampatisa kami.
18 Musuh sangana nggempangi kami, lanai kami banci erdalan i bas pasar-pasar. Wari-wari kami nggo dem beliganna, wari pendungi nggo seh.
19 Kalak si ngayaki kami pedasen asangken rajawali nangkis i datas awang-awang. Ielisna kami arah deleng-deleng, iemona kami i bas taneh mesawang.
20 Ikuasaina ulu kegeluhen kami, eme raja pilihen TUHAN, eme kalak si iarapken kami engkelini kami i bas serangen musuh-musuh nari.
21 O kalak Edom, ras Us, tawaken, tawai asa ngasupndu. Calung cilaka si ngkenai kam pe nandangi reh me, kam pe nandangi mabuk janah itangtangi kalak uisndu.
22 Nggo genep ukumen dosa Sion, lanai ndekah TUHAN mpediat kita tertaban. Tapi kam o Edom, TUHAN la banci lang ngukum kam IpetangkasNa me kerina kesalahenndu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA